Stevie Wonder di ọmọ orìlẹ̀èdè Ghana

Gbajumọ akọrin agbaye ni, Stevie Wonder ti di ọmọ orilẹede Ghana.

Aarẹ Nana Akufo fun Stevie Wonder ni iwe aṣẹ atidọmọonilu nibi ayẹyẹ kan to waye ni Jubilee House, ti i ṣe ileeṣẹ aarẹ orilẹede naa.

Stevie Wonder wa lorilẹede Ghana lọwọ yii pẹlu awọn ẹbi rẹ. Bi ọrọ si ti ṣe ri bayii, o fihan pe mọ orilẹede meji , Ghana ati Amẹrika ni Stevie.

Ṣẹṣẹ ni inu agba akọrin naa n dun pẹlu iwe aṣẹ ọmọ onilu ti wọn fun un naa. Ninu ọrọ rẹ, o ni, iyi nla ni orilẹede Ghana fun oun yii ati pe o ṣe atọna fun ifẹ ọkan oun lati ọjọ pipẹ wa lati ko ẹbi oun wa tẹdo si orilẹede naa.

Lọdun mẹta sẹyin, Stevie Wonder kede erongba rẹ lati wa tẹdo si orilẹede Ghana, lasiko to fi n ṣe ifọrọwerọ kan pẹlu Opray Winfrey. O ni idi erongba oun yii ko se lori gbọnmọgbọnmọ wahala lorilẹede Amẹrika ati lati lee ṣeto ọjọ ọla rere fun awọn arọmọdọmọ oun.

Ni ọdun 2019, ijọba orilẹede Ghana gbe eto kan kalẹ ti wọn pe ni ọdun idapada, ‘Year of Return Initiative’ lati ṣe koriya fun awọn ọmọ Afrika kaakiri agbaye lati wa tẹdo si orilẹede ọhun.

Lati igba naa, o le ni ọgọrun kan awọn ọmọ ilẹ Afrika lagbaye ti wọn ti fun ni iwe aṣẹ ọmọ onilu lorilẹede Ghana. Awọn kan ninu wọn ti wa tẹdo si orilẹede ghana, awọn miran si ti n gunle oniruuru akanṣe iṣẹ lorilẹede naa.