Путиннинг рейтинги тушиб кетаяпти, Қозоғистон ёқилғи экспортини тақиқлади, Ўзбекистон Беларусдан ер ижарага олмоқчи

Россия давлат социологик маркази ВЦИОМ кетма-кет олтинчи ҳафта давомида жамоатчиликнинг Президент Владимир Путинга бўлган ишончи пасайиб бораётганини қайд этаяпти.

ВЦИОМга кўра, 12 апрелда якунланган ҳафтада ўтказилган ёпиқ сўровда саволга жавоб берганларнинг 72 фоизи Россия раҳбарига аниқ ёки эҳтимол ишонишини айтган.

Бу кўрсаткич бундан олдинги ҳафтага солиштирганда 1,8 фоиз кам деганидир.

ВЦИОМ маълумотларига кўра, Путинга бўлган ишонч олтинчи ҳафта кетма-кет пасайиб келаяпти.

1 мартда якунланган ҳафтада бу кўрсаткич 77,5 фоизни ташкил этган. Декабр ойининг охирида, ВЦИОМга кўра, у янада юқори бўлиб, 80,9 фоизни ташкил қилган.

ВЦИОМнинг «давлат учун муҳим масалаларни ҳал этишда кимга ишонасиз?» деган очиқ саволига жавоблар ҳам россияликларнинг Путинга бўлган ишончи оз-оздан, аммо барқарор суръатда камайиб бораётганини кўрсатмоқда.

ВЦИОМ маълумотларига кўра, россияликларнинг Путиннинг президент сифатидаги фаолиятини маъқуллаши ҳам март ойининг охирги ҳафтасидан буён узлуксиз пасайиб келмоқда.

Аммо бундай хулоса Россия президент маъмурияти асосий мижозларидан бири ҳисобланадиган ФОМ сўров маркази маълумотларида акс этмаган, дея қайд этади хорижда жойлашган Meduza веб-нашри.

ВЦИОМ маълум қилишича, 12 апрелда якунланган ҳафтада ўтказилган сўровда қатнашганларнинг 66,7 фоизи Путиннинг фаолиятини «умуман олганда» маъқуллашини айтган.

Бу кўрсаткич 5 апрелда якунланган ҳафтада 67,8 фоиз, 29 ва 22 март ҳафталарида 70,1 фоиз, 15 мартда 72 фоиз, 8 мартда 72,9 фоиз ва 1 мартда 73,3 фоизни ташкил этган.

ФОМ маълумотларига кўра эса, феврал ойи ўртасидаги 80 фоиздан март ойи охирида 74 фоизга тушишдан сўнг, россияликларнинг Путиннинг президент сифатидаги фаолиятини маъқуллаши яна ошишни бошлаган ва 12 апрелда якунланган ҳафтада 76 фоизга етган.

ВЦИОМга кўра, россияликларнинг Путинга ишончи пасаётган бўлса-да, у ҳали ҳам Москва Украинага кенг кўламли бостириб киришдан олдинги даврга нисбатан юқорироқ.

2022 йил 20 февралда якунланган ҳафта учун ўтказилган ВЦИОМ сўровида ёпиқ савол бўйича бу кўрсаткич 67,2 фоизни ташкил этган эди. 2021 йил ёзида эса у айрим пайтларда 61,4 фоизгача тушган. Украинага бостириб киришдан сўнг бу кўрсаткич кескин ошган ва яқин вақтгача 70 фоиз охири – 80 фоиз боши атрофида сақланиб келган, айрим ҳолларда ўрта 70 фоизларга тушиб турган.

ВЦИОМ шунингдек, яқинда россияликларнинг Кремл назоратидаги «Ягона Россия» партиясини маъқуллаши ҳам пасайганини хабар қилди.

Meduza'нинг ёзишича, ВЦИОМ ва ФОМ сўнгги пайтларда ўзларининг ҳафталик сўровлари натижаларини одатдагидан кечроқ эълон қилмоқда.

Қозоғистон олти ойга ёқилғи экспортини тақиқламоқчи

Қозоғистон ёқилғи экспортини олти ойга тақиқлашга қарор қилди, деб хабар берди Ulysmedia.kz веб-нашри.

Хабарда айтилишича, Қостанай вилояти тадбиркорлар палатаси Қозоғистондан айрим нефт маҳсулотларини экспорт қилишга вақтинчалик тақиқ жорий этилганини маълум қилди.

Ушбу чора 2026 йил 21 майидан 21 ноябрга қадар амал қилади ва Евроосиё иқтисодий иттифоқига (ЕОИИ) аъзо давлатларга ҳам экспортни ўз ичига олади.

Хабар қилинишича, автомобил йўллари орқали бензин, дизел ёқилғиси ва айрим нефт маҳсулотларини экспорт қилиш тақиқланади.

Шу билан бирга, айрим истиснолар ҳам кўзда тутилади: мойлаш материаллари, завод томонидан ўрнатилган стандарт ёқилғи бакларидаги ёқилғи, илмий тадқиқотлар учун авиация ёқилғиси (тасдиқ ва ҳужжатлар тақдим этилган тақдирда), шунингдек, Қозоғистон ҳукумати рухсат берган гуманитар ёрдам.

Чегара ҳудудларида яшовчиларга стандарт баклардаги ёқилғи билан автомобилда чегарани суткасига бир мартадан ортиқ кесиб ўтишга рухсат берилмайди, дея қўшимча қилади сайт.

Ulysmedia.kz шунингдек, темир йўл орқали нефт маҳсулотларини экспорт қилиш ҳам тақиқланганини маълум қилди.

Бунда айрим истиснолар назарда тутилган: расман тасдиқланган етказиб бериш режалари бўйича бензин (аниқ товар кодлари), гуманитар ёрдам ёки табиий офатлар оқибатларини бартараф этиш ва фавқулодда ҳолатларга жавоб бериш доирасидаги нефт маҳсулотлари.

Аввалроқ Қозоғистон Энергетика вазирлиги мамлакатда ёқилғи ва мойлаш материалларининг етарли захиралари яратилганини маълум қилган эди.

Ўзбекистон Беларусдан ер ижарага олмоқчи

Ўзбекистон нашрларининг хабар қилишича, Ўзбекистон Беларусда йирик чорвачилик лойиҳаси учун қишлоқ хўжалиги ерларини ижарага олишни режалаштирмоқда.

Бу борадаги келишувга Ўзбекистон расмий ҳайъатининг Беларуснинг Витебск вилоятига ташрифи чоғида эришилган.

"Қашқадарё вилоятидан борган делегациянинг Витебск вилоятига ташрифи давомида 4000 гектар қишлоқ хўжалиги ерини узоқ муддатга ижарага олиш бўйича келишувга эришилди", дейилади хабарда.

Ижарага олинадиган Браслав, Шумилиновский ва Поставский туманларидаги ерларда қорамол боқиш мажмуаларини ташкил этиш режалаштирилган.

Дастлабки режага кўра, қорамол сонини 1000 бошга етказиш кўзда тутилган.

Бундан ташқари, Ўзбекистоннинг Asl Yuksalish Savdo компанияси Беларуснинг Dobronom супермаркетлар тармоғи билан ҳар йили 60 минг тонна қуритилган мева, дуккакли экинлар, қовун-тарвуз ва узум етказиб бериш бўйича шартнома имзолаган.

Яқинда Ўзбекистон Бош вазири ўринбосари Очилбой Раматов раҳбарлигидаги ҳайъат ҳам Беларусда бўлган.

Ўзбекистон делегацияси АЭС қурилишида беларуслик атомчи мутахассисларни жалб этиш ниятини билдирган.