افغانستان کې د پښتورګو د درملنې نوی مرکز پرانیستل شو

د افغانستان پلازمېنه کابل کې د پښتورګو د درملنې یو نوی مرکز پرانیستل شوی. دغه مرکز کې د پښتورګو د تشخیص، درملنې او دیالیز یا د ناروغ د وینې د چاڼولو برخې شته دي. له دې وړاندې هغه ناروغان چې د پښتورګو له ناروغيو کړېدل د درملنې په موخه به له هېواده بهر تلل.

مومن د غزني د ده یک ولسوالۍ اوسېدونکی دی. هغه وايي دا چې په غزني کې يې درملنه شونې نه وه کابل ته راغی. هغه په کابل کې جمهوريت روغتون ته راغلی. د هيمو ډیاليز دا نوی مرکز هم همدلته په دغه روغتون کې پرانستل شوی.

د دولتي شمېرو له مخې په ټول افغانستان کې له پنځو زرو ډېر خلک د پښتورګو له ناروغۍ کړېږي. د عامې روغتیا وزارت چارواکي وايي د یادې ناروغۍ ډېرېدو او ډيالیز ماشین ته د دغې ناروغۍ د ناروغانو ډېرې اړتيا وهڅول چې دا مرکز رامنځته کړي. د افغانستان د عامې روغتیا وزیر فیروز الدين فیروز:

"د دغو پنځو زرو کسانو ډېری يې بې وزلي دي، اوس مهال يې ډېری ګاونډیو هېوادونو ته د درملنې په موخه ځي، دوی يا خپله ځمکه او نور شته پلوري او ګاونډيو هېوادونو ته د پښتورګي د درملنې په موخه ځي. روغتیا وزارت دا پرېکړه وکړه چې دا ستونزه نوره ختمه کړي او اړمنو کسانو ته د ستونزو بنسټیزه حل لاره برابره کړي. له همدې امله مو د هېواد په بېلابېلو برخو کې سږ کال هيمودیالیز مرکزونه جوړ کړو."

خوست کې د ایچ ای وي او زیړي نوی وقایوي مرکز

د ایډز ناروغۍ په برخه کې افغانستان او پاکستان غواړي ګډ‌ کار وکړي

د پښتورګو ناروغان په اونۍ کې لږ تر لږه درې ځله ډیالیز یا د وينې چاڼ ته اړتيا لري چې وينه یې د بدن اړتیاوو ته ځواب وویلای شي. د پښتورګو ناروغان هغه مهال د ډيالیز ماشين ته اړ کېږي چې پښتورګي يې ونشي کولای په طبيعي ډول خپله دنده مخ ته یوسي.

د افغانستان د عامې روغتيا وزیر وايي تر اوسه په کابل او ننګرهار کې د هیمودیالیز اتیا ماشينونه لګېدلي او ټاکل شوې د روان کال تر پایه په کندهار، هرات او بلخ ولايتونو کې او را روان کال په پکتیا او بامیانو کې هم د هيموډیالیز مرکزونه فعال شي.

هغه وايي د پښتورګو د پیوندولو امکانات په هرات ولايت کې شته او ژر به يې په کابل کې هم مرکز فعال شي.

د چارواکو په وینا هغه ناروغان چې د درملنې په موخه له هېواده بهر تلل اوس يې په دغه مرکز درملنه کېدای شي. د پښتورګو ناروغي ګڼ عوامل لري.

د عامې روغتيا وزارت چارواکي د هيموډیالیز د مرکز جوړېدل د دغې ناروغۍ پر معياري درملنه د لاسبري کېدو په لور ښه ګام ګڼي، خو وايي اوس هم قناعت بښونکو روغتيايي خدماتو ته ډېر کار پاتې دی.

چارواکي وايي په افغانستان کې د پښتورګو د ناروغۍ له امله د مړينې کچه ډېره لوړه ده. د روغتيا د نړیوال سازمان د یوه راپور له مخې چې په ۲۰۱۴ کال کې خپور شوی نژدې ۲۴۰۰ کسان په کال کې له دې ناروغۍ مړه شوي دي.