ఆర్టెమిస్ 2: చంద్రుడి దిశగా వెళుతూ తీసిన 5 ఫోటోల్లో భూమి ఎలా ఉందో చూశారా?

చంద్రుడి దిశగా వెళుతున్న ఆర్టెమిస్ 2 సిబ్బంది, అంతరిక్షం నుంచి తీసిన భూమి హై రిజల్యూషన్ చిత్రాలను నాసా విడుదల చేసింది.

మిషన్ కమాండర్ రీడ్ వైజ్‌మన్ అద్భుతమైన చిత్రాలను తీశారని నాసా ప్రకటించింది.

"హలో వరల్డ్" పేరుతో ఈ చిత్రాలను నాసా పోస్ట్ చేసింది.

తొలి చిత్రంలో రెండు ధ్రువాల దగ్గర ఆకుపచ్చ అరోరాతో కూడిన చట్రంలో విశాలమైన అట్లాంటిక్ మహాసముద్రం కనిపిస్తోంది.

కుడివైపు దిగువన ప్రకాశవంతంగా కనిపిస్తున్న గ్రహం శుక్రుడని నాసా తెలిపింది.

శుక్రవారం తెల్లవారుజామున ఆర్టెమిస్ 2 సిబ్బంది ఈ చిత్రాలను తీశారు.

2 లక్షల మైళ్లకు పైగా దూరంలో ఉన్న చంద్రుడి వద్దకు ప్రయాణంలో భాగంగా ఓరియన్ అంతరిక్ష నౌకను భూ కక్ష్య నుంచి బయటకు తీసుకువెళ్లారు.

1972 తర్వాత మనిషి భూమి కక్ష్యకు వెలుపల ప్రయాణించడం ఇదే మొదటిసారి. ఆర్టెమిస్2 సిబ్బంది ఏప్రిల్ 6న చంద్రుని అవతలివైపు చుట్టూ ప్రయాణించి ఏప్రిల్ 10న భూమికి తిరిగి రానున్నారు.

ఓరియన్ స్పేస్ క్రాఫ్ట్ ప్రధాన ఇంజన్ మండించిన తర్వాత ఆర్టెమిస్ 2 సిబ్బంది కిటికీలకు అతుక్కుపోయి ఫోటోలు తీశారని మిషన్ స్పెషలిస్ట్ జెరెమీ హాన్సెన్.. హ్యూస్టన్‌లోని మిషన్ కంట్రోల్‌కు తెలిపారు.

"చంద్రుని వెలుగుతో ప్రకాశిస్తున్న భూమి చీకటి భాగం అందంగా కనిపిస్తోంది" అని ఆయన అన్నారు.

అంతరిక్షంలోకి చూడాలనే వ్యోమగాముల ఉత్సాహం వల్ల కిటికీలు మురికిగా మారడంతో వాటిని ఎలా శుభ్రం చేయాలనే సమాచారం కోసం వైజ్‌మాన్ హ్యూస్టన్‌లోని మిషన్ కంట్రోల్‌ను సంప్రదించారు.

భూమిపై అంతటా దాదాపుగా చీకటి అలముకున్నప్పుడు రాత్రివేళ విద్యుత్ దీపాలు మినుకుమినుకుమంటున్నట్లు చూపిస్తున్న మరో చిత్రాన్ని నాసా పోస్ట్ చేసింది.

ఇది ప్రస్తుతం భూమిని, 1972లో చంద్రుడిపై అడుగు పెట్టినప్పుడు అపోలో 17 బృందం తీసిన ఫోటోను పక్కపక్కన పెట్టి పోల్చి చూపించింది.

ఈ రెండు ఫోటోలను పోలుస్తూ "54 ఏళ్లలో మనం ఎంతో సాధించాం, కానీ ఒక్క విషయం మాత్రం మారలేదు. అంతరిక్షం నుండి చూస్తే మా ఇల్లు అద్భుతంగా కనిపిస్తుంది!" అని రాసింది.

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,  ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)