ඔබ මේ දකින්නේ අවම ඩේටා ප්රමාණයක් භාවිත කරන මෙම වෙබ් අඩවියේ පෙළ පමණක් කියවිය හැකි අනුවාදයකි. රූප සහ වීඩියෝ අන්තර්ගත අපගේ මුලික වෙබ් අඩවිය මෙතැනින් නරඹන්න.
අවම ඩේටා ප්රමාණයක් භාවිතා කරන මෙම වෙබ් පිටු පිළිබඳ වැඩිදුර කියවන්න
ඔබේ ශරීරය හිරු එළියට නිරාවරණය කළ යුතු වන්නේ ඇයි?
වසර ගණනාවක් පුරා අප අසා තිබෙන්නේ හිරු එළියෙන් ආරක්ෂා වීමට ආලේප කරනා ක්රීම් වර්ග නොමැතිව හිරු එළියට නිරාවරණය විම භයානක බවයි. නමුත් සත්යය නම්, අපගේ ශරීරවලටද හිරු එළිය අවශ්ය බවයි.
හිරු එළියට ඔබේ මනෝභාවය වැඩි දියුණු කිරීමට, ඔබේ රුධිර පීඩනය අඩු කිරීමට, ඔබේ අස්ථි සහ මාංශ පේශි ශක්තිමත් කිරීමට මෙන්ම ඔබේ ප්රතිශක්තිකරණ පද්ධතිය පවා ශක්තිමත් කිරීමට හැකියාව පවතී.
හිරු එළියට ඇති බලය
ටික වේලාවක් එළිමහනේ වාඩි වී සිටීම හා ඔබේ සම මතට හිරු එළියේ උණුසුම දැනීම මගින් ඔබේ කායික හා මානසික සෞඛ්යයට බොහෝ යහපත් දේ සිදු කිරීමට හැකියාව පවතී.
මතකයේ තබා ගත යුතු දෙය නම් සෘජුව හිරු එළියට නිරාවරණය නොවීමෙන් අපගේ ශරීරයට විටමින් D නිපදවිය නොහැකි බව සහ විටමින් D අපගේ අස්ථි, මාංශ පේශි සහ ප්රතිශක්තිකරණ පද්ධතිය සඳහා වැදගත් අංගයක් බවයි.
එබැවින්, විටමින් D වැඩි කර ගැනීමට, ඔබ හිරු එළියට නිරාවරණය විය යුතුය.
හිම්හාන කාලයේ මාසවලදී, දීප්තිමත් හිරු එළිය පවතින විට, ශරීරය විටමින් D ගබඩා කරන අතර එය ශීත ඍතුවේ දී ප්රයෝජනවත් වේ.
විටමින් D අඩු මට්ටමක තිබීම ඩිමෙන්ශියාව සහ දියවැඩියාව ඇතුළු විවිධ රෝග වර්ධනය වීමේ අවදානම වැඩි කරයි. එබැවින් නිරෝගීව සිටීමට අප හිරු එළියට නිරාවරණය විය යුතුය.
කෙසේ වෙතත්, විටමින් D ලබා ගැනීම හිරු එළියේ ඇති එකම ප්රතිලාභය නොවේ.
මනෝභාවය වැඩිදියුණු කරයි
හිරු දැකීමෙන් යහපැවැත්ම පිළිබඳ හැඟීමක් ඇති වේ. මෙයට හේතුව හිරු එළියට නිරාවරණය වීමෙන් අපගේ මොළයේ සෙරොටොනින් නම් හෝමෝනය මුදා හැරීම ඉහළ යාමයි. මෙම හෝමෝනය අපගේ මනෝභාවය වැඩි දියුණු කරයි, මනස සන්සුන්ව තබා ගැනීමට සහ ඒකාග්රතාව පවත්වා ගැනීමට එය උපකාරී වේ.
අධ්යයනයකින් සොයා ගෙන ඇත්තේ වළාකුළු පිරි හෝ අඩු ආලෝකයක් පවතින දිනවලට වඩා අව් රශ්මිය සහිත දිනවල මිනිසුන්ගේ රුධිරයේ සෙරොටොනින් මට්ටම ඉහළ මට්ටමක පවතින බවයි.
එය පෙන්වා දෙන්නේ මොළයේ සෙරොටොනින් නිෂ්පාදනයේ වේගය සෘජුවම සම්බන්ධ වන්නේ සෘතුමය හෝ පිටත උෂ්ණත්වයට වඩා දීප්තිමත් හිරු එළියේ කාලසීමාවට බවයි. එනම්, සෙරොටොනින් නිෂ්පාදනය බොහෝ දුරට රඳා පවතින්නේ දීප්තිමත් හිරු එළිය දවසේ කොපමණ වේලාවක් දක්නට ලැබෙන්නේ ද යන්න මතය.
ඊට අමතරව ඔබට සුබදායි හැඟීමක් ඇති කරවමින් සෘජුව පතිත වන හිරු එළිය ඔබේ සමේ සෛල එන්ඩොර්ෆින් (ස්වාභාවික වේදනා නාශක ලෙස හැඳින්වේ) නිපදවීමට උපකාරී වන බව යෝජනා කරන අධ්යයන ද පවතී.
රුධිර පීඩනය අඩු කරයි
පර්යේෂකයන් පවසා ඇත්තේ රුධිර පීඩනය අඩු කිරීම සඳහා හිරු එළිය සෘජු කාර්යභාරයක් ඉටු කරන බවයි.
එඩින්බරෝ විශ්වවිද්යාලයේ විද්යාඥයින් විසින් කරන ලද අධ්යයනයකින් පෙන්වා දී ඇත්තේ රුධිර වාහිනී ප්රසාරණය කර රුධිර පීඩනය අඩු කරන නයිට්රික් ඔක්සයිඩ් සමෙහි නිපදවීමට මිනිත්තු 20 ක් පමණක් හිරු එළියට නිරාවරණය වීම ප්රමාණවත් බවය.
ශක්තිය වැඩි කරයි
ඔබේ වයස කුමක් වුවත් ගැටලුවක් නැත. විටමින් D ඔබේ අස්ථි සඳහා ඉතා වැදගත් පෝෂ්ය පදාර්ථයකි. එය අස්ථි ශක්තිමත් කරයි.
මෑත කාලීනව සිදු කළ අධ්යයනයකින් හෙළි වූයේ විටමින් D ලබා ගැනීමෙන් ක්රීඩක ක්රීඩිකාවන්ගේ මාංශ පේශි ශක්තිය වැඩි වන බවයි. එය මාංශ පේශි සෛල වර්ධනය උත්තේජනය කරමින් ක්රියා කර ඇත.
ශ්වසන ආසාදන වැළැක්වීම සහ ප්රතිශක්තිය වැඩි කිරීම සඳහා මෙම විටමින්වල පවතින වැදගත්කම පර්යේෂණ මගින් ඔප්පු කර ඇත.
විටමින් D ලබා ගැනීමට පවතින හොඳම මාර්ගය හිරු එළියයි
ඔබට ආහාර මගින් විටමින් D යම් ප්රමාණයක් ලබා ගත හැකි බව සත්යයකි. නමුත් ආහාර වලින් පමණක් එය ප්රමාණවත් ලෙස ලබා ගැනීම ඉතා අපහසුය.
මෙම විටමින් අන්තර්ගත හොඳම ආහාර ප්රභව වන්නේ සැමන්, මැකරල් සහ සාඩින් වැනි මේද සහිත මාළු වර්ග ය.
ඔබ නිර්මාංශිකයි නම්, බිත්තර කහ මදය සහ බ්ම්මල් වල විටමින් D කුඩා ප්රමාණයක් අන්තර්ගත වේ.
නමුත් ආහාර වලින් පමණක් ඔබට අවශ්ය විටමින් D සම්පූර්ණ ප්රමාණය ලබා ගැනීම මදක් අපහසු වනු ඇත. නිවසින් පිටත යම් කාලයක් ගත කිරීමෙන් මෙම අවශ්යතාවය සපුරාලීම වඩා පහසුය.
හිරු එළිය වරක් ඔබේ සමට පතිත වූ පසු, ඔබේ ශරීරය එය අවශෝෂණය කර විටමින් D බවට පරිවර්තනය කිරීමට ආරම්භ කෙරේ.
දිගු වේලාවක් නොව කෙටි කාලයක් හිරු එළියේ රැඳී සිටීම පවා ප්රයෝජනවත් විය හැකිය.
කොපමණ වේලාවක් හිරු එළියට නිරාවරණය වීම ප්රමාණවත් ද?
විටමින් D ප්රශස්ත ප්රමාණයක් නිපදවීමට ඔබට හිරු එළිය කොපමණ ප්රමාණයක් අවශ්ය ද යන්න ඔබේ සමේ වර්ගය, ඔබ ජීවත් වන ප්රදේශය සහ ඔබ කෙතරම් සංවේදීද යන්න මත රඳා පවතී.
වැදගත්ම දෙය නම් සම හිරු එළියට පිළිස්සීමෙන් වළක්වා ගැනීමයි.
අඳුරු පැහැ සමෙහි මෙලනින් නම් ද්රව්යය වැඩිපුර අඩංගු වන අතර එය ස්වාභාවික හිරු එළියක් ලෙස ක්රියා කරන අතර විකිරණ අවශෝෂණය කර සම හානිවලින් ආරක්ෂා කරයි. මෙම ආරක්ෂාව අවසානයේ විටමින් D පහසුවෙන් නිපදවීම වළක්වයි.
ඔබේ මුහුණට හිරු එළිය ලැබීම පමණක් ප්රමාණවත් යැයි ඔබ සිතනු ඇත. නමුත් එයින් උපරිම ප්රයෝජන ලබා ගැනීමට නම්, ඔබ ඔබේ අත් යට සහ පාදවලට හිරු එළිය ලබා ගත යුතුය. අහස වලාකුළු සහිත වුවද, පිටතට යාම තවමත් ප්රයෝජනවත් විය හැකිය, එමගින් ඔබට සැහැල්ලු වලාකුළු හරහා හිරු කිරණ ලබා ගත හැකිය.
ඔබට දිවා කාලයේදී හිරු එළිය ලබා ගැනීමට උත්සාහ කළ හැකිය, මන්ද සමේ පිළිකා වර්ධනය වීමේ අවදානම වළක්වා ගනිමින් ඔබට වැඩිපුරම විටමින් D නිපදවිය හැකි කාලය මෙයයි.
මැන්චෙස්ටර් විශ්වවිද්යාලයේ මහාචාර්ය ඈන් වෙබ් පැවසුවේ හිරු ඍජුව හිසට ඉහළින් පවතින විට දිවා කාලයේ නිවසින් පිටවීම කළ හැකි දෙයක් නොවේ යැයි පෙනෙන්න ඇති බවයි. නමුත් දිවා ආහාරය වේලාව තුළ ඇවිදීම ඔබේ දෛනික විටමින් D මාත්රාව ලබා ගැනීමට හොඳම ක්රමය විය හැකිය.
කෙසේ වෙතත්, ඔබ දිගු වේලාවක් එළිමහනේ ගත කිරීමට යන්නේ නම් සහ අව්වේ පිළිස්සීමේ අවදානමක් තිබේ නම්, ඔබ ප්රවේශම් විය යුතුය. ඔබ හිරු ආවරණ පැළඳීම පිළිබඳ සලකා බැලිය යුතු අතර එය අවම වශයෙන් SPF 30 ක් බව තහවුරු කර ගැනීමට බලා ගත යුතුය.
කෙටි කාල පරාස සඳහා හිරු එළියට නිරාවරණය වීම
හොඳම ප්රවේශය වන්නේ හිරු එළියේ අඩු කාලයක් ගත කිරීම සහ නිතර නිතර එසේ කිරීමයි. එක් දිනක් තුළ ඔබේ විටමින් D සියල්ල දහනය කළ හැකි යැයි සිතීම වරදක් විය හැකිය.
ඔබට සංවේදී හෝ දැවිල්ල ඇති කරන සමක් තිබේ නම් හෝ ඔබ හිරු එළියට ඔබේ සංවේදීතාව වැඩි කරන ඕනෑම ඖෂධයක් ලබා ගන්නේ නම් ඔබ වඩාත් ප්රවේශම් විය යුතුය.
පර්යේෂකයින් පවසන්නේ ඇතැම් පුද්ගලයින්ට, එළිමහනේ ප්රමාණවත් කාලයක් ගත කිරීම හෝ හිරු එළියට නිරාවරණය වූ සම මත ආවරණ ආලේප කිරීම අසීරු විය හැකි බව සහ විටමින් D අතිරේකව ලබාගැනීම ඵලදායී විය හැකි බවය.