ONU yasavye amakungu kworosha amategeko agenga abimukira

Ahavuye isanamu, Getty Images

Insiguro y'isanamu, ONU ivuga ko amategeko yorohejwe abimukira batokoresha uburyo bwa magendo

Umunyamabanga mukuru wa ONU, Antonio Guterres, yasavye amakungu kworosha amategeko atuma bigorana kwimukira mu bihugu.

Ngo mu gihe ayo mategeko yokworoshwa, vyotuma abimukira batabwirizwa guca mu buryo bw'amagendo.

Ibi yashikirije mu nama rusangi ya ONU bije imbere y'ibiganiro vyanyuma ku mwumvikano ku kibazo c'abimukira.

Bwana Guterres yavuze ko uruja n'uruza rw'abantu ari ikintu ngirakamaro ku buzima bw'isi ngo kandi ibihugu bishiraho inzitizi, nta kindi vyunguka atari kubangamira ubutunzi bwavyo.

Igihugu ca Leta Zunze Ubumwe za Amerika kivuga ko kitazoja muri uwo mugambi.