RNLI yn dychwelyd i rai o draethau Cymru cyn torfeydd gwyliau Pasg

Traeth Porthcawl a char RNLIGetty Images

Bydd achubwyr bywyd yr RNLI yn dychwelyd i oruchwylio rhai o draethau Cymru ddydd Sadwrn wrth iddyn nhw ddisgwyl cynnydd yn nifer yr ymwelwyr yn ystod gwyliau Pasg.

Cafodd y gwasanaeth ei gyflwyno yng Nghymru yn Sir Benfro yn 2008, ac erbyn hyn maen nhw'n bresennol ar 35 o draethau ar draws y wlad yn ystod yr haf.

Mae dros 300 o fywydau wedi eu hachub ers hynny meddai'r elusen ac maen nhw'n amcangyfrif bod dros chwe miliwn o ddigwyddiadau wedi'u hatal.

Dywedodd Tom John, sy'n achubwr bywyd yn Langland, Abertawe, eu bod "eisiau i bobl gael hwyl ond i wneud hynny'n ofalus".

Mae Tom yn annog pobl i nofio lle mae'r baneri melyn a choch

Bydd achubwyr bywyd yn dychwelyd i naw o draethau'r de-orllewin dros y gwyliau Pasg cyn i bawb ddychwelyd yn llawn yn yr haf.

Mi fydd yr achubwyr bywyd yn bresennol yn y traethau canlynol:

  • Bae Whitmore, y Barri: dydd Gwener, 3 Ebrill - dydd Llun, 6 Ebrill

  • Sandy Bay, Porthcawl: dydd Gwener, 3 Ebrill - dydd Llun, 6 Ebrill

  • Trecco Bay, Porthcawl: dydd Gwener, 3 Ebrill - dydd Llun, 6 Ebrill

  • Langland, Abertawe: dydd Sadwrn, 28 Mawrth - dydd Llun, 6 Ebrill

  • Caswell, Abertawe: dydd Sadwrn, 28 Mawrth - dydd Llun, 6 Ebrill

  • Little Side, Aberafan: dydd Gwener, 3 Ebrill - dydd Llun, 6 Ebrill

  • Aberafan: dydd Gwener, 3 Ebrill - dydd Llun, 6 Ebrill

  • Porth Mawr, Sir Benfro: dydd Sadwrn, 28 Mawrth - dydd Llun, 6 Ebrill

  • De Dinbych-y-pysgod: dydd Gwener, 3 Ebrill - dydd Llun, 6 Ebrill

Mae Tom John, achubwr bywyd yn Langland yn annog pobl sy'n mynd i'r traeth i nofio i fynd "i'r rhai gydag achubwyr bywyd, a nofiwch lle mae'r fflagiau melyn a coch".

"Ni'n dod 'nôl ar y traeth penwythnos yma i gadw pobl yn ofalus ar y môr.

"Ni isie pobl gael hwyl ond i bobl wneud hynna'n ofalus," meddai.

"Mae amodau'n gallu newid yn sydyn iawn."

Achubwyr bywyd

Cafodd yr RNLI ei gyflwyno yng Nghymru yn Sir Benfro yn 2008

Yn y gogledd orllewin daeth cadarnhad gan Gyngor Gwynedd bod ganddyn nhw wardeiniaid yn bresennol ar 10 o draethau'r sir am gyfnod yn ystod y flwyddyn.

Ond, ni fydd warden ar bob un o'r 10 traeth erbyn y Pasg gan fod dyddiadau cychwyn yn amrywio rhwng mis Ebrill a mis Mehefin.

Y 10 traeth yw:

  • Dinas Dinlle

  • Nefyn

  • Aberdaron

  • Abersoch

  • Pwllheli

  • Cricieth

  • Morfa Bychan

  • Abermaw

  • Tywyn

  • Aberdyfi

Mae Rheolwr Cyffredinol Achubwyr Bywyd RNLI, Peter Dawes yn dweud bod "traethau'n llefydd diogel" diolch i'w swyddogion.

Ychwanegodd mai atal digwyddiadau ydy 95% o waith achubwyr bywyd a'u bod yn cadw pobl yn ddiogel drwy eu "haddysgu am ddiogelwch yn dŵr a sut i adnabod peryglon cyn i ddamweiniau ddigwydd".

"Mae achubwyr bywyd RNLI presennol a rhai'r gorffennol wedi cadw miliynau o ymwelwyr yn ddiogel dros y 25 mlynedd diwethaf a byddan nhw'n parhau i wneud hynny am flynyddoedd i ddod."

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i cymrufyw@bbc.co.uk neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.

Pynciau cysylltiedig