Dòchas gum bi Pàirc an Rìgh Seòras V aig "cridhe na coimhearsnachd"
- Air fhoillseachadh
Tha dùil gun tèid Pàirc an Rìgh Seòras V am Port Rìgh a cheannach leis a' choimhearsnachd is iad a-nise air an t-airgead air fad a dh'fheumas iad a chruinneachadh.
'S iad Urras Coimhearsnachd Phort Rìgh is a' Bhràighe a tha air cul a' ghnothaich is iad air £35,000 a thogail.
'S ann le Fearann Eilean Iarmain a tha an t-àite an-dràsta.
A thuilleadh air pàirc spòrs, tha cuideachd pàirc cluiche do chloinn ann.
Tha an t-urras ag ràdh gu bheil cothroman mòra ann na goireasan a leasachadh agus feum nas fheàrr a dhèanamh den phàirc.
"Cha deach coimhead às dèidh na pàirce mar a bha còir," dh'innis oifigear pròiseict Urras Coimhearsnachd Phort Rìgh is a' Bhràighe, Ailig MacLeòid.
"Tha e aig cridhe na coimhearsnachd a thaobh far a bheil e is mar a ghabhadh a chur gu feum.
"Tha an fhèill àiteachais an seo a h-uile bliadhna ach tha cothrom ann tòrr a bharrachd a dhèanamh airson na coimhearsnachd agus ann an dòigh a tha seasmhach.
"Tha sinn airson is gum bi e air a ghlèidheadh mar a bu chòir is gum bi e gu buannachd na coimhearsnachd".
Thug oifigear ionmhais an urrais, Iona NicDhòmhnaill, taing dhan choimhearsnachd airson gach taic a thaobh am fearann a cheannach is i ag ràdh gun deach an t-airgead a thogail nas luaithe na bha dùil.
Tha tòrr bheachdan air tighinn thuca cuideachd, thuirt i, a thaobh na bu chòir dèanamh leis a' phàirc.
Nam measg tha sgrìob-ruith, no running track, a chur timcheall air is cothrom ann iomadh spòrs a chluich.
Ach tha Iona ag ràdh gur e an rud as bunaitiche gum bi e ann an làmhan nan daoine.
"Dhomhsa tha e uabhasach cudromach gum faigh a' choimhearsnachd cothrom a bhith a' dèanamh co-dhùnadh air na bhios a' tachairt aig an àite seo.
"Tha mi a' smaoineachadh gum bu chòir dhaibh a bhith pròiseil gu bheil seo aca is a-nise - tha sinn an dòchas - gum bi cothrom aca co-dhùnadh a dhèanamh air na thig às.
Ged is e ceum mòr a tha seo dhan urras, tha iad mar-thà a' cur romhpa fhèin barrachd a dhèanamh.
Tha plana leasachaidh ann gus tuilleadh den fhearann timcheall air a' phàirc a cheannach anns na beagan bhliadhnaichean ri tighinn.
Am measg nam planaichean sin, tha smachd fhaighinn am measg eile air làrach far an robh amar-snàimh uaireigin, is làrach bheag spòrs eile.
Anns a' chiad dol a-mach ge-tà, 's ann a tha aire na buidhne air Pàirc an Rìgh Seòras V fhèin.
"Bha mi a' smaoineachadh 's dòcha gum biodh seòrsa de dh'fhaochadh oirnn," thuirt Iona NicDhòmhnaill.
"Ach tha mi a' smaoineachadh ann an dòigh gu bheil an obair dìreach a' tòiseachadh."
