ملي امنیت: د لوګر مدني فعالان له موږ سره دي

د افغانستان پلازمېنه کابل کې د لوګر او پکتیا د دوو مدني فعالانو-موسا محمودي او احسان حمیدي- له ورکېدو پنځه ورځې وروسته ملي امنیت وايي، چې دا کسان له دې ادارې سره دي. دې دوو کسانو له رسنیو سره خبرو کې ویلي وو چې د لوګر په ځینې ښوونځیو کې سلګونه زدکوونکي له جنسي ځورونې سره مخ شوي دي.

اوس د افغانستان د ملي امنیت ادارې ویلي، د دې رپوټ له خپرېدو وروسته دا مدني فعالان جدي امنیتي ګواښ سره مخ و، ځکه یې خوندي ځای ته لېږدولي دي.

د افغانستان ملي امنیت په دغه اعلامیه کې ادعا کړې چې د جنسي ځورونو په هکله د موسا محمودي څېړنې بې سنده، بې ثبوته او بې شواهدو وې.

"د دې رپوټ دا بې بنسټه او بې مدرکه څرګندونو د څو ښوونځیو څو ماشومان له جدي امنیتي ګواښ سره مخ کړي دي."

د ملي امنیت اعلامیه له هغه وروسته ده، چې د بښنې نړیوال سازمان د دوشنبې پر ورځ په یوه اعلامیه کې تور ولګاوه چې د افغانستان ملي امنیت ادارې هغه دوه کسان نیولي دي چې په لوګر کې یې پر کم عمره هلکانو د جنسي تېريو له پېښو پرده پورته کړې وه. یاد سازمان په سملاسي توګه د دې دواړو کسانو د خوشي کولو غوښتنه کړې ده.

په اعلامیه کې راغلي چې دې کسانو پر هلکانو د جنسي ځورونې تر سلو ډېرې ویډیوګانې افشا کړې وې او ګارډین ورځپاڼه ادعا کوي چې یو شمېر هغه هلکان چې جنسي تېری پرې شوی و، وروسته وژل شوي هم دي.

د بښنې نړیوال سارمان د سویلي اسیا د برخې یوه کمپاینره سمیرا حمیدي هغه ورځ وایي، داسې وېره شته چې دا کسان ښایي د ملي امنیت ادارې په بند کې شکنجه شي، یا نور بد چلن ورسره وشي.

نوموړې ویلي، د ملي امنیت ادارې ته پکار ده چې د دې دوه فعالانو د نیولو پر ځای د دوی ستاینه وکړي، د قضیې پلټنه وکړي او اصلي مجرمین د قانون منګولو ته وسپاري.

په لوګر ولایت کې پر لسګونو کم عمره هلکانو د جنسي ځورونې قضیه څه موده وړاندې رسنیو کې را پورته شوه، خو افغان حکومت په دې تړاو شوې ادعاوې رد کړې دي.