ඉන්ධන නිකුත් කිරීම යළිත් QR ක්‍රමය යටතේ: පෙර ලියාපදිංචි වී සිටි සහ අලුතින් ලියාපදිංචි වන්නන් දැන ගත යුතු කරුණු

ඡායාරූප මූලාශ්‍රය, Getty Images

    • Author, බීබීසී සිංහල
  • කියවීමේ කාලය: මිනිත්තු 4

'ඉන්ධන සංචිත ප්‍රවේශම් කර ගැනීමේ අරමුණින්' පසුගිය රජය සමයේ හඳුන්වා දුන් QR ක්‍රමය අද සිට (මාර්තු 15) නැවතත් ක්‍රියාවට නැංවීමට බලශක්ති අමාත්‍යංශය පියවර ගෙන තිබේ.

ඒ අනුව, මාර්තු 15 වන දා උදෑසන 06.00 සිට බලපැවැත්වෙන පරිදි ඉන්ධන මිල දී ගැනීමේදී QR ක්‍රමය බලපැවැත්වෙන බව බලශක්ති අමාත්‍යංශය නිවේදනය කර තිබේ.

පසුගිය රජය සමයේ ඉන්ධන නිකුත් කිරීමට හඳුන්වා දුන් QR කේතය (වාහනය සහ දුරකතන අංකය වෙනස් වී නැතිනම්) ඉන්ධන ලබා ගැනීමට වලංගු වන අතර අලුතින් මිල දී ගන්නා ලද වාහන ලියාපදිංචි කිරීමට ද අවස්ථාව ලබා දී ඇත.

QR කේතය ලබා ගන්නේ කොහොම ද?

පෙර ලියාපදිංචිකරුවන්ගේ වාහනයේ හිමිකාරිත්වය හෝ දුරකතන අංකය වෙනස් වී නොමැති නම්, https://fuelpass.gov.lk/ වෙබ් අඩවියෙන් ඔබට හිමි QR කේතය ඩවුන්ලෝඩ් කර ගත හැකි ය.

පෙර භාවිත කළ QR කේතය ඔබ සතුව ඇත්නම් එය නැවත භාවිත කළ හැකි ය.

වාහනයේ හිමිකාරිත්වය හෝ දුරකතන අංකය වෙනස් වී ඇති නම්, https://fuelpass.gov.lk වෙබ් අඩවියෙන් ඔබ නැවත ලියාපදිංචි විය යුතු ය.

පෙර QR කේතය ලියාපදිංචි නොකළ සහ මෝටර් රථ ප්‍රවාහන දෙපාර්තමේන්තුවේ (RMV) අලුතින් ම ලියාපදිංචි කරන ලද වාහන සඳහා ද එම වෙබ් අඩවියට පිවිස ලියාපදිංචි විය යුතු බවත් එම නි‍වේදනයේ සඳහන් කර ඇත.

කෘෂි කර්මාන්ත කටයුතු, ධීවර කටයුතු, පාසල් ප්‍රවාහන සහ කාර්යාල ප්‍රවාහන කටයුතු ආදිය සඳහා ඉන්ධන නිකුත් කිරීම සම්බන්ධයෙන් ගැටලු මතුව ඇතැයි වාර්තා වේ.

Skip වැඩිපුරම කියැවූ and continue reading
වැඩිපුරම කියැවූ

End of වැඩිපුරම කියැවූ

මේ අතර, රජයේ ප්‍රවෘත්ති අධ්‍යක්ෂ ජනරාල්වරයා පවසන්නේ, 'වාහන හෝ දුරකතන අංක වෙනස් වී ඇති අයත්, අලුතින් වාහන මිල දී ගත් අයත් මුහුණ දෙන ගැටලු හඳුනාගෙන ඒවා හැකි ඉක්මනින් නිරාකරණය කිරීමට කටයුතු කරමින් පවතින,' බව ය.

'එමෙන් ම අත්‍යවශ්‍ය සේවාවන්ට, කෘෂිකර්ම කටයුතුවලට ඉන්ධන සැපයීම ඇතුළු විශේෂිත ගැටලු සම්බන්ධයෙන් සවස් වරුවේ තීරණ ගෙන අද දිනය තුළ ම ඒවාට විසඳුම් ලබාදීමට කටයුතු කරනු ඇති' බවට ද රජයේ ප්‍රවෘත්ති අධ්‍යක්ෂ ජනරාල්වරයා විශ්වාසය පළ කරයි.

සතියකට ලැබෙන ඉන්ධන ප්‍රමාණය කොපමණ ද?

බලශක්ති අමාත්‍යංශය නිවේදනය කර ඇති පරිදි, බස් රථ සඳහා ලීටර් 60ක්, යතුරු පැදි සඳහා ලීටර් 05ක්, වෑන් රථ සඳහා ලීටර් 40ක් සහ මෝටර් රථවලට ලීටර් 15ක් ලෙස QR ක්‍රමය හරහා සතියකට ඉන්ධන ලබා ගැනීමට හැකි ය.

ඊට අමතරව මෝටර් ලොරි සඳහා ලීටර් 200ක්, ඉඩම් වාහනවලට ලීටර් 25ක්, මෝටර් ත්‍රිරෝද රථවලට ලීටර් 15ක්, විශේෂ කාර්ය වාහන සඳහා ලීටර් 40ක් සහ ක්වොඩ්‍රිසයිකල් සඳහා ලීටර් 05ක් ලෙස සතියක කාලයකට ඉන්ධන ලබා ගැනීමට කටයුතු සලසා තිබේ.

එමෙන් ම පෞද්ගලික මගී ප්‍රවාහන බස් රථ සඳහා ශ්‍රී ලංකා ගමනාගමන මණ්ඩලය මගින් ඉන්ධන නිකුත් කරන බව ද බලශක්ති අමාත්‍යාංශය නිකුත් කරන ලද නිවේදනයේ දැක්වේ.

මෙලෙස ඉන්ධන ලබා ගැනීම සඳහා පසුගිය රජය සමයේ හඳුන්වා දෙන ලද QR කේතය වලංගු වන අතර එය ලබා ගැනීමට සහ අලුත් වාහන ලියාපදිංචි කිරීමේ ක්‍රමය ද බලශක්ති අමාත්‍යංශය සිය නිවේදනයේ සඳහන් කර ඇත.

QR ගැන කැබිනට් මාධ්‍ය ප්‍රකාශකවරයා පැවසුවේ කුමක් ද?

බලශක්ති අමාත්‍යංශය නිකුත් කළ නිවේදනයේ සඳහන්ව ඇත්තේ, මැදපෙරදිග පවතින යුදමය තත්ත්වය හේතුවෙන් දිනෙන් දින ඉන්ධන සැපයුම් මාර්ග අඩපණ වෙමින් තිබීමත්, රට තුළ ඉන්ධන ඉල්ලුම අසාමාන්‍ය ලෙස ඉහළ යමින් තිබීමත් හේතුවෙන් රට තුළ පවතින ඉන්ධන සංචිත ප්‍රවේශම් කරගතව යුතුව ඇති බැවින් නැවත එම ක්‍රමය ක්‍රියාවට නංවන බව ය.

කෙසේ වෙතත්, කැබිනට් මාධ්‍ය ප්‍රකාශක, නලින්ද ජයතිස්ස ඇමතිවරයා මාර්තු 10 වන දා පැවති අමාත්‍ය මණ්ඩල තීරණ දැනුම් දීමේ මාධ්‍ය හමුවේදී කියා සිටියේ, QR ක්‍රමය හරහා ඉන්ධන පරිභෝජනය අඩු වූ බවට සංඛ්‍යා ලේඛනවල සඳහන් නොවන බව ය.

"QR එක හැදුවේ තියෙන ටික බෙදා හැරීමට මිසක් පරිභෝජනය අඩු කර ගන්න නෙමෙයි. එකෙන් වුණේ පෝලිම්වල ඉඳන් තෙල් ගහන එක නැති වුණා පමණ යි, පරිභෝජන සංඛ්‍යා ලේඛනවලින් ඒ මොහොතේ පැවති තෙල් පරිභෝජනයේ අඩුවක් සිද්ධ වුණේ නැහැ."