Morgan 'eisiau'r berthynas agosaf bosib â'r Undeb Ewropeaidd'

Eluned Morgan mewn gwisg goch yn cael ei holi ar raglen BBC Politics Wales

"Tydi gadael yr Undeb Ewropeaidd heb fod o fudd i Gymru," medd y Prif Weinidog, Eluned Morgan

Teleri Glyn-Jones
Gohebydd gwleidyddol BBC Cymru

Mae Prif Weinidog Cymru wedi dweud nad ydy hi'n cuddio'r ffaith ei bod hi'n frwd dros yr Undeb Ewropeaidd.

Dywed Eluned Morgan ei bod eisiau gweld Cymru gyda'r berthynas agosaf bosib at yr UE.

Pleidleisiodd 52.5% o bleidleiswyr Cymru i adael yr undeb yn 2016.

Roedd hi'n ymateb ar raglen Politics Wales BBC Cymru i sylwadau gan Faer Llafur Llundain, Syr Sadiq Khan, yr wythnos hon y dylai'r blaid ymgyrchu i ailymuno â'r UE yn yr etholiad cyffredinol nesaf.

Daw'r sylwadau wrth i Lywodraeth Prydain newid ei bwyslais ar Brexit wrth iddynt geisio mynd i'r afael â pherfformiad economaidd gwan y DU.

Ond er bod Syr Keir Starmer wedi dweud mewn araith y llynedd bod "Brexit wedi achosi loes sylweddol i'n economi", mae Downing Street wedi dweud dro ar ôl tro na fydd y llywodraeth yn ailymuno â'r undeb dollau a'r farchnad sengl.

Graffeg baner Cymru a baneri'r Undeb EwropeaiddGetty Images

Pleidleisiodd 52.5% o etholwyr Cymru i adael yr Undeb Ewropeaidd yn refferendwm 2016

Yn siarad ar raglen BBC Politics Wales, mi wrthododd Eluned Morgan ddweud os y dylai Llafur addo ailymuno â'r Undeb Ewropeaidd, ond mi ddywedodd: "Dydw i ddim am ymddiheuro mod i wedi bod eisiau'r berthynas agosaf bosib erioed.

"Rydw i'n frwd o blaid Ewrop," ychwanegodd.

"Tydi gadael yr Undeb Ewropeaidd heb fod o fudd i Gymru. Rydym wedi gweld toriadau i allforion, sy'n effeithio swyddi.

"Rydym wedi gweld toriadau yn sgil ariannu ac roedd 'na addewid na fyddwn ni geiniog yn dlotach. Tydi hynny heb ddigwydd."

Mae Eluned Morgan yn ymuno â nifer cynyddol o ffigyrau blaenllaw Llafur sy'n trafod perthynas y DU gyda'r EU yn agored.

Dywedodd Wes Streeting, Gweinidog Iechyd y DU, fis Hydref ei fod yn credu y bydd hi'n anodd cyflawni'r twf economaidd mae'r llywodraeth wedi addo tu allan i'r UE.

Ac ar bodlediad diweddar dywedodd David Lammy, y dirprwy brif weinidog, bod hi'n "amlwg" bod Brexit wedi niweidio'r economi.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i cymrufyw@bbc.co.uk neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.