ඉරානය සමඟ ඇති සතුරුකම් 'මුළුමනින්ම අවසන් කිරීම' සඳහා සාකච්ඡා පැවැත්වූ බව ට්රම්ප් පවසයි
ඡායාරූප මූලාශ්රය, Getty Images
මැද පෙරදිග ගැටුමට " සර්ව සම්පූර්ණ සහ මුළුමනින්ම වන විසඳුමක්" පිළිබඳ "ඵලදායී සංවාද" පැවැත් වූ බව ඇමෙරිකානු ජනාධිපති ඩොනල්ඩ් ට්රම්ප් පවසයි.
"ඉරාන බලාගාර සහ බලශක්ති යටිතල පහසුකම්වලට එරෙහි සියලු ප්රහාර දින පහකට කල් දමන" බව ද ඔහු පවසයි.
TruthSocial හි පළ කරන ලද සටහනක, ඇමෙරිකා එක්සත් ජනපදයේ ජනාධිපතිවරයා මෙලෙස පවසයි:
"පසුගිය දින දෙක තුළ ඇමරිකා එක්සත් ජනපදය සහ ඉරානය අතර, මැද පෙරදිග අපගේ සතුරුකම් පිළිබඳ සම්පූර්ණ විසඳුමක් සම්බන්ධයෙන් ඉතා හොඳ සහ ඵලදායී සංවාද පවත්වා ඇති බව මම සතුටින් වාර්තා කරමි.
"මෙම ගැඹුරු සහ සවිස්තරාත්මක සංවාද මෙම සතිය පුරා දිගටම පවතිනු ඇත, අඛණ්ඩ රැස්වීම් සහ සාකච්ඡාවල සාර්ථකත්වයට යටත්ව ඉරාන බලාගාර සහ බලශක්ති යටිතල පහසුකම්වලට එරෙහිව ඕනෑම සහ සියලුම හමුදා ප්රහාර දින පහක කාලයක් සඳහා කල් දැමීමට මම යුද දෙපාර්තමේන්තුවට උපදෙස් දී ඇත්තෙමි. මෙම කාරණය කෙරෙහි ඔබේ අවධානයට ස්තූතියි! ජනාධිපති ඩොනල්ඩ් ජේ. ට්රම්ප්"
ට්රම්ප්ගේ ප්රකාශයෙන් පසු දැවැන්ත මූල්ය වෙනස්කම් කිහිපයක්
මැදපෙරදිග සතුරුකම් නතර කිරීමට ඉරානය සමග ඵලදායී සංවාද පවත්වා ඇති බව ඇමෙරිකා එක්සත් ජනපද ජනාධිපති ඩොනල්ඩ් ට්රම්ප් පැවසීමෙන් පසු ගෝලීය වෙළඳපොළේ වෙනස්කම් කිහිපයක් වාර්තා විය.
බ්රෙන්ට් බොරතෙල් බැරලයක මිල 13% කින් පහත වැටී ඩොලර් 96 ක් පමණ වී තිබේ. FTSE 100 දර්ශකය දැන් 0.5% කින් ඉහළ ගොස් ඇති අතර එය කලින් 2% කට වඩා පහත වැටී ඇත. ගෑස් මිල තාපයකට පැන්ස 159 සිට පැන්ස 139 දක්වා පහත වැටී ඇත.
මීට පෙර 5.121% දක්වා ඉහළ ගොස් තිබූ වසර 10ක එක්සත් රාජධානියේ රජයේ බැඳුම්කරවල ප්රතිලාභය දැන් 4.89% දක්වා පහත වැටී ඇත - එය දිනයේ ආරම්භයට වඩා අඩු වී තිබේ.
ට්රම්ප් 'පසුබැස්සා' - ඉරාන IRGC අනුබද්ධ ප්රවෘත්ති ඒජන්සිය පවසයි
"ට්රම්ප් සමඟ සෘජු හෝ වක්ර සම්බන්ධතාවක් නැති" බව නම් නොකළ ඉරාන මූලාශ්රයක් උපුටා දක්වමින් ඉරානයේ ඉස්ලාමීය විප්ලවවාදී ආරක්ෂක බලකායට (IRGC) අනුබද්ධ ඉරානයේ ෆාර්ස් ප්රවෘත්ති ඒජන්සිය පවසයි.
"අපගේ ඉලක්කවලට බටහිර ආසියාවේ සියලුම විදුලි බලාගාර ඇතුළත් වන බව ඇසීමෙන් පසු, ඔහු පසුබැස ගියා" යනුවෙන් එම මූලාශ්රය උපුටා දක්වමින් ඉරානයේ ෆාර්ස් ප්රවෘත්ති ඒජන්සිය පවසා සිටියි.
