Dynes wedi marw a thri yn yr ysbyty ar ôl gwrthdrawiad ar yr A55
Roedd presenoldeb yr heddlu yn amlwg iawn yn yr ardal nos Iau wrth iddyn nhw ymchwilio i'r digwyddiad
- Cyhoeddwyd
Mae dynes wedi marw a thri o bobl yn yr ysbyty yn dilyn gwrthdrawiad rhwng car a lori ar yr A55 yng Nghonwy.
Cafodd y gwasanaethau brys eu galw i'r digwyddiad ger cyffordd 17 - Morfa Conwy - tua 12:00 ddydd Iau.
Dywedodd yr heddlu bod dynes yn ei 40au, oedd yn teithio yn y car, wedi cael ei chyhoeddi'n farw yn y fan a'r lle.
Cafodd y tri pherson arall oedd yn teithio yn y car eu cludo i'r ysbyty - dau ohonynt i Stoke ac Aintree mewn hofrenyddion, ac un i Aintree mewn ambiwlans ar y ffordd.
Dywedodd Heddlu'r Gogledd fod gyrrwr y lori yn helpu'r llu gyda'u hymholiadau.
Fe gafodd y ffordd ei chau i'r ddau gyfeiriad rhwng Twnnel Conwy a Thwnnel Penmaenmawr am rai oriau.
Cafodd y ffordd i gyfeiriad y dwyrain ei hailagor yn rhannol toc wedi 15:30, cyn i'r ffordd tua'r gorllewin gael ei hailagor yn rhannol yn ddiweddarach.
Mae'r heddlu'n annog unrhyw un sydd â gwybodaeth neu luniau dash-cam perthnasol i gysylltu â nhw.