መስሓቕ ስእሊታት እንስሳ ዘገዳም

እዚ ቦንቦ ተባሂሉ ዝጽዋዕ ዓይነት ህበይ ነታ ሞንጉዝ (ምጹጽላይ እትመስል እንስሳ) እንታይ ክገብር እዩ ሓቚፍዋ? ድራር ክገብራ እንተይልኩም፡ ተጋጊኹም። ሓሓሊፉ እንተዘይኰይኑ እዞም ኣህባይ ብቐንዱ ፍረታት እዮም ዝምገቡ።

እዛ መሳጢ ኵነታት እተርኢ ስእሊ፡ ኣብ ዲሞክራስያዊት ሪፓብሊክ ኮንጎ ብክርስቲያን ዚግለር ዝተሳእለት ኰይና ኣብ መበል 58 ውድድር ብሉጽ ሰኣላይ እንስሳ ዘገዳም ቤተ መዘክር ተፈጥሮኣዊ ታሪኽ ናእዳ ረኺባ እያ።

ክርስቲያን፡ "ነታ ሞንጉዝ ከመይ ጌሩ ብኸምዚ ዝበለ ጥንቃቐ ከም ዝሓቖፋ ምስ ረኣኹ ኣዝየ ገሪሙኒ። ብኡ ንብኡ ክከታተሎ ጀሚረ" ክብል ንቢቢሲ ኒውስ ተዛሪቡ።

እቲ ህበይ ነታ ንእሽቶ ሞንጉዝ ንልዕሊ ሓደ ሰዓት ከም ዝደራረዛ’ውን ሓቢሩ።

እዞም ገፊሕ ዝኣፎም ናይ ባሕሪ ኣዕዋፍ ኣትላንቲክ፡ ፖፊን ይበሃሉ። ብዓሳ ናይ ምግፋፍ ክእለቶም ከኣ ይፍለጡ።

ሓደ ሓደ ግዜ ግን - ከምቲ ኣብቲ ስእሊ ዝርአ - ዘይቐንዖም ኣለዉ። ‘ዋላ ሓንቲ ሓባ እንዶ ኣጥምና?’ ዝብል ዘሎ ይመስል።

ቦብ ካርተር፡ ነዛ ሳሕቲ እተጋጥም ህሞት ኣብ ዓባይ ብሪጣንያ ስኢልዋ።

ማርማት እውን ከም ሞንጉዝ ንምጹጽላይ እትመስል እንስሳ እያ።

እዛ ኦስትርያዊ ማርሞት ግን ካብ ምጹጽላይ ንላዕሊ ‘ራፕ’ ትስዕስዕ ዘላ ትመስል።

እዛ ብእንግሊዝኛ ሮድቢል እትበሃል ዑፍ፡ መጻምድቲ ንምስሓብ ኣብ ዝግበር ፈተነ፡ ምሉእ ብምሉእ ዕግርግር ትፈጥር እያ ዘላ። እዞም ኣዕዋፍ ምስ መጻምዲ ዘለዎም ርክብ ብዙሕ ጫውጫው ዝመልኦ ድምጽን ኣቓልቦ ዝጠልብ ምዝርጋሕ ክንፊ የጠቓልል።

ኣብ 2020 ኣብ ዝተኻየደ ውድድር ሰኣሊ እንስሳ ዘገዳም ናይቲ ዓመት ዝተዓወተት ስእሊ እያ።

እቲ ዝገርም እዛ ሰእሊ ኣብ መደብ ትሕቲ 10 ዓመት ዝቀረበት ነይራ፤ ሰኣሊኣ ስጳኛዊ ኣንድሬስ ሉዊስ ዶሚንጎዝ ብላንኮ እዩ።

ብፊንላዳዊ ፔትሪ ፔቲላይነን ተሳኢላ ኣብ ውድድር ሰኣሊ እንስሳ ዘገዳም ዝቐረበት እያ።

ብኣሜሪካዊት ቶሪ ሃይሊ ተሳኢላ ኣብ 2022 ካብ ዝቐረቡ ብሉጻት ስእሊ መስሓቕ እንስሳ ዘገዳም ክትከውን ክኢላ።

እዚ ደፋር ቺምፓንዚ ኣብ ኢንስታግራም ዝርከቡ ገለ ደቂ ተባዕትዮ ዶ ኣይመስልን?

እዛ ኣሕመድ ኣላህመድ ኣብ ስዑዲ ዓረብ ዝሰኣላ ህበይ ክንድዚ እትስሕቕ ዘላ በቲ ኣብ ላዕሊ ዘሎ ደፋር ቺምፓንዚ ኣይኰነን። እንተዝዀን ግን . . .