Comhairlichean a' cur an aghaidh sgeama haidro ann an Loch Abar

Cho-dhùin comhairlichean air Ghàidhealtachd gearan a thogail an aghaidh phlanaichean airson pròiseict mhòir haidro aig Loch Cuaich ann an Loch Abar.

Tha a' chompanaidh Fearna PSH Eta ag iarraidh seann sgeama haidro a chaidh a thogail sna 1950an ath-fheumachadh mar ghoireas haidro le stòras pumpte.

Ann an aithisg, thuirt oifigich na comhairle gu bheil dragh ann mun bhuaidh a bheireadh an leasachadh air cruth na tìre agus fiadh-bheatha, a thuilleadh air trafaig obrach a bhith air rathaidean beaga dùthchail.

Tha an luchd-leasachaidh ag ràdh gur e "briseadh-dùil" a th' anns a' cho-dhùnadh.

'S ann aig Riaghaltas na h-Alba a tha am facal mu dheireadh air cead dhan phròiseact.

Tha comhairlean coimhearsnachd ionadail, Sreap Alba agus RSBP na h-Alba cuideachd air dragh a thogail.

Dh'iarr Riaghaltas na h-Alba air Comhairle na Gàidhealtachd an seasamh aca air a' phròiseact innse, agus bheachdaich comataidh dealbhachaidh a' chinn a deas air na molaidhean Diciadain.

Ann an aithisg, thuirt oifigich nach robh planaichean gu leòr ann mu choinneimh dèiligeadh ri buaidh a' phròiseict air fiadh-bheatha agus geòlas sa bheil ùidh shònraichte.

Thuirt iad cuideachd gun toireadh e "droch bhuaidh nach beag" air sgìrean a tha fo dhìon, Sgìre Chruth-tìre Shònraichte Mhùideirt, Mhòrair agus Ghlinn Seile nam measg.

Chaidh moladh do chomhairlichean gearan a thogail.

Thuirt an luchd-leasachaidh gun deach an sgeama a dhealbh "gu cùramach agus gu faiceallach" 's gu bheil e a' toirt a-steach prògram meudachaidh bith-iomadachd.

"Leis cho cudromach 's a tha am pròiseact gu sraiteidseach agus a chomas stòras cumhachd critigeach san ùine fhada a thoirt seachad aig ìre nàiseanta, 's aig a' cheart àm a' cruthachadh chothroman eaconomach nach beag dhan sgìre, 's e briseadh-dùil a th' ann gu bheil buill na comhairle air co-dhùnadh cur na aghaidh," thuirt labhraiche às leth Fearna PSH Eta.

"Ach, 's ann aig ministearan Riaghaltas na h-Alba a tha an co-dhùnadh deireannach, agus tha sinn fhathast fo ghealltanas am pròiseact adhartachadh 's a thoirt gu buil."