د نجونو پر منځنیو ښوونځیو بندیز؛ نړیوال بانک په افغانستان کې د څلورو پروژو چارې وځنډولې

نړیوال بانک مسوولین وايي، په افغانستان کې یې د طالبانو حکومت له لوري د نجونو پر متوسطه ښونځيو د بندیز غځېدو له کبله په دې هېواد کې د څلورو پروژو کارونه درولي دي.

د بانک مسوولینو په وینا دا د ۶۰۰ میلیونو امریکايي ډالرو ارزښت پروژې دي، چې اوس یې چارې په ټپه درول شوې.

د رویټرز خبري اژانس په رپوټ کې د نړیوال بانک مسوولینو له قوله ویل شوي، د تعلیم، روغتیا او کرهنې برخې دې پروژو ته پانګه د افغانستان د بیا رغاونې صندوق 'اې ار ټي ایف ' له هغو پیسو ورکول کېده، چې دا وروستیو کې خوشې شوې وې او د ملګرو ملتونو ادارو لخوا به کارول کېدې.

د رویټرز رپوټ کې د نړیوال بانک مسوولینو له قوله د نجونو پر زدکړو د بندیز دوام له کبله ژوره اندېښنه ښوول شوې او د بانک لارښوود یادونه شوې، چې له مخې یې باید د اې ار ټي ایف مالي ملاتړ لرونکو ټولو پروژو کې باید افغان ښځې او نجونې خدمتونو ته مساوي لاسرسی ولري.

د بانک مسوولینو له قوله ویل شوي:

''له همدې کبله به دا پروژې د مرستندویانو د تایید لپاره یوازې هغه وخت وړاندې شي چې نړیوال بانک او نړیوالې ملګرې ادارې یې وضعیت سم درک کړي او ډاډ تر لاسه کړي، چې د دې پروژو هدفونه ترلاسه کېدای شي. ''

د روانې مارچ میاشتې پر لومړۍ نېټه د نړیوال بانک اجرايي پلاوي د افغانستان بیارغاونې مرستو له صندوقه د څه باندې یو میلیارد ډالرو داسې کارول تایید کړل، چې پر طالبانو له لګېدلو بندیزونو به نه اغېزمن کېږي او د ملګرو ملتونو او مرستندویانو له لوري به د افغانستان زدکړو، روغتیا او کرهنې برخو کې کارول کېږي.

افغانستان کې طالبانو له شپږم ټولکي پورته د نجونو په زده کړو بندیز لګولی دی، چې روانه اونۍ د هلکانو لپاره د ښوونځیو له پرانیستل کېدو وروسته یو ځل بیا وغځول شو.

د طالبانو دې بندیز پر وړاندې چې نجونه یې له زده کړو بې برخې کړې، د ملګرو ملتونو امنیت شورا هم غبرګون ښودلی دي.

د یادونې ده، چې د افغان نجونو پر مخ د ښوونځیو دروازو تړلې پاتې کېدو پرېکړې له کبله امریکايي چارواکو تېره اونۍ له طالبانو سره په قطر کې پلان شوې غونډه لغوه کړه.