Pàirc-chluiche ann am Port Rìgh an làmhan na coimhearsnachd

Sanas air geata aig Pàirc an Rìgh Seòras V am Port Rìgh a' sireadh taic a' phobaill gus am fearann a cheannach

Bha an ceann-là airson maoineachadh poblach fhaighinn airson a' phàirc a cheannach a' tighinn gu math dlùth

Dh'innis Urras Coimhearsnachd Phort Rìgh agus a' Bhràighe san Eilean Sgitheanach gun deach aca air faighinn seachad air na dùbhlain laghail is maoineachaidh airson Pàirc an Rìgh Seòras V a cheannach agus a chur fo shealbh a' phobaill.

Bha dìreach gu deireadh a' Mhàirt aca gus a h-uile càil a reiteach.

Chaidh an £35,000 a chosg an talamh a thogail leis a' choimhearsnachd agus le maoineachadh bho Stòras Fearainn na h-Alba.

Tha cuideachd iomairt ann far am faigh companaidhean agus buidhnean ionadail a thug seachad taic ionmhais sanasachd fad bliadhna air feansaichean na pàirce.

Thug cathraiche an urrais, Donnie MacNeacail, taing don fheadhainn a chuidich iad, gu h-àraid sgioba ball-cois Phort Rìgh Fo aois 15 a thog faisg air £4,000 le bhith a' dol timcheall cheann a tuath an eilein air na baidhseagalan aca.

"'S e leasachadh mòr a th' ann airson a h-uile duine a bha an sàs ann, agus 's e a' chiad cheum cudromach sna planaichean againn Ceàrnag na Camanachd a leasachadh don choimhearnsachd," thuirt e.

Bha an làrach air tè de 471 pàircean-cluiche coimhearsnachd air an deach an t-ainm sin a thoirt an dèidh bàs an Rìgh ann an 1936.

Bha e uair mar phàirt de dh'oighreachd Chlann Dòmhnaill agus bha e mar phàirt de na 23,000 acair a reic iad ri Fearann Eilean Iarmain sna 1970an.

Dh'fhàg cho aosta 's a bha cuid de na pàipearan seilbh am pròiseas laghail na bu thoinnte agus dh'fheumte sin a rèiteach ron 31mh den Mhàrt 2026, an ceann-là airson maoineachadh Stòras Fearainn na h-Alba fhaighinn.

Fhuair iad taic bho Fhearann Eilean Iarmain airson sin a dhèanamh.

Thuirt Lucilla Noble às leth na h-oighreachd sin gun robh i an dòchas gun toireadh an làrach "buannachd mhòr don choimhearsnachd am Port Rìgh agus gu bheil i a' guidhe gach soirbheachas don urras le an cuid phlanaichean".

Tha an t-urras cuideachd ag amas air an ionad coimhearsnachd a cheannach mar phàirt den phlana mhòr aca Ceàrnag na Camanachd a dhèanamh na ghoireas a chùm maith na coimhearsnachd agus chompanaidhean ionadail.