Ўзбекистон ва коронавирус: Ўтган бир кеча-кундузда нима ўзгарди? Тошкентда вазият оғирлашяптими? - Koronavirus, O'zbekiston, Covid-19, dunyo, yangiliklar

Расмий хабарларга кўра, Ўзбекистонда кундалик коронавирусга чалиниш ҳоллари яна ортган. Ўтган 18 март куни 124та янги ҳолат аниқланган. Бу жорий йил ҳисобидан қайд этилган энг юқори кўрсаткич бўлмоқда.

Тошкентда вазият оғирлашяптими?

Маълум бўлишича, бу гал ҳам энг кўп коронавирусга чалинаётганлар пойтахт Тошкент ҳисобига тўғри келган.

124 та янги ҳолатдан 99 тасини Тошкент шаҳрида аниқланган. 17 март куни эса, бу рақамлар 93 тани ташкил этган.

Бундан кейинги энг юқори кўрсаткич Тошкент вилоятида қайд этилган.

Вилоятда кеча, пайшанба куни коронавирусга чалинганлар сони расман 13 киши экани кўрилган.

Ўзбекистон Соғлиқни сақлаш вазирлигининг расман билдиришича, бу гал ҳам янги ҳолатлар коронавирусга чалинган беморлар билан мулоқотда бўлганлиги сабабли намуна олинган фуқаролар орасида аниқланган.

Ўзбекистонда сўнгги кунларда коронавирус билан боғлиқ кундалик кўрсаткичларнинг изчил ортиб бораётгани кузатилади.

Сўнгги рақамлар жорий йилда қайд этилаётган ўртачасидан икки, икки баробардан кўпроқни ташкил этаётгани кўрилади.

Сўнгги расмий кўрсаткичларга таянилса, Ўзбекистонда жами коронавирусга чалинганлар сони бугунга келиб, расман 81095 кишига етган.

Аммо, шуни ҳам таъкидлаш жоизки, бу рақамлар ҳали-ҳануз пневмония ҳолларини ўз ичига олмайди.

Расмий изоҳ

Ўзбекистон Соғлиқни сақлаш вазирлиги жорий йил ҳисобидан илк антирекорд қайд қилинган 14 март куни мавжуд вазиятга расман изоҳ берган.

Вазирлик Жамоатчилик билан алоқалар бўлими раҳбари "Қайд этиш кўрсаткичи бироз ошгани рост"лигини тасдиқлаган.

"Лекин умумий аҳвол ваҳимали хабарларда айтилганидек эмас. Бу хабарлар ҳақиқатга мос келмайди", дея таъкидлаган.

У бунинг сабабини биз деркан, "одамларнинг "хотиржам бўлиб қолгани, санитария талабларига риоя қилмаётгани, оддий ниқоб тақиб юришни унутаётгани", шунингдек, "куз ва баҳорда ўткир юқумли респиратор инфекциялар авж олиши" билан изоҳлаган.

Яна "касаллик манбаси сақланиб қолаётганини унутмаслик кераклиги"ни айтган.

Мавжуд вазият сабаб, аввалига пойтахт Тошкент, бунинг ортидан эса, Тошкент вилоятида ҳам карантин чораларини кучайтиришга қарор қилинган.

Ниқоб тақмаганлик ва коронавирус ҳақида ёлғон ахборот тарқатиш учун жавобгарлик борлиги ҳам аҳолига қайта эслатилган.

Бунинг ортидан, 1 апрелдан оммавий тадбирларни вақтинча тўхтатиш таклифи ҳам илгари сурилган.

Мамлакатда карантин чекловларини бузаётганларни жаримага тортиш бошланган.

Агар, расмий маълумотларга таянилса, биргина 16 март куни бутун Ўзбекистон бўйлаб юзлаб фуқарога нисбатан маъмурий жарималар расмийлаштирилган.

Мамлакатда ҳалича аҳолини коронавирусга қарши оммавий эмлаш ишлари бошланмаган, бу ишга шу кунларда киришилиши айтилган.

17 март куни пойтахт Тошкентга илк Ғарб вакцинаси - Oxsford-AstraZenecaнинг дастлабки партияси (660 минг доза) етиб келган.

Масъуллар "ушбу вакциналар билан Ўзбекистонда аҳолини короновирусга қарши эмлаш ишлари бошланиши ва босқичма-босқич давом эттирилиши"ни расман маълум қилишган.

Санитария-эпидемиологик осойишталик ва жамоат саломатлиги хизмати бошлиғи ўринбосари Нурмат Отабеков эса, худди шу куни "карантин кучайтирилиши вакцинани сотиш билан боғлиқ деган гапларда мантиқ йўқ"лигини айтган.

Ўзбекистон ва коронавирус

15 март куни Ўзбекистонда коронавирус илк бор расман қайд этилганига роппа-роса 1 йил бўлди.

Агар, расмий статистикага таянилса, Ўзбекистонда шу пайтгача коронавирус беморларининг 99 фоизи соғайиб бўлган.

Ўзбекистон ўтган йил апрел ойидан бошлаб мамлакатда кучайтирилган карантин тартибини босқичма-босқич юмшатишга киришган.

Сўнгги бир неча ой ичида махсус коронавирус марказларини ҳам ёпишни бошлаганди.

Аммо Ўзбекистонда яқинда коронавируснинг "ўта юқумли" экани айтилган британча штамми аниқлангани расман хабар берилган.

Дастлабки тадқиқотлар бу штаммнинг "янада ҳалокатли" бўлиши мумкинлигига ҳам далолат қилган.

Қолган минтақа давлатларидан ҳалича бунга ўхшаш хабар олинмаган.

Масъуллар эса, Би-би-сига Ўзбекистонда сўнгги кунларда аниқланган янги коронавирус ҳолатлари "британча", "жанубийфрикача" ёки "бразилча" штаммлар эмаслигини айтишган.

Куни-кеча дунёнинг энг катта сондаги - юз минглаб ўзбекистонликлар турли иш, юмуш ва таҳсилда банд давлати бўлган Россияга эса, коронавируснинг "британча"сидан кейин, "жанубийафрикача" штамми ҳам кириб боргани маълум бўлган.

"Британча" штамм 28, "жанубий африкачаси" икки кишида аниқлангани расман хабар берилган, аммо уларнинг шахслари очиқланмаган.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek