'Y bennod olaf' i Jess Fishlock wrth baratoi i ymddeol o bêl-droed

Mae cyn-gapten tîm pêl-droed merched Cymru, Jess Fishlock, wedi cyhoeddi ei bod yn ymddeol o'r gamp.

Cyhoeddodd ei thîm, Seattle Reign, y bydd ei gyrfa chwarae yn dod i ben ar ddiwedd y tymor, ar ôl 13 o flynyddoedd gyda'r clwb, gan ddweud ei bod "nid yn unig un o'r chwaraewyr gorau yn hanes y gynghrair yng ngogledd America, ond un o'r rhai mwyaf dylanwadol yn hanes y gêm".

Ymddeolodd o chwarae'n rhyngwladol fis Hydref y llynedd, ar ôl 165 cap a 48 gôl – y nifer fwyaf i unrhyw chwaraewr arall yn hanes y gêm yng Nghymru.

Mae hi'n cael ei hystyried yn un o sêr pêl-droed merched yn fyd-eang. Un sydd wedi cyd-chwarae gyda hi yw'r sylwebydd a chyn-ymosodwr Cymru, Gwennan Harries, sydd yn falch fod Fishlock yn cael y clod mae hi'n ei haeddu, meddai.

"Yn sicr o ran pêl-droed Cymru, mae hi wedi cario'r fflag ar draws y byd, mae hi wedi ennill pencampwriaethau, mae hi wedi ennill tlysau mewn cymaint o wledydd, ac mae hi wir wedi ysbrydoli gymaint o chwaraewyr ar draws y byd gyda'r ffordd mae hi'n chwarae.

"Ond y ffordd mae hi'n arwain y tîm, y ffordd mae hi'n gweld y gêm ac yn amlwg yn dechnegol, gymaint o agweddau mor gadarnhaol i'w gêm hi.

"Mae'n siom fawr bod y diwrnod wedi dod, ond chwarae teg, i rywun i fynd at oedran o 39 a dal yn chwarae ar y lefel ucha', mae'n dweud popeth am ei chymeriad hi, ond mwy nag unrhywbeth, am ei safon hi."

Yn ôl Harries ar Dros Frecwast ar BBC Radio Cymru, mae lwc yn chwarae rhan yng ngyrfa chwaraewyr i ryw raddau, wrth osgoi anafiadau rhy ddrwg. Ond roedd hi wedi gweld cystal oedd Fishlock yn edrych ar ôl ei hun, er mwyn sicrhau bod ei chorff yn y cyflwr gorau posib.

"Dwi'n cofio o'dd hi'n chwarae draw yn Awstralia hefyd ar un adeg – i ddod nôl i chwarae i Gymru'n gyson, mae'r ffordd mae hi wedi edrych ar ôl ei hun oddi ar y cae yn dweud cyfrolau am pa mor broffesiynol yw hi, a pha mor bwysig oedd e iddi hi i fod ar ei gorau i bob clwb, ond mwy nag unrhywbeth, i Gymru.

"A 'sai'n credu bod llwyth o chwaraewyr yn gallu para at yr oedran mae hi nawr ar y lefel uchaf oll heb fod mor broffesiynol â mae hi."

Fis Tachwedd mae'r tymor pêl-droed yn dod i ben yn UDA, felly mae ychydig o fisoedd ar ôl i Fishlock barhau i chwarae ar y lefel uchaf a gadael ei gwaddol ar dîm Seattle Reign.

"Fydd hi'n benderfynol o ennill draw fan'na, dwi'n gwybod hynny. Un gair i ddisgrifio Jess yw person cystadleuol iawn.

"Jest gorffen yn chwarae ac yn mwynhau, gyda gwên ar ei hwyneb, dim anafiadau, yn helpu pawb arall o'i chwmpas hi ac yn helpu i ddatblygu rhai ifanc dwi'n siŵr."

Felly beth fydd yr her nesaf i gyn-chwaraewr sydd wedi gwneud gymaint dros y gamp yn genedlaethol a rhyngwladol?

"Pwy a ŵyr gyda Jess. Mae wastad rhyw fath o gynllun gyda hi, ond wedyn mae'r cynllun yn newid ar ôl chwe mis. Mae hi 'di sôn am lwyth o bethau gwahanol, so fi ddim cweit yn siŵr yn beth union fydd hi'n mynd mewn i.

"Ond fydd hi'n cael rhyw fath o ddylanwad mawr o fewn y byd pêl-droed, yn sicr – mae hi 'di 'neud e ar y cae, ac fydd hi bendant moyn 'neud e oddi ar y cae hefyd."

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.