Akagunguru k'ibitoro kazamutse karenga 115$, mu gihe intambara yinjiye mu cyumweru cya gatanu

Ibiciro by'ibikomoka kuri peteroli ku isi byazamutse cyane, naho imigabane ku masoko mpuzamahanga iragabanuka ku buryo bugaragara kuri uyu wa Mbere mu gitondo muri Asia, nyuma y'uko intambara ya Amerika na Israel kuri Iran yinjiye mu cyumweru cya gatanu.

Igiciro cy'akagunguru k'ibitoro bitunganyije (Brent) cyazamutseho 3% kigera hejuru ya $115.

Ibi bitumye igiciro cy'akagunguru kiri mu nzira yo kugira kuzamuka kunini kurusha ukundi kose mu gihe cy’ukwezi kumwe mu mateka.

Agaciro k'imigabane ku masoko yayo muri Asia kamanutse aho Nikkei 225 ryo mu Buyapani imigabane yagabanutseho 4.5% naho Kospi yo muri Koreya y'Epfo igabanukaho 4%.

Ibi bibaye nyuma y'uko abarwanyi b'Aba-Houthi bo muri Yemen bashyigikiwe na Iran binjiye muri iyi ntambara bagatera Israel mu mpera z'icyumweru, ndetse Iran ikavuga ko ishobora kwagura ibitero byo kwihimura kuri za kaminuza no ku ngo z'abategetsi ba Amerika na Israel.

Perezida wa Amerika Donald Trump mu kiganiro yagiranye n'ikinyamakuru Financial Times yavuze ko ashobora "gufata peteroli muri Iran" kandi ashobora no kwigarurira ikigo kinini cyayo cy'ibikomoka kuri peteroli kiri ku kirwa cya Kharg.

Abajijwe ku bijyanye n'ubwirinzi bwa Iran yahura nabwo agerageje ibyo yasubije ati: "Sinkeka ko bafite ubwirinzi. Twashobora kugifata byoroshye cyane."

Trump yagereranyije icyo gikorwa n'ibyabaye muri Venezuela aho Amerika iteganya kugenzura urwego rwa peteroli "igihe kitazwi" nyuma yo gukura ku butegetsi Perezida Nicolás Maduro muri Mutarama(1).

Nanone mu mpera z'icyumweru, Perezida w'inteko ishinga amategeko ya Iran yaburiye ko ingabo z'igihugu cye "zitegereje abasirikare b'Abanyamerika," mu gihe izindi ngabo za Amerika zigera ku 3,500 zageze mu Burasirazuba bwo Hagati.

Amasoko mpuzamahanga y'ingufu yakomeje guhungabana cyane nyuma y'uko Tehran yihimuriye ku bitero bya Amerika na Israel, ikabuza amato kunyura mu muhora wa Hormuz, inzira ikomeye inyurwamo n'ingufu nyinshi ku isi.

Hafi 20% by’ibiva kuri peteroli na gaze ku isi bisanzwe binyura muri uwo muhora muto, ariko ingendo nyinshi zarahagaze, bituma ibiciro bizamuka.

Impuguke mu by'amasoko y'ingufu Sean Foley wo muri Kaminuza ya Macquarie yavuze ko ateganya ko ibiciro by‘ibiva kuri peteroli bizakomeza kuzamuka henshi ku isi keretse gusa iyo intambara igabanutse.

Foley yongeyeho ko ibitero by'Aba-Houthi byateje impungenge ko uwo mutwe ushobora guhagarika ubwikorezi bw'ingufu bunyura mu muhora wa Bab al-Mandeb uri hafi ya Yemen.

Gufunga iyo nzira yindi y'amazi bishobora gutuma hafi 10% y'ibikomoka kuri petroli bitagera ku isoko, "bigashyira igitutu gikomeye ku miyoboro y'itangwa ry'ibicuruzwa ku isi hose," nk'uko Foley yabivuze.

Andrew Lipow wo mu kigo cy'ubujyanama Lipow Oil Associates yavuze ko yiteze ko igiciro cy'akagunguru k'ibitoro kizagera ku madolari 130$ mu byumweru biri imbere, mu gihe ibibazo bibangamira ubucuruzi bw'ibitoro ku isi bikomeje.

Yagize ati: "Ikinteye ubwoba cyane ni uko habaho kugabanuka kw'iterambere ry'ubukungu ku isi hose… kuko abaguzi bashobora kubura amafaranga bitewe n'uko bayakoresha menshi ku ngufu, ndetse no ku biribwa.

Akagunguru k'ibitoro bitunganyije kaguraga hafi 72$ tariki 27 z'ukwezi gushize kwa Gashyantare(2), umunsi umwe mbere y'uko Amerika na Israel bagaba igitero kuri Iran.

Ku wa 18 Werurwe, igiciro cyako cyageze ku 119$ kikaba ari cyo gipimo cyo hejuru cyo kuzamuka cyagezweho kuva muri Kamena (6) 2022.