پاکستاني طالبان وايي مسلم لیګ ن او پيپلز ګوندونه به یې له بریدونو خوندي نه وي

پاکستاني طالبانو په خپله وینا پاڼه کې مسلم لیګ ن او پيپلز ګوندونو ته ګواښ کړی چې له دې وروسته به یې له بریدونو خوندي نه وي او پر وړاندې به یې" ځانګړي ګامونه" اخلي.

طالبانو له خلکو غوښتي چې د دغو ګوندونو له مشرانو لرې و اوسي، چې د "دوی په بریدونو کې ورته زیان ونه رسیږي."

د پاکستاني طالبانو تحریک وایې له ډېره وخته یې د هېڅ سیاسي ګوند پر وړاندې کوم ګام نه دی پورته کړی، خو وایې نه پوهېږي چې له "بده مرغه امریکا" د دوی په مشرانو څه ډول جادو کړې ده.

د دوی اشاره ظاهرا د پیپلز ګوند د مشر او بهرنیو چارو وزیر بلاول بوټو زرداری څرګندونو ته ده ،چې نوموړی په ښکاره د پاکستاني طالبانو پر وړاندې د جګړې اعلان کړی.

دارنګه په وینا پاڼه کې د پاکستاني لومړي وزیر شهباز شریف خبرو ته هم ګوته نیولې چې ګواکي د امریکا د ملاتړ تر لاسه کولو لپاره یې ټول ګوند د پاکستاني طالبانو پر وړاندې جګړیزو تبلغاتو ته هڅولی دی.

پاکستاني طالبان وایې، اوس په هغه ځانګړو ګامونو او کارونو فکر کوي، څو هغه خنډونه چې د دولت له خوا په دوی تحمیل شوي له مخې لرې کړي.

دوی خبردار ورکړی، که د یادو ګوندونو مشران په خپلو دریځونو ټينګار وکړي، د مشرانو پر ضد به یې غچ اخېستونکي ګامونه واخلي.

په پاکستان کې دا مهال حکومتي چارې تر ډېره د لومړي وزیر شهباز شریف په مشرۍ مسلم لیګ ن او بهرنیو چارو وزیر بلاول بوټو زرداري په مشرۍ د پيپلز یا خلکو ګوند په غاړه لري او دوی په وروستیو کې د پاکستاني طالبانو پر ضد جدي دریځ غوره کړی دی.

په همدې حال کې د امریکا بهرنیو چارو وزارت ویاند وایې پاکستان او خلکو یې له ترهګرۍ ډير زیان لیدلی او په وینا یې"دا د دوي حق دی" چې له "ترهګرو" د ځان ساتنه وکړي.

د امریکا غبرګون

نیډ پرایس په واشنګټن کې د خبریالانو پوښتنو ته په ځواب کې ویلي، دوی د پاکستان د ملی امنیت کمېټې له وینا پاڼې خبر دي.

د پاکستان د ملي امنیت کمېټې د وروستۍ ناستې په اعلامیه کې ویل شوي"پاکستان د خپل او خلکو امنیت" ساتنې په برخه کې له خپله حقه برخمن دی.

په اعلامیه کې دارنګه راغلي"له ترهګرۍ سره په خپل ټول توان مبارزه کوي او د پاکستان د ملي امنیت په برخه کې هېڅ ډول خبرو اترو یا مصالحې ته اړتیا نه ويني."

پاکستان ادعا کوي چې "ترهګر" د افغانستان له خاورې د دوی پر وړاندې بریدونه کوي.

د امریکا بهرنیو چارو وزارت ویاند هم له په افغانستان کې له طالب واکمنو غوښتي چې په خپلو ژمنو ودریږي او چاته اجازه ور نه کړي چې د افغانستان خاوره د بل هېواد په ضد وکاریږي.

حنا رباني کر وايي "د هېواد امنیت یې سره کرښه ده"

پاکستانۍ رسنیو بیا په بهرنیو چارو کې د پاکستان د دولت وزیرې حنا رباني کر هغه خبرې خپرې کړې چې د هغه هېواد د ملي امنیت کمېټې په ناسته کې یې کړې دي.

مېرمن کر ویلي افغانستان ته یې د سفر پر مهال افغان واکمنو ته ښکار پیغام دا و چې "د پاکستان امنیت زموږ سره کرښه" ده

نوموړې همدارنګه ویلي، پاکستان له خپلو ګاونډیانو سره ښه اړیکي غواړي او زیاتوي: "پاکستان باید د ټي ټي پي د ترهګریزو بریدونو قرباني نه شي."

اغلې کر د تېر کال ۲۰۲۲ کال د نومبر په ۲۹ نېټه کابل ته سفر کړی و. نوموړې وایې هغه مهال طالب چارواکو ورته ډاډ ورکړی چې خاوره به یې د پاکستان پر ضد نه کارول کیږي.

خو په افغانستان کې طالب واکمن بیا دا تورونه نه مني او له پاکستانه څخه یې غوښتي چې له پارونکو خبرو ډډه وکړي.