Коронавирус: Ўзбекистонда кунлик антирекорд яна янгиланди - koronavirus, O'zbekiston, Covid-19, dunyo, yangiliklar

Коронавирус: Ўзбекистонда кунлик антирекорд яна янгиланди - расмий хабарларга кўра, кеча, 16 март куни 115 кишида коронавирус аниқланди. Бу жорий йил ҳисобидан қайд этилаётган энг юқори кўрсаткич бўлади.

Ўзбекистон Соғлиқни сақлаш вазирлигининг расман билдиришича, янги ҳолатлар коронавирусга чалинган беморлар билан мулоқотда бўлганлиги сабабли намуна олинган фуқаролар орасида аниқланган.

Ўтган уч ойча вақт ичида коронавирус билан боғлиқ юздан ошган илк ва сўнгги кундалик кўрсаткич 14 март куни қайд қилинган.

Ўшанда расмий хабарларда жами 111 кишининг коронавирус юқтиргани маълум бўлганди.

Мамлакатда сўнгги беш кун ичида кундалик рақамларнинг яна сезиларли ортаётгани кузатилади, аммо 15 март кунги ҳолатлар (жами 65 та) бундан мустасно.

Сўнгги рақамлар жорий йилда қайд этилаётган ўртачасидан икки, икки баробардан кўпроқни ташкил этаётгани кўрилади.

Бу эса, одамлар орасида Ўзбекистонга яна коронавирус қайтаётганига оид хавотирларни ҳам пайдо қилмай қўймаган.

Расмий изоҳ

Ўзбекистон Соғлиқни сақлаш вазирлиги жорий йил ҳисобидан илк антирекорд қайд қилинган 14 март куни мавжуд вазиятга расман изоҳ берган.

"Қайд этиш кўрсаткичи бироз ошгани рост"лигини тасдиқлаган.

Вазирлик Жамоатчилик билан алоқалар бўлими раҳбари билан кун.уз интернет нашри гаплашган.

Фурқат Санаев, "Лекин умумий аҳвол ваҳимали хабарларда айтилганидек эмас. Бу хабарлар ҳақиқатга мос келмайди", дея таъкидлаган.

У бунинг сабабини биз деркан, "одамларнинг "хотиржам бўлиб қолгани, санитария талабларига риоя қилмаётгани, оддий ниқоб тақиб юришни унутаётгани", шунингдек, "куз ва баҳорда ўткир юқумли респиратор инфекциялар авж олиши" билан изоҳлаган.

Яна "касаллик манбаси сақланиб қолаётганини унутмаслик кераклиги"ни айтган.

Ўзбекистон ва коронавирус

15 март куни Ўзбекистонда коронавирус илк бор расман қайд этилганига роппа-роса 1 йил бўлди.

Агар, расмий статистикага таянилса, Ўзбекистонда шу пайтгача коронавирус беморларининг 99 фоизи соғайиб бўлган.

Ўзбекистон ўтган йил апрел ойидан бошлаб мамлакатда кучайтирилган карантин тартибини босқичма-босқич юмшатишга киришган.

Сўнгги бир неча ой ичида махсус коронавирус марказларини ҳам ёпишни бошлаганди.

Аммо Ўзбекистонда яқинда коронавируснинг "ўта юқумли" экани айтилган британча штамми аниқлангани расман хабар берилган.

Дастлабки тадқиқотлар бу штаммнинг "янада ҳалокатли" бўлиши мумкинлигига ҳам далолат қилган.

Қолган минтақа давлатларидан ҳалича бунга ўхшаш хабар олинмаган.

Масъуллар эса, Би-би-сига Ўзбекистонда сўнгги кунларда аниқланган янги коронавирус ҳолатлари "британча", "жанубийфрикача" ёки "бразилча" штаммлар эмаслигини айтишган.

Куни-кеча дунёнинг энг катта сондаги - юз минглаб ўзбекистонликлар турли иш, юмуш ва таҳсилда банд давлати бўлган Россияга эса, коронавируснинг "британча"сидан кейин, "жанубийафрикача" штамми ҳам кириб боргани маълум бўлган.

"Британча" штамм 28, "жанубий африкачаси" икки кишида аниқлангани расман хабар берилган, аммо уларнинг шахслари очиқланмаган.

Сўнгги рақамлар

Сўнгги расмий кўрсаткичларга таянилса, Ўзбекистонда жами коронавирусга чалинганлар сони бугунга келиб, расман 80858 кишига етган. Аммо бу рақамлар ҳали-ҳануз пневмония ҳолларини ўз ичига олмайди.

Янги антирекорд қайд қилинган ҳар икки ҳолатда ҳам энг катта рақамлар яна пойтахт Тошкент ҳисобига тўғри келган.

Ўзбекистонда ҳам дунёнинг бошқа кўплаб давлатлари мисолида бўлгани каби пандемия авжига чиққан даврда асосан пойтахт Тошкентнинг коронавирус ўчоғи бўлгани кўрилган.

Коронавирус билан боғлиқ устма-уст қайд этилаётган янги антирекордлар манзарасида Тошкент ва Тошкент вилоятида яна карантин чоралари кучайтирилиши маълум бўлган.

Кеча, сешанба куни 1 апрелдан оммавий тадбирларни вақтинча тўхтатиш таклифи илгари сурилган.

Ниқоб тақмаганлик ва коронавирус ҳақида ёлғон ахборот тарқатиш учун жавобгарлик борлиги ҳам аҳолига қайта эслатилган.

Kоронавирус инфекцияси кириб келиши ва тарқалишининг олдини олиш бўйича Тошкент шаҳар штаби пойтахтнинг уч туманида касалликнинг кенг тарқалишига карантин қоидаларига масъулиятсизлик билан ёндашиш сабаб бўлганини айтган.

Штаб бунга болалар, таълим муассасаси тарбиячилари ва табалар билан боғлиқ бир нечта ҳолатни мисол тариқасида келтириб ўтган.

"Шуларни инобатга олган ҳолда", штаб коронавирус инфекцияси аниқланган оилаларда карантин талабларига риоя этмаган фуқароларга нисбатан қонуний жазо чоралари кўрилади, деган қарорга ҳам келган.

Бу ижтимоий тармоқларда ўзбекистонлик айрим таниқли журналистларнинг эътирозли постларига ҳам сабаб бўлмай қолмаган.

Жумладан, журналист Муҳрим Аъзамхўжаев, " Хуллас, Юнусобод, Мирзо Улуғбек ва Олмазор туманида коронавируснинг кенг тарқалишига мос равишда боғча опа, боғча опалар, талабалар сабабчи экан. Юнусободдаги боғча опанинг ишини энди шаҳар прокуратураси назоратга олганмиш, Коронавирусга қарши кураш бўйича Тошкент шаҳар штаби эса коронавирус аниқланган оилаларда карантин талабларига риоя этмаганларга нисбатан жазо чораларини кўриш ҳақида қарор чиқарибди (нима, карантиннинг ўзи тўлиқ бекор бўлмай, унинг талабларига риоя этмаганларни жазолаш бекор қилинганмиди?).

Коронавирус ғалати касаллик экан. "Миллион" ва Юлдуз Усмонованинг концертида, "Навбаҳор" ва "Пахтакор" стадионида, юзлаб, минглаб одамлар иштирокидаги давлат тадбирлари ва ҳашарларда ҳеч кимга юқмас экан-да, аммо боғчалар ва талабалар ётоқхоналарда "кенг тарқалар"миш. Қизиқ, нега бирор куч ишлатар идорада тарқалмайди? Нега бирор коррупцияга ботган давлат ташкилотида тарқалмайди? Нега айнан боғча ва ётоқхона? Нега бирйўла эзилган киракашнинг Matiz'ида эмас?

Боғча опалар ва талабаларни айбдор қилиш... уялингларе, оппоқ сочларинг билан! Қизиқ, прокуратура назоратга олиб, нима қиларкан энди ўша Юнусободдаги боғча опанинг ишини? Қамайдими, қанақадир аждарҳонинг оғзидек катта жарима ўйлаб топадими, нима қилади? Кимга керак бунақа қўрқитиш? Бир ўша боғча опами, вазиятга бепарволик қилган? "Корзинка" ва "Макро"дан бошқа бирор жойда ниқоб сўралмаётганди — бутун назоратни ўша юнусободлик боғча опа сусайтирмаган-ку. Ким назорат қилиши керак эди-ю, ким айбдорга чиқариляпти энди?

Тошкентда "коронавируснинг кенг тарқалиши"га бирорта қудрат эгаси, ССВ ё СЭСга алоқадор бирор кар-кар, ҳеч бўлмаса хаёлига келганини гапирадиган бирор депутат айбдор қилинганида ҳам, эҳтимол, "ўзидан кўрсин", деган бўлардим. Лекин шаҳар яна локдаун остонасига келиб қолгани учун боғча опа ва ётоқхонадаги болаларни айбдор қилинишига ва бунинг учун айнан улар жазоланишига қаршиман. Ана, ССВдаги валломатлар — давлатнинг бир минораси — "ваҳимага асос йўқ"б деяпти (бир йил аввал ҳам шунақа пуч ёнғоқ сотарди булар), асос йўқми, унда прокуратураси, жазоси билан қўрқитмасин", - деб ёзган.

Мамлакатда ҳалича аҳолини коронавирусга қарши оммавий эмлаш ишлари бошланмаган, бу ишга шу кунларда киришилиши айтилган.

Бугун, 17 март куни пойтахт Тошкентга илк Ғарб вакцинаси - Oxsford-AstraZenecaнинг дастлабки партияси (660 минг доза) етиб келган.

Санитария-эпидемиологик осойишталик ва жамоат саломатлиги хизмати бошлиғи ўринбосари Нурмат Отабеков бугун, 17 март куни "карантин кучайтирилиши вакцинани сотиш билан боғлиқ деган гапларда мантиқ йўқ"лигини айтган.

Ўзбекистонда илк коронавирус манбаси мамлакатнинг чет элдан қайтган фуқароси бўлган.

Қирғизистонда ҳам кундалик кўрсаткичларнинг ортаётгани кузатилган, кеча, 16 март куни 128 та янги ҳолат аниқланган.

Қозоғистонда эса, бу кўрсаткич 1161 тани ташкил этган, пойтахт Нур-Султон ортидан, Олма-отанинг ҳам карантинга олиниши маълум бўлган.

Тожикистонда эса, кечаги кўрсаткич остида ҳам бирор бир янги рақам кўрсатилмаган.

Туркманистон ҳали-ҳануз минтақанинг коронавирус расман қайд қилинмаган ягона давлати бўлиб турибди.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek