پولیس نے پانچ گھنٹے تالاب میں چھپے رہنے والے انتہائی مطلوب چور کو کیسے پکڑا؟

جھیل میں پانچ گھنٹے تک پانی کے اندر چھپنے والا چوری کا ملزم بالآخر پولیس نے پکڑ لیا۔

وہ کنول کے تنے سے سانس لے کر پولیس کے تعاقب سے بچ رہا تھا۔ تاہم اس کی چالاکی، تجربے، صبر اور ہوشیاری سے آگے نہیں بڑھ سکی۔

مگر 400 سے زائد چوریاں کرنے والا ریلوے کا انتہائی مطلوب ملزم کیسے پکڑا گیا؟

منگل (7 اپریل) شام تقریباً 5 بجے کھٹولا ریلوے سٹیشن سے ایک شخص بھاگ رہا تھا۔ آر پی ایف (ریلوے پولیس) اس کا پیچھا کر رہی تھی۔ تھوڑی دیر بعد اس شخص نے قریبی جھیل میں چھلانگ لگا دی۔

جب پولیس جھیل پر پہنچی تو انھیں وہاں کچھ نہیں ملا۔ جب پولیس جھیل کے آس پاس اس شخص کی تلاش کر رہی تھی۔ اس وقت وہ شخص جھیل کے پانی کے نیچے چھپا ہوا تھا۔

وہ تالاب میں کنول کے تنے کی مدد سے سانس لے رہا تھا۔ تقریباً ایک گھنٹے کے بعد آر پی ایف کی ٹیم نے کھٹولا پولیس سے مدد طلب کی۔

آر پی ایف نے پولیس کو اطلاع دی کہ ایک چور ٹرین میں ایک خاتون کا پرس چھیننے کی کوشش کر رہا تھا۔ جب انھوں نے اس کا پیچھا کیا تو اس نے تالاب میں چھلانگ لگا دی۔

معاملے کی سنگینی کو بھانپتے ہوئے ٹاؤن انسپکٹر رمن سنگھ مارکم اپنی ٹیم اور غوطہ خوروں کے ساتھ موقع پر پہنچ گئے۔ اس کے بعد 5 گھنٹے تک چور کی تلاش کی گئی۔ اس کے بعد چور جھیل کے پانی کے نیچے چھپا ہوا پکڑا گیا۔

جب پولیس نے اس سے پوچھ گچھ کی تو چور نے بتایا کہ وہ کنول کے تنے کی مدد سے پانی کے اندر سانس لے رہا تھا۔

چور کا نام ہرویندر ہے۔ جھیل سے نکالے جانے کے بعد کھٹولا پولیس نے اسے آر پی ایف کے حوالے کر دیا۔

معاملہ ہے کیا؟

منگل کو، ایک خاتون ریوا اٹواری سٹیشن سے ٹرین کے اے سی ڈبے میں سفر کر رہی تھی۔ ٹرین جیسے ہی سہورا ریلوے سٹیشن کے قریب پہنچی تو اچانک ایک شخص نے خاتون کا پرس چھیننے کی کوشش کی۔

وہ ناکام رہا۔ تاہم، اس نے آر پی یف کی توجہ حاصل کر لی۔

وہ شخص پولیس کے ہاتھوں پکڑے جانے سے بچنے کے لیے سٹیشن سے باہر بھاگا۔ کانسٹیبل آشیش یادو اور ونے موریہ نے اس کا پیچھا کیا۔ پھر وہ شخص سٹیشن سے آدھا کلومیٹر دور ایک جھیل کے پانی میں چھپ گیا۔

اس جھیل میں ہر طرف کائی اور پانی کے پودے تھے۔ وہاں کچھ دکھائی نہیں دے رہا تھا۔ یہ دونوں آر پی ایف کانسٹیبل کافی دیر تک جھیل میں اس کی تلاش کرتے رہے۔ لیکن وہ اسے تلاش نہ کر سکے۔

اس کے بعد آر پی ایف سٹیشن انچارج راجیو کھراب کو اطلاع دی گئی۔ کھٹولا تھانے کی پولیس کی مدد سے آر پی ایف نے چور کو پکڑنے میں کامیابی حاصل کی۔ اس کے بعد چور کو جبل پور لے جایا گیا۔

یہ چور کون ہے؟

چور کو سہورا سے جبل پور لانے کے بعد تھانہ انچارج راجیو کھرب نے اس سے پوچھ گچھ کی۔ اس وقت چور اپنا نام اور پتہ بار بار تبدیل کر رہا تھا۔ اس دوران تھانہ انچارج کو چور کا چہرہ جانا پہچانا لگا۔

انھوں نے اپنے موبائل فون میں ایک تصویر دیکھی جو ایک انگریزی اخبار میں شائع ہوئی تھی۔ تصویر میں نظر آنے والا شخص اور چور ایک ہی شخص تھے۔ یہ جان کر وہاں موجود سبھی حیران رہ گئے۔

نوجوان کی شناخت بدنام زمانہ چور ہرویندر سنگھ (32 سال) کے طور پر ہوئی ہے۔ وہ اتر پردیش کے بجنور ضلع کے ہلدور تھانے کے تحت نشیک محلہ کھیڑا کا رہنے والا تھا۔

کئی شہروں کے تھانوں کی پولیس کئی مہینوں سے اس چور کی تلاش میں تھی۔

تھانہ انچارج نے تصویر دیکھ کر چور کی شناخت کر لی۔

وہ انتہائی مطلوب ریلوے چور کیسے بنا؟

32 برس کے ہرویندر سنگھ اب تک 400 سے زیادہ چوری کر چکا ہے۔ ان چوریوں کی کل رقم کروڑوں میں ہے۔ وہ اتنا چالاک ہے کہ اس نے اکثر مسافروں کو ہی نہیں بلکہ آر پی ایف اور جی آر پی کو بھی دھوکہ دیا ہے۔

ہرویندر ہمیشہ اے سی کوچز میں چوری کرتا تھا۔ پہلے وہ دوسرے مسافروں کی طرح ٹکٹ لے کر سفر کرتا تھا۔ تاہم ٹرین میں کیمرے لگانے اور بعد میں ٹکٹ آن لائن فروخت ہونے کے بعد اس نے ٹکٹ لینا چھوڑ دیا۔

ٹرین میں سوار ہوتے ہی اس کی توجہ ٹکٹ کاؤنٹر پر مرکوز ہو جاتی۔

ٹی سی کے آتے ہی وہ جس ڈبے میں ہوتا اس کے باتھ روم میں چھپ جاتا۔ ٹی سی کے جاتے ہی وہ اس ڈبے میں تنہا سفر کرنے والی خواتین کو نشانہ بناتا۔

بتایا جاتا ہے کہ ہرویندر نے اپنی پہلی چوری 2010-11 میں اتر پردیش کے شہر بجنور میں کی تھی۔ تب سے اب تک وہ 400 سے زائد چوری کر چکا ہے۔

وجئے واڑہ پولیس نے اسے 2018 میں چوری کے الزام میں گرفتار کیا تھا۔

پولیس کے منھ سے سنی کا نام سن کر چور چونک گیا

آر پی ایف کی ٹیم ہرویندر کو سہورا سے جبل پور لے آئی۔ وہاں پوچھ گچھ کے دوران اس نے کئی بار اپنا نام بدلا۔ کبھی کہتا کہ اس کا نام ببلو ہے۔ کبھی کہتا کہ وہ چندی گڑھ کا رہنے والا ہے۔

آر پی ایف سٹیشن انچارج راجیو کھرب نے بتایا کہ وہ 2018 میں ریلوے انٹیلیجنس، کوٹا میں تھے، اس وقت انھوں نے ایک انگریزی اخبار میں شائع ہونے والی چور سے مماثل تصویر دیکھی تھی۔

وہ تصویر ابھی تک ان کے موبائل میں ہے۔ اس اخبار میں چور کا نام ہرویندر سنگھ عرف سنی لکھا تھا۔ اب پوچھ گچھ کے دوران راجیو کھرب نے وہ تصویر دوبارہ دیکھی اور کہا، ’سنی، اب تم پھنس گئے ہو‘ یہ سن کر وہ چونک گیا۔

آر پی ایف کی طرف سے مکمل پوچھ گچھ کے بعد، چور نے انکشاف کیا کہ وجئے واڑہ پولیس نے اسے 2018 میں چوری کے الزام میں گرفتار کیا تھا۔ اس وقت اس سے 70,38,500 روپے کے ہیرے اور سونے کے زیورات ضبط کیے گئے تھے۔ بعد میں اسے ضمانت پر رہا کر دیا گیا۔

ہرویندر کی گرفتاری کے بعد دیگر ریاستوں کی پولیس بھی پوچھ گچھ کے لیے آ رہی ہے۔

یہ چالاک چور ایک آزاد کارپوریٹر بھی تھا

جولائی 2018 میں، ممبئی سینٹرل اندور اونتیکا ایکسپریس میں ایک مسافر کو ہرویندر نے لوٹ لیا تھا۔ ہرویندر نے مسافر سے 32 بور کا لائسنس یافتہ پستول، 10 کارتوس، ایک بھاری بھرکم میگزین اور 1.90 لاکھ روپے نقد چرا لیے۔

متاثرہ نے ممبئی سنٹرل سٹیشن سے حاصل کی گئی سی سی ٹی وی فوٹیج سے ہرویندر سنگھ کی شناخت کی۔

ہلدور میونسپل ایگزیکٹو آفیسر ابھیشیک کمار نے بتایا کہ ہرویندر سنگھ دسمبر 2017 میں آزاد امیدوار کے طور پر الیکشن لڑ کر کارپوریٹر کے طور پر منتخب ہوئے تھے۔ تاہم، خاندان میں کسی کو بھی ان کے مجرمانہ پس منظر کے بارے میں کچھ معلوم نہیں تھا۔

ملزم کے خلاف تعزیرات ہند کی دفعہ 379/411 کے تحت مدھیہ پردیش، مہاراشٹرا اور آندھرا پردیش کے مختلف ریلوے پولیس سٹیشنوں میں کئی مقدمات درج کیے گئے ہیں۔

ہر بار چوری کرنے کے لیے نئے سم کارڈ کا استعمال

ہرویندر سنگھ عرف سنی اتنا چالاک چور ہے کہ جب بھی وہ چوری کرتا تو نئی موبائل سم استعمال کرتا۔

وہ جانتا تھا کہ اس کے موبائل کے ذریعے اس کی لوکیشن ٹریک کی جا سکتی ہے اور اسے گرفتار کیا جا سکتا ہے۔ اس نے اپنی اصل شناخت ظاہر ہونے سے بچنے کے لیے اپنے ساتھ کوئی شناختی کارڈ بھی نہیں رکھا تھا۔

آر پی ایف کے مطابق، وہ ہر چھ ماہ بعد اپنا راستہ تبدیل کرتا تھا تاکہ شناخت نہ ہو سکے اور اس کا کوئی نشان نہ رہے۔ کبھی کبھی وہ چوری کرنے کے لیے دہلی سے بھوپال جاتا۔ کبھی وہ کولکتہ سے بہار کا سفر کرتا۔ کبھی کبھی وہ دوسرے راستے سے سفر کرتا۔

ہرویندر سنگھ کی گرفتاری کے بعد دیگر ریاستوں کی پولیس نے بھی اس سے پوچھ گچھ کے لیے جبل پور میں آر پی ایف سے رابطہ کرنا شروع کر دیا ہے۔

آر پی ایف کے آئی جی راجیو کمار نے ٹائمز آف انڈیا کو بتایا کہ ’اب ہمیں مختلف ریاستوں سے اس کے بارے میں فون کالز موصول ہو رہی ہیں۔ چنئی میں حکام نے اس کی ویڈیو فوٹیج بھی بھیجی ہے۔ ہم تحقیقات کے حصے کے طور پر اس کی تصدیق کر رہے ہیں۔‘