نیویارک میں موجود وہ ’امریکی تجوری‘ جہاں دوسرے ممالک کا ٹنوں سونا محفوظ ہے

25 میٹر زیرِ زمین، نیویارک کی لبرٹی سٹریٹ پر، امریکہ کا فیڈرل ریزرو اپنے ہیڈکوارٹر کے تہہ خانے میں دنیا بھر کے مرکزی بینکوں، حکومتوں اور اداروں کی ملکیت کے پانچ لاکھ سے زیادہ سونے کی سلاخیں محفوظ رکھتا ہے۔

یہ فولادی خزانہ 90 ٹن وزنی سٹیل کے سلنڈر سے محفوظ ہے اور ایک بار بند ہونے کے بعد اس کا دیوہیکل تالہ اگلے دن تک نہیں کھل سکتا۔

یہ دنیا کا سب سے بڑا معلوم سونے کا ذخیرہ، جس میں تقریباً 6,300 ٹن سونے کی سلاخیں ڈھیروں کی صورت میں رکھی ہیں، جن کی موجودہ قیمت ایک ٹریلین ڈالر سے زیادہ ہے، یعنی امریکہ کے مجموعی قومی پیداوار (GDP) کا تقریباً 4 فیصد۔

یہ خزانہ عالمی مالیاتی نظام کے استحکام کے لیے نہایت اہم کردار ادا کرتا ہے، کیونکہ بہت سے ممالک یہاں اپنے سونے کی ذخائر رکھتے ہیں۔ سونا ایک محفوظ اثاثہ سمجھا جاتا ہے جو کرنسیوں کو سہارا دینے اور بحران کے حالات میں مدد فراہم کرنے کے لیے استعمال ہوتا ہے۔

سونا ہمیشہ مالیاتی ہلچل، جغرافیائی سیاسی اتار چڑھاؤ اور افراطِ زر کے باعث سرمائے کی قدر میں کمی کے مقابلے میں ایک محفوظ سرمایہ سمجھا گیا ہے۔ اسی لیے یہ قیمتی دھات دنیا بھر کے مرکزی بینکوں، خاص طور پر یورپی ممالک کے ذخائر کا ایک اہم حصہ ہے۔

بی بی سی منڈو سے گفتگو کرتے ہوئے یونیورسٹی آف برکلے (امریکہ) کے ماہر بین الاقوامی مالیاتی نظام بیری آئچنگرین نے کہا کہ ’یہ ان کے سب سے اہم اثاثوں میں سے ایک ہے کیونکہ جغرافیائی سیاسی مشکلات کی صورت میں یہ انھیں بینکوں اور کمپنیوں کے لیے آخری سہارا فراہم کرنے اور زرِ مبادلہ کی منڈیوں میں مداخلت کرنے کی اجازت دیتا ہے۔‘

دہائیوں تک، امریکہ اور اس کا فیڈرل ریزرو اس قدر اہم اثاثے کے سب سے قابلِ اعتماد محافظ سمجھے جاتے تھے، خاص طور پر یورپی ممالک کے لیے جو سوویت یونین کی طاقت سے خطرہ محسوس کرتے تھے اور وہاں بڑی مقدار میں سونے کے ذخائر جمع کرتے گئے۔

لیکن ڈونلڈ ٹرمپ کے دوبارہ اقتدار میں آنے کے بعد یورپی سیاستدانوں اور ماہرین نے اس ملک میں محفوظ سونے کو واپس لانے (ریپیٹریٹ کرنے) کی ضرورت پر سوال اٹھایا ہے۔

صدر کے بین الاقوامی وعدوں سے لاتعلقی اور یورپی اتحادیوں کے ساتھ اختلافات—جیسے محصولات، گرین لینڈ کی ڈنمارکی خودمختاری، اور حالیہ دنوں میں ایران کے خلاف جنگ نے فیڈ میں محفوظ یورپی سونے کی سلامتی کے بارے میں خدشات کو جنم دیا ہے۔

یورپی سونا امریکہ کیسے پہنچا

روس کے برعکس، جس کا مرکزی بینک اپنے سونے کی ذخائر اپنے ہی علاقے میں رکھتا ہے اور یوں مغربی پابندیوں کے ممکنہ اثرات سے محفوظ رہتا ہے، کئی یورپی ممالک اب بھی اپنے ذخائر بیرونِ ملک رکھتے ہیں، جن کی بڑی تعداد نیویارک کے اس خزانے میں محفوظ ہے۔

یورپی سونا وہاں 1950 کی دہائی سے جمع ہونا شروع ہوا۔

آئچنگرین کے مطابق ’جرمنی اور دیگر یورپی ممالک، جن کی معیشتیں بحال ہو رہی تھیں اور وہ امریکہ کو زیادہ برآمدات کر رہے تھے، انہیں ادائیگیاں سونے اور ڈالرز کے امتزاج میں ملتی تھیں۔‘

انھوں نے مزید کہا ’سونا جہاز یا ہوائی جہاز کے ذریعے منتقل کرنے اور اس کے لیے انشورنس کرانے پر اخراجات آتے ہیں، اس لیے انھیں یہ بہتر خیال لگا کہ اسے فیڈرل ریزرو کے خزانے میں محفوظ کر دیا جائے، جو کہ اس کی حفاظت کے لیے کوئی فیس بھی نہیں لیتا۔‘

1944 میں بریٹن ووڈز میں تیار کردہ نظام نے ڈالر کو سونے سے منسلک ایک مقررہ شرحِ تبادلہ پر قائم کیا تھا، جس کے نتیجے میں سونا اور ڈالر سب سے قابلِ اعتماد اثاثے بن گئے۔ جنگ کے بعد کمزور یورپی طاقتوں کے لیے یہ فائدہ مند تھا کہ وہ انھیں امریکی فیڈرل ریزرو کی نگرانی میں بلا معاوضہ جمع کر سکیں۔

آہنی پردے کے اُس پار سوویت خطرے کے پیشِ نظر، امریکی نگرانی سب سے بڑی ضمانت سمجھی جاتی تھی۔

لیکن اب سوویت یونین موجود نہیں اور ٹرمپ کی وائٹ ہاؤس واپسی نے واشنگٹن اور اس کے یورپی اتحادیوں کے درمیان دہائیوں پرانی ہم آہنگی کو متاثر کر دیا ہے۔

جرمنی میں، جو دنیا کے دوسرے سب سے بڑی معلوم سونے کے ذخائر رکھتا ہے (امریکہ کے بعد)، اور اس لیے وہ ممکنہ خطرات کے لحاظ سے سب سے زیادہ متاثر ہونے والے ممالک میں شمار ہوتا ہے، کئی انتباہی آوازیں بلند ہوئی ہیں۔

ماہرِ اقتصادیات ایمانوئل مونش، جو بنڈس بینک کے مرکزی محقق رہے ہیں، نے نیویارک میں محفوظ جرمن مرکزی بینک کے سونے کی واپسی (ریپیٹریشن) کا مطالبہ کیا۔ میڈیا کے اندازوں کے مطابق یہ تقریباً 1,200 ٹن ہے، جس کی مالیت تقریباً 200 ارب امریکی ڈالر بنتی ہے۔

مونش نے کہا ’موجودہ جغرافیائی سیاسی صورتحال کے پیشِ نظر، اتنا زیادہ سونا امریکہ میں رکھنا خطرناک لگتا ہے۔‘

ان کا ماننا ہے کہ اسے واپس لانا جرمنی کی ’زیادہ سٹریٹجک خودمختاری‘ میں مددگار ہوگا۔

اسی طرح، جرمن ٹیکس دہندگان کی ایسوسی ایشن کے صدر مائیکل یاگر نے کہا: ’ٹرمپ غیر متوقع ہیں اور آمدنی پیدا کرنے کے لیے کچھ بھی کر سکتے ہیں۔ اسی لیے ہمارا سونا اب فیڈ کی بَووَدا میں محفوظ نہیں ہے۔‘

انھوں نے مزید کہا ’اگر گرین لینڈ پر اشتعال انگیزی جاری رہی تو کیا ہوگا؟ اس سے یہ خطرہ بڑھ جاتا ہے کہ بنڈس بینک اپنے سونے تک رسائی حاصل نہ کر سکے، لہٰذا اسے اپنی ذخائر واپس لے لینی چاہیں۔‘

یہ تشویش جرمنی کی حکمران جماعت سی ڈی یو (چانسلر فریڈرش مرٹز کی پارٹی) اور دیگر سیاسی قوتوں کے ارکانِ پارلیمنٹ نے بھی ظاہر کی ہے۔

بنڈس بینک کے صدر یوآخِم ناگل نے ان خدشات کو دور کرنے کی کوشش کی۔

انھوں نے گذشتہ اکتوبر واشنگٹن میں آئی ایم ایف کی ایک میٹنگ میں کہا ’فکر کی کوئی وجہ نہیں ہے۔‘

فروری میں ایک پریس کانفرنس میں انھیں دوبارہ اس موضوع پر بات کرنی پڑی:’یہ مجھے نیند سے محروم نہیں کرتا۔ مجھے اپنے امریکی مرکزی بینک کے ساتھیوں پر مکمل اعتماد ہے۔‘

لیکن بحرِ اوقیانوس کے اُس پار، نہ فیڈرل ریزرو اور نہ ہی ٹرمپ کی حکومت نے اس اعتماد کی تصدیق کی ہے۔

آئچنگرین نے کہا’ میں نے کوئی تسلی بخش بات نہیں سنی اور مجھے لگتا ہے کہ یہ بروقت ہوگی۔‘

بی بی سی منڈو نے فیڈرل ریزرو سے رابطہ کیا، لیکن کوئی جواب نہیں ملا۔

ادارے کی خاموشی اس وقت سامنے آئی ہے جب اس کے صدر جیروم پاول اور حکومت کے تعلقات کشیدہ ہیں۔ ٹرمپ نے بارہا ان پر تنقید کی ہے کیونکہ وہ شرحِ سود کم کرنے سے انکار کرتے رہے۔ وزارتِ انصاف نے پاول کے خلاف ایک فوجداری تحقیقات بھی شروع کی، جسے انھوں نے ’انتظامیہ کی دھمکیوں اور دباؤ‘ کا حصہ قرار دیا تاکہ فیڈ کی آزادی ختم کر کے اسے ’صدر کی ترجیحات پر عمل کرنے‘ پر مجبور کیا جا سکے۔

سونے کی واپسی کی لہر

جرمنی واحد یورپی ملک نہیں ہے جس کا سونا نیویارک میں محفوظ ہے۔

اٹلی اور سوئٹزرلینڈ کو بھی اکثر ان ممالک میں شمار کیا جاتا ہے جن کے پاس وہاں بڑی مقدار میں ذخائر ہیں۔

کچھ ممالک نے ماضی میں سونے کی واپسی کا عمل شروع بھی کیا۔

ہالینڈ نے 2014 سے یہ قدم اٹھایا، جب اس نے فیڈ میں محفوظ اپنی ذخائر کا تناسب 51 فیصد سے کم کر کے 31 فیصد کر دیا۔

اسی وقت جرمنی نے بھی اپنے کچھ سونے کی سلاخیں واپس لے لیں، لیکن ان کا بڑا حصہ اب بھی ’سونے کی تجوری‘ میں موجود ہے۔

آئچنگرین کے مطابق ’یہ یونان کے قرض بحران اور یورو کی مشکلات کا زمانہ تھا، اور یورپی چاہتے تھے کہ انھیں یقین ہو کہ ان کی کرنسی اور بینک ڈپازٹس کسی ٹھوس چیز سے محفوظ ہیں۔‘

1960 کی دہائی میں، فرانس کے صدر شارل دیگال نے فیصلہ کیا کہ وہ اپنے ملک کے وہ سونے کے ذخائر واپس لے آئیں جو فیڈ میں محفوظ تھے۔

کئی مصنفین کے مطابق، یہ فیصلہ اس خوف کی وجہ سے کیا گیا تھا کہ کہیں اچانک ڈالر کی قدر میں کمی نہ ہو، کیونکہ بریٹن ووڈز معاہدے کے تحت ڈالر کی قیمت سونے سے منسلک تھی۔

وقت نے ان کا فیصلہ درست ثابت کیا۔

1971 میں، امریکی صدر رچرڈ نکسن نے ڈالر کی سونے میں تبدیلی کی سہولت ختم کر دی اور یوں دوسری جنگِ عظیم کے بعد قائم کیا گیا عالمی مالیاتی نظام ٹوٹ گیا۔

فرانس، جس نے پہلے ہی اپنے ذخائر واپس لے لیے تھے، اس فیصلے سے بہتر حالت میں رہا۔ اس کے برعکس، وہ ممالک جن کے سونے کے ذخائر نیویارک میں موجود تھے، ایک ہی رات میں اپنے ڈالرز کی قدر میں بڑی کمی دیکھنے پر مجبور ہوئے۔

مہنگی واپسی

سونے کی اس تجوری میں اب ماضی کے مقابلے کم سونا موجود ہے۔

فیڈرل ریزرو کے اعداد و شمار کے مطابق، نیویارک کی اس تجوری میں محفوظ بین الاقوامی سونے کے ذخائر کا حجم 1973 سے مسلسل کمی کا شکار ہے، جب وہاں 12,000 ٹن سے زیادہ سونا موجود تھا۔

تاہم یورپی سونا وہاں رکھنے کے حامی اب بھی موجود ہیں۔

جرمنی کے ادارہ برائے اقتصادی تحقیق کے کلیمنس فیوسٹ نے ’دی گارڈین‘ کو بتایا کہ سونے کی واپسی ’موجودہ صورتحال کی آگ پر تیل ڈالنے کے مترادف ہوگی‘ اور اس کے غیر متوقع نتائج ہو سکتے ہیں۔

کچھ ماہرین اس بات پر زور دیتے ہیں کہ فیڈرل ریزرو کی حکومتِ ٹرمپ سے آزادی اس بات کو یقینی بناتی ہے کہ صدر سونے پر یکطرفہ اقدامات نہ کر سکے۔ وہ اس بات کو بھی نمایاں کرتے ہیں کہ اتنے قیمتی سامان کی منتقلی کے اخراجات، لاجسٹکس اور سکیورٹی پیچیدگیاں بہت زیادہ ہوں گی۔

اس کے باوجود، امریکہ کے فیڈرل ریزرو پر یورپی سونے کے محافظ کے طور پر اعتماد کے بارے میں شکوک و شبہات دہائیوں سے قائم عالمی نظام میں ایک اور دراڑ ڈالنے کی دھمکی دیتے ہیں۔

آئچنگرین کے مطابق ’اگرچہ اس کی واپسی امریکہ کے لیے کوئی خاص مالی اثرات نہیں ڈالے گی، لیکن سونے کی نگرانی ایک عالمی خدمت ہے جو امریکہ نے مفت فراہم کی ہے بالکل اسی طرح جیسے نیٹو کا حفاظتی چھتری یا ڈالر کا عالمی کرنسی ہونا تاکہ دوست اور تجارتی شراکت دار بنائے جا سکیں۔‘

انھوں نے مزید کہا ’یہ حکومت نہیں سمجھتی کہ امریکہ کو مفت خدمات فراہم کرنی چاہیئں، اور اتحادیوں کے ذخائر کی سلامتی پر شکوک ان کی امریکہ کے لیے نیک خواہشات کو مزید کمزور کرتے ہیں، جو ضروری ہیں جب آپ کو ان کی مدد درکار ہو، مثلاً مشرقِ وسطیٰ میں کسی جنگ کے لیے۔‘

ابھی تک کسی یورپی ملک نے ’ٹرمپ کے دوسرے دور‘ میں اپنے سونے کی واپسی کا فیصلہ نہیں کیا ہے۔

لیکن شاید کچھ حکمرانوں کے ذہنوں میں یورپی مرکزی بینک کی صدر کرسٹین لاگارڈ کی گذشتہ سال کی تقریر کی یہ بات گونج رہی ہو کہ ’بین الاقوامی مالیاتی نظام کی تاریخ میں ایسے لمحات آتے ہیں جب وہ بنیادیں بھی ہلنے لگتی ہیں جو کبھی ناقابلِ حرکت لگتی تھیں۔‘