Sean is òg ag iomairt còmhla an Cille Chòmhain

Tha muinntir a' bhaile as fhaide siar air tìr-mòr Bhreatainn a' togail airgid airson bùth agus stèisean-peatrail a thogail dhaibh fhèin an dèidh na goireasan a chall.

Thòisich muinntir Chille Chòmhain ann an Àird nam Murchan iomairt airson goireasan ùra a thogail don choimhearsnachd an dèidh mar a dhùin a' bhùth, san robh cuideachd Oifis a' Phuist agus stèisean-peatrail, san Dàmhair an-uiridh.

Thug Oighreachd Chille Chòmhain seachad an talamh saor an asgaidh agus tha a' choimhearsnachd a-nis a' togail airgid gus na goireasan ùra a thogail.

Ged a tha Cille Chòmhain suidhichte air tìr-mòr tha na goireasan as fhaisge ann an Tobar Mhoire an Eilean Mhuile.

Thuirt aon de luchd-còmhnaidh a' bhaile, Alasdair "Pinkie" Camshroin: "Gheibheadh tu airgead sa phost office is tha fear an Àth Tharracail agus an Tobar Mhoire, ach ma tha thu a' fàs sean chan eil sin cho furasta."

An-uiridh ge-tà chaidh an t-aiseag-chàraichean a thoirt air falbh airson greis agus bha aig daoine ri dràibheadh gu Sròn an t-Sìthein gus peatral fhaotainn, turas a bheir mu dhà uair de thìde gu leth a' dol ann agus air ais.

Bidh muinntir an àite - sean is òg - a' cruinneachadh gu cunbhalach airson biadh a ghabhail còmhla an ionad-coimhearsnachd Chille Chòmhain.

'S e cothrom a th' ann dhaibh cluinntinn mu mar a tha a' dol dhan phròiseact gus bùth is stèisean-peatroil ùra a thogail dìreach ri taobh an ionaid.

Rinn a' chlann dealbh mòr gus aire a thogail dhan iomairt.

Thuirt Rosie Curtis, Cathraiche Companaidh Leasachaidh Coimhearsnachd Àird nam Murchan an Iar: "Cho luath agus a gheibh sin cead-dealbhachaidh bidh spaid sa ghrunnd dà là as dèidh sin!"