د داعش ټولوژنه؛ عراقي یزیدیان د خپلو ۱۰۴ مړو پاتې شوني خاورو ته وسپارل

د عراق په شمال کې یزیدي ټولنې د خپلو هغو ۱۰۴ غړو مړي خاورو ته سپارلي، چې په ۲۰۱۴ کال "اسلامي دولت" (داعش) نومې ډلې پر دې سیمه د ولکې پرمهال وژلي وو.

د دغو کسانو د مړو پاتې شوني له ډله ییزو قبرونو رایستل شوي او د نینوی ولایت سینجار غره ته څېرمه په کوچو کلي کې خښ کړل شوي دي.

کله چې داعش د یزیدیانو پر مېنو بریدونه وکړل، زرګونه، سړي، ښځې او ماشومان یې یرغمل او غلامان کړل او پر ښځو یې جنسي تېري وکړل.

د ملګرو ملتونو په یوه رپوټ کې دا د دغې ټولنې پروړاندې نسل وژنه یاده شوې ده.

د یزیدیانو پر وړاندې د مستند کولو د بنسټ مشر خیري علي ابراهیم ویلي، ټول ۱۰۴ وژل شوي سړي دي، چې داعش د ۲۰۱۴ کال په اګسټ ‌میاشت کې وژلي وو.

بغداد کې د پنجشنبې په ورځ مخکې له دې چې دغه مړي کوچو ته یوړل شيو ددغو کسانو او نا پېژندل شویو پوځيانو د جنازې مراسم هم ترسره شول.

پر هر یوه تابوت د وژل شوي سړي عکس لګول شوی و.

د یزیدیانو د بشري حقونو فعال میرزا دینايي ویلي: "دا لومړی ګام دی چې د قربانیانو د پاتې شونو درنای پکې کېږي او د هغو ښځو، ماشومانو او لپاره د انتقالي عدالت لومړنی ګام دی چې ژوندي پاتې شوي".

"هیله لرم چې موږ به د یزیدیانو د ساتلو لپاره لاس په کار شو چې په راتلونکې کې بیا داسې غمیزه تکرار نه شي".

یزیدیان د یوه داسې دین پیروان دي چې له زردشتي او لرغونو بین النهرین دینونو سرچینه اخلي. "اسلامي دولت" ‌ډلې زندیق بللي وو.

اټکل دی چې د داعش له برید مخکې عراق کې شاوخوا ۵۵۰٫۰۰۰ یزیدیانو ژوند کاوه. ۳۶۰٫۰۰۰ یزیدیان وتښتېدل او په نورو سیمو کې کډوال شول.

د بښنې نړیوال سازمان په تېره جولای میاشت کې وویل، شاوخوا ۲۰۰۰ یزیدي ماشومان چې د اسلامي دولت له وحشیانه یرغمل ژوندي پاتې شوي، لاهم پالنې ته اړتیا لري، خو له شدیدو فزیکي او رواني ناروغیو کړېږي.