Apêl wedi marwolaeth bachgen, 16, mewn gwrthdrawiad yng Nghaerdydd

Mae bachgen 16 oed wedi marw yn dilyn gwrthdrawiad rhwng car a seiclwr yng Nghaerdydd.

Cafodd Heddlu'r De eu galw i wrthdrawiad rhwng SsangYong Tivoli coch a seiclwr ger cyffordd Heol Penarth a Heol Clare am 12:27 ddydd Mercher.

Dywedodd y llu bod y seiclwr, bachgen 16 oed o Grangetown, wedi marw yn y fan a'r lle.

Mae teulu'r bachgen yn cael cefnogaeth gan swyddogion arbenigol.

Mae gyrrwr y car yn cynorthwyo ymholiadau'r heddlu wrth i'w hymchwiliad barhau.

Dywedodd y Ditectif Sarjant Debbie Hobrough, sy'n arwain yr ymchwiliad: "Mae ein hymchwiliad i'r digwyddiad trist a thrasig hwn yn parhau ac rydym yn gofyn am gymorth y cyhoedd wrth i ni geisio deall yr hyn a ddigwyddodd."

Mae'r cyffordd lle ddigwyddodd y gwrthdrawiad yn un prysur, meddai, gan annog unrhyw un sydd ag unrhyw wybodaeth neu delweddau o'r digwyddiad i gysylltu â nhw.

Ychwanegodd y dylai pobl ystyried yr effaith ar deulu'r dioddefwr cyn rhannu lluniau o'r digwyddiad ar-lein.