غني د پښتون ژغورنې غورځنګ پر "ځپلو" اندېښنه وښوده

افغان ولسمشر محمد اشرف غني وايي، په پښتونخوا او بلوچستان ایالتونو کې د سوله ییزو او مدني فعالانو او معترضانو پر ضد تشدد مخ په زیاتېدو دی.

د اشرف غني دا څرګندونې له هغه وروسته دي چې تېره شنبه د پښتون ژغورنې غورځنګ یو مخکښ غړی لولاريي کې ووژل شو او دا غورځنګ یې مسوولیت د پاکستان پر امنیتي ځواکونو اچوي.

افغان ولسمشر خپل فیسبوک کې زیاتوي، د انساني حقونو نړیوال سازمانونه، رسنۍ او ان د پاکستان مدني او سیاسي بنسټونه هم دغه مخ په زیاتېدونکی تشدد تاييدوي او جدي اندېښنه ښيي.

خو د پاکستان د بهرنیو چارو وزیر شاه محمود قریشي پر خپله ټوېټر پاڼه د ولسمشر غني دا څرګندونې غندلې دي. نوموړي لیکلي، دا ډول نامسسوله وینا (د پاکستان په کورنیو چارکې) لاسوهنه ده.

ښاغلي قریشي لیکلي، افغان مشران باید د افغان ولس کړاو ته شکایت ته پام وکړي.

د اشرف غني په خبره، سیمه د مذهبي افراطیت او ترهګرۍ له جدي ګواښ سره مخ ده:

"د هر مسوول دولت اخلاقي دنده ده چې د دغه ډول مدني فعالیتونو ملاتړ وکړي، خو له بده مرغه له دوی سره برعکس چلن کېږي".

د نوموړي په خبره، په داسې وخت کې د سوله ییزو اعتراضونو او مدني فعالانو ځپل نه یوازې د ژورې اندېښنې خبره ده، بلکې ټولې سیمې ته منفي پایلې لرلی شي.

که څه هم نوموړی د پښتون ژغورنې غورځنګ نوم نه اخلي، خو پر پښتونخوا او بلوچستان سربېره پنجاب او سیند صوبو کې هم د دې غورځنګ د مظاهرو پر مهال ځینې غړي نیول شوي دي.

تېره شنبه( د پرورۍ ۲) د دې غورځنګ یو مخکښ مشر او د مرکزي کمېټی غړی ارمان لوڼی ووژل شو.

د غورځنګ یوه ځايي فعال جلیل افغان بي بي سي ته وویل، لورلايي کې د پولیسو پر مرکز د برید پېښې خلاف د پښتون ژغورنې غورځنګ له څلور ورځني پرلت وروسته ارمان لوڼی په یوه ځايي پارک کې له ملګرو سره ناست و، چې پولیس هلته د ځینې کسانو نیولو لپاره ورغلل.

* د منظور پښتین خولۍ د حق غوښتنې پر سمبول بدلېږي؟

* له چیغې تر غورځنګه؛ د پښتون ژغورنې یو کلنه مبارزه

د ښاغلي افغان په خبره ارمان لوڼي پولیسو ته وویل، د دوی د هغو ملګرو نومونه دې ورکړي، چې غواړي ویې نیسي، هغوی به خپله د پولیسو مرکز ته ورشي، خو په وینا یې پولیسو پر نوموړي تشدد وکړ او ویې واژه.

د ارمان لوڼي تر وژلو وروسته پاکستاني ځواکونو د یکشنبې په ورځ له ژوب او نورو سیمو د هغو خلکو د تګ مخه نیوله چې کلاسیف الله ته د ارمان لوڼي جنازې ته تلل.

که څه هم صوبايي حکومت د پښتون ژغورنې غورځنګ د مشر منظور پښتین په ګډون قامي اسمبلۍ کې د وزیرستان دوه غړي محسن دوړ او علي وزیر تر ۹۰ ورځو په بلوچستان بند کړي دي.

خو دغه درې واړو مشرانو د امنیتي ځواکونو له خنډونو سره سره په خامو لارو ځان تر کلاسیف الله ورساوه.

صوبايي چارواکو د ارمان تر وژنې وروسته ژوب کې د پنځلسو ورځو لپاره هر ډول وسلې ګرځولو، جلسو، غونډو، پرلتونو، مظاهرو او د څلورو یا څلورو ډېرو کسانو پر ناسته بندیز لګولی دی.

خو د لوڼي د وژنې په دویمه ورځ د بلوچستان په مرکز کوټه او نورو پښتني سیمو کې کاربندیز و.

د غورځنګ مشر منظور پښتین ټولو سیمو کې د لاریونونو خبره هم وکړه.

د سې شنبې په ورځ دوی اسلام اباد کې لاریون درلود، خو د پاکستان امنیتي ځواکونو د دې غورځنګ یوه ملاتړې او ټولنیزه فعاله ګلالۍ اسماعیل او نور کسان ونیول.

ګلالۍ اسماعیل بي بي سي ته وویل، چې تېره شپه خوشې شوې ده.