ملګري ملتونه: طالبان دې د خبریالانو پر وړاندې ځپونکي ګامونه ودروي

افغانستان کې د ملګرو ملتونو استازولۍ (یوناما) په دغه هېواد کې له طالبانو غوښتي، د رسنیو ټول نيول شوي کار کوونکي خوشي کړي.

یوناما دغه غوښتنه وروسته له هغه کړې چې دا وروستیو کې ځینې خبریالان او د رسنیو کارکوونکي طالبانو نېولي دي.

خو طالبان په ښکاره د خبریالانو د نیولو په اړه له څه ویلو ډډه کوي.

افغانستان کې د طالبانو له واک نیولو سره د وینا آزادۍ پر وړاندې راپورته شویو خنډونو په نړیواله کچه ژورې اندېښنې رامنځ ته کړې دي.

یوناما پر خپله ټوېټر پاڼه لیکلي چې طالبان باید د رسنیو او خبریالانو پر وړاندې ځپونکي او له تاوتریخوالي ډک ګامونه ودروي.

له دې مخکې هم نړیوالو له طالبانو غوښتي و چې د وینا ازادۍ او رسنیو پر وړاندې خپل چلند بدل کړي خو یوناما وايي، لا هم افغانستان کې د خبریالانو پر وړاندې له تاوتریخوالي ډک چلند کېږي.

د ملګرو ملتونو تر څنګ، د خبریالانو د خوندیتاب ګمېټه (CPJ Asia) هم وايي، چې طالب چارواکي باید د رومان کریمي د نیولو او وهلو او همدارنګه د نوموړي د موټر چلوونکي سمیع الله د نیولو په اړه ژر تر ژر څېړنې وکړي.

دغې کمېټې افغانستان کې د طالبانو له حکومته غوښتي چې د یوې خصوصي راډیو څېښتن جمال الدین دلدار او پخوانی خبریال میرزا حسني هم ژر خوشې کړي.

د رپوټونو پر بنسټ افغانستان کې د خبریالانو ترڅنګ هغه کسان چې د طالبانو پر حکومتولۍ او چارواکو نیوکې کوي، هم ځورول کېږي.

د خواله رسنیو فعال عماد دوران له نژدې یوې میاشتې راهیسې په ټولنیزو رسنیو کې د لیکنو او بحثونو په سر نیول شوی دی.

د ښاغلي دوران کورنۍ بي بي سي ته ویلي، عماد هیڅ کوم جرم نه لري خو د طالبانو استخباراتو نیول دی.

طالبان په دې اړه له خبرو ډډه کوي.

د وینا آزادۍ د تیر حکومت له لویو لاسته راوړنو څخه ګڼل کېده خو د طالبانو له واکمنېدو سره دا لاسته راوړڼه له ننګونو سره مخامخ ده.

له تېر اګسټ راهېسي د رپوټونو له مخې ګڼ خبریالان او د رسنیو کارکوونکي نيول شوي او د خبریالانو لپاره کاري چاپیریال سخت شوی دی.

د طالبانو حکومت نژدې میاشت وړاندې پر ښځینه خبریالانو ځانګړي بندیزونه هم لګولي او ویلي دي چې پر سکرین ښکاره کېدونکي ټولې خبریالانې باید ماسکونه وتړي.