ጋና ውስጥ ማርፈድ ባህል ብቻ ሳይሆን ግዴታ ነው

የጃፓኑ የኦሎምፒክ ጉዳዮች ሚኒስትር ዮሺታካ ሳኩሩንዳ የፓርላማ ስብሰባ ላይ ሶስት ደቂቃ በማርፈዳቸው በህዝብ ፊት ወጥተው ይቅርታ እንዲጠይቁ ተደርገው ነበር። እንደ ጋናውያን ሚኒስትሮች የማርፈድ ልማድ ቢሆን ግን ከስራቸው እስከመባረር ሊያደርሳቸው ይችል ነበር ማለት ነው።

ደግነቱ ጋና ውስጥ ማርፈድ ምንም ማለት አይደለም። እንዳውም ማንኛውም ሰው ሆነ የመንግሥት ሃላፊዎች እስከ 40 ደቂቃ ድረስ እንዲያረፍዱ ይጠበቅባቸዋል ትላለች የቀድሞዋ ሚኒስትር ኤሊዛቤት ኦሄኔ።

• የጋና ቅንጡ የሬሳ ሳጥኖች

• ከጋና የፈጠራ ሥራዎች ጀርባ ያለው ሥራ ፈጣሪ

''እኔ ሚኒስትር በነበርኩበት ወቅት በስብሰባዎች ላይ በሰአቱ ብገኝም አብዛኛዎቹ ባለስልጣናት አርፍደው ነው የሚመጡት። እንደውም እኔ ሰአቴን አክብሬ በመምጣቴ ይገረሙ ነበር።''

''ሁሌም ቢሆን ፕሬዝዳንቱ በአሰታቸው ቢገኙ ምናልባት የባለስልጣኖቻቸውን አስተሳሰብ መቀየር ይችሉ ነበር ብዬ አስባለሁ።'' ትላለች።

የአሁኑ የጋና ፕሬዝዳንት ናና አዶ ዳንክዋ አኩፎ አዶ የሃገሬውንና የባለስልጣኖቻቸውን የሰአት አጠቃቀም ለመቀየር ቃል ገብተው ነበር።

እንደውም እራሳቸው ምሳሌ በመሆን ነገሮችን ለመቀየር ቢሞክሩም ነገሩ እንዲህ በቀላሉ የሚፈታ ሆኖ አላገኙትም።

ፕሬዝዳንቱ በተባለው ሰአት በስብሰባዎች ላይ ቢገኙም ሚኒስትሮቻቸው ማርፈዳቸውን ማቆም አልቻሉም።

ነገሮችን ይበልጥ ከባድ የሚያደርገው ደግሞ ትላለች የቀድሞ ሚኒስትሯ፤ ''በቀጠሮ ሰአት ካለመገኘት አልፎ የተያዙ ቀጠሮዎች በተባለላቸው ሰአት መጠናቀቅ አለመቻላቸው ነው።''

• ኢትዮጵያዊቷ የኮፊ አናን ዋና ረዳት

'' ከጠዋቱ 3 ሰአት መጀመር ያለበት የቤተክርስቲያን ዝግጅት ለመታደም አብዛኛው ሰው ከ30 እስከ 1 ሰአት አርፍዶ ነው የሚመጣው። በዚህ ምክንያት ዝግጅቶቹ በስንት ሰአት እንደሚጠናቀቁ ማወቅ እጅግ ከባድ ነው። '' ትላለች።

በአንድ ወቅትም ከጠዋቱ አራት ሰአት የጀመረው አምልኮ ዝግጅት ከቀኑ ዘጠኝ ሰአት ላይ መጠናቀቁን ታስታቀውሳለች።