ኣመሪካን እስራኤልን ንብዙሓት መራሕቲ ኢራን ቀቲለን እየን፡ ትራምፕ ምስ መን'ዩ ደኣ ክዘራረብ?

ሰራዊት እስራኤል ንዝዀነ ላዕለዋይ በዓል ስልጣን ኢራን ዒላማ ክገብር ስልጣን ከም ዝተዋህቦ፣ ተወሳኺ ፍቓድ ከም ዘየድልዮ ሚኒስተር ምክልኻል እስራኤል እስራኤል ካትዝ ኣፍሊጡ'ዩ።

እዚ ዝኸውን ዘሎ፡ ሓይልታት ምክልኻል እስራኤል ንላዕለዋይ በዓል ስልጣን ጸጥታ ኢራን ዓሊ ላሪጃኒን ሚኒስተር ስለያ ኢራን እስማዒል ካቲብን ኣብ ዝርዝር ናይቶም ኣብ ዝሓለፈ ሰሙናት ቀቲለዮም ​​ዝበሎ ላዕለዎት ሰበ ስልጣን ኢራን ድሕሪ ምውሳኹ ድሕሪ ሒደት መዓልታት እዩ።

ካትዝ፡ "ኣነን ቀዳማይ ሚኒስተር ቤንጃሚን ናታንያሁን ንሰራዊት ምክልኻል እስራኤል፡ ተወሳኺ ፍቓድ ከየድለየ፡ ዝዀነ ይኹን ላዕለዋይ ዓንኬል ስለያን ስርሒታውን ዝተዓጽወሉ ላዕለዋይ በዓል ስልጣን ኢራን ከወግድ ስልጣን ሂብናዮ ኣለና፡" ኢሉ።

እዞም ሰበስልጣን ግን ኣብ ውሽጢ መሓውር ስልጣን ኢራን ክሳብ ክንደይ ኣገዳሲ ተራ ነይርዎም? ሕጂ ብውጽኢታዊ መንገዲ መን እዩ ኣዛዚ ዘሎ? መሪሕነት ኢራን ከመይ ከም ዝማዕበለ እንሆ።

ኣያቶላህ ዓሊ ኻሜኒ - ላዕለራዊ መራሒ (ሞይቱ)

ቅትለት ላዕለዋይ መራሒ ኢራን ኣያቶላህ ዓሊ ካመኒ፡ ንብዙሓት ዘሰንብድ ኰይኑ፡ ብ28 ለካቲት ኣመሪካን እስራኤልን ኣብ ልዕሊ ኢራን መጥቃዕቲ ኣብ ዝፈጸማሉ ናይ መጀመርታ መዓልቲ እዩ ተቐቲሉ።

እዚ ወዲ 86 ዓመት መራሒ፡ ነቲ ኣብ 1979 እስላማዊት ሪፓብሊክ ኢራን ዝመስረተ ኣያቶላህ ሩሆላህ ኮመይኒ ድሕሪ ምትካኡ፡ ንልዕሊ30 ዓመታት ዝገዝአ እዩ።

ካመኒ ኩሉ ስልጣን ዘለዎ ቤት ጽሕፈት ይመርሕ ነይሩ - ሓላፊ ሃገርን ዋና ኣዛዚ ዕጡቕ ሓይልታትን ኰይኑ፡ ንኤሊት ሓለዋ ሰውራ ሓዊሱ ይመርሕ ነይሩ።

ዋላ'ኳ ዝዀነ ጉዳይ ህዝባዊ ፖሊሲ ወሳኒ ድምጺ ክህብን ሕጹያት ህዝባዊ ስልጣን ብኢዱ ክመርጽን እንተኸኣለ፡ ምሉእ ብምሉእ ውልቀ መላኺ ኣይኰነን። ኣብ ማእከል ዝተሓላለኸ መርበብ ተወዳደርቲ ማእከላት ስልጣን ንነብሱ ኣቐሚጥዋ ጸኒሑ፤ ኣብ ገለ እዋናት ድማ ዳርጋ ልዕሊ ፖለቲካ ገይሩ ንነብሱ ብምቕራብ፡ ኣብ መንጎ ተሃድሶን ዓቃባውያንን ኢራን ዝነበረ ጐይቂ የህድእ ነይሩ።

ካሜነይ ግን ሳሕቲ እዩ ተቓውሞ ወይ ንሱ ዘይቅበሎ ፖሊሲታት ክምዕብል ዘፍቅድ ነይሩ።

ሞዥታባ ኻመኒ - ላዕለዋይ መራሒ (ብህይወት ኣሎ)

ሞጅታባ ካመኒ፡ ብ8 መጋቢት 2026 ተካኢ ኣቡኡ ተባሂሉ ካብ ዝስመ ንደሓር፡ ብወግዒ ኣብ ህዝባዊ ቦታታት ኣይተራእየን፡ ብካሜራ'ዉን ኣይተሳእለን።

ሚኒስተር ምክልኻል ኣመሪካ ፒት ሄግሰት፡ መርትዖ ከየቕረበ፡ እቲ ሓድሽ ላዕለዋይ መራሒ፡ ኣብቲ ብ28 ለካቲት ኣብ ልዕሊ ቴህራን ዝተፈጸመ ወለዱን ሓዉን ዝቐተለ መጥቃዕቲ "ተጎዲኡን መልክዑ ተበላሽዩን ክኸዉን ይኽእል'ዩ፡" ኢሉ።

ካመኒ፡ ኣብቲ ብመንግስታዊ ተለቪዥን ከም መግለጺ ዝተነበበ ናይ መጀመርታ መደረኡ፡ ብ12 መጋቢት፡ መጻብቦ ሆርሙዝ ንኣህጉራዊ መራኽብ ክዕጾ ምዃኑ ቃል ኣትዩ - እዚ ቀረብ 20% ነዳዲ ዓለም ሓኒቑ ዝሕዝ ውሳነ'ዩ፤ መንግስቱ "ሕነ ምፍዳይ ደም" ናይቶም ኣብቲ ኲናት ዝተቐትሉ ዜጋታት ከም ዘይሓድግ ገሊጹ።

ብ20 መጋቢት፡ መንግስታዊ ቴሌቪዥን ኢራን ንበዓል ሓድሽ ዓመት ፋርስ ናውሩዝ ምኽንያት ብምግባር ካልእ ናይ ጽሑፍ መልእኽቲ ኣንቢባ። ኣብኡ ብልሙድ፡ እዞም መልእኽቲታት ብካሜራ ተቐዲሑ'ዩ ዘሕልፎም ነይሩ።

ዓሊ ላሪጃኒ - ጸሓፊ ላዕለዋይ ቤት ምኽሪ ሃገራዊ ድሕነት (ሞይቱ)

ኣብ መጥቃዕቲ ኣመሪካን እስራኤልን፡ ኣብ ከባቢ ፓርዲስ ቴህራን፡ ብ17 መጋቢት 2026 ምስ ወዱን ሓደ ካብ ምክትላቱን ዝተቐትለ ወዲ 68 ዓመት ዓሊ ላሪጃኒ፡ ድሕሪ ካመኒ ዝተቐትለ ዝለዓለ በዓል ስልጣን ኢራን እዩ።

ኣዛዚ ሓለዋ ሰውራ ነበር ኰይኑ፡ ኣብ 2004 ኣማኻሪ ጸጥታ ካመኒ ቅድሚ ምዃኑ፡ ንዓሰርተ ዓመት ሓላፊ እስላማዊት ሪፓብሊክ ኢራን ብሮድካስቲንግ ኮይኑ ኣገልጊሉ።

ላሪጃኒ፡ ካብ 2005 ክሳብ 2007 ኢራን ምስ ምዕራባውያን እተካይዶ ኣብ ዝነበረት ድርድር ኒዩክሌር ዋና ተደራዳሪ ኰይኑ ሰሪሑ።

እንተዀነ ምስ ናይ ሽዑ ፕረዚደንት ማሕሙድ ኣሕማዲነጃድ ድሕሪ ዘይምርድዳእ ካብ ስልጣኑ ተኣልዩ። ንሱ ኣፈኛ ባይቶ ኢራን ኮይኑ፡ ን12 ዓመታት'ዉን ሰሪሑ።

ላሪጃኒ ኣብ ላዕለዋይ ባይቶ ሃገራዊ ድሕነት እውን ንካመኒ ወኪሉ ከም ዝሰርሐን፡ ነቲ ኣብ ታሕሳስ 2025ን ጥሪ 2026ን ኣብ መላእ ኢራን ዘጋጠመ ተቓውሞታት፡ ንኡስ ወተሃደራት ባሲጅ ሓዊሱ ሓይልታት ጸጥታ ዝወሰዱዎ ስጉቲ ይቈጻጸር ከም ዝነበረ ይግመት።

ኣብቲ ግዜ፡ ብውሑዱ 6,508 ሰልፈኛታት ከም ዝሞቱ፡ 53,000 ድማ ከም ዝተኣስሩ ተሓለቕቲ ሰብኣዊ መሰላት ይገልጹ።

ሪር ኣድሚራል ኣድም ዓሊ ሻምካኒ - ጸሓፊ ቤት ምኽሪ ምክልኻል ኢራን (ሞይቱ)

ናይ ቀረባ ኣማኻሪ ካመኒ፡ ኣብ ምውጻእ ፖሊሲ ጸጥታን ኒዩክለርን ኢራን ቁልፊ ኣካልን እንኮ ሪር ኣድሚራል ኢራንን ዝኾነ ዓሊ ሻምካኒ፡ ኣብቲ ብ28 ለካቲት ኣብ ልዕሊ ቴህራን ዝተፈጸመ መጥቃዕቲ ተቐቲሉ።

ኣብ ሰነ 2025 ኣብ መንጎ እስራኤልን ኢራንን ኣብ ዝተኻየደ ናይ 12 መዓልታት ኲናት ኣብ ልዕሊ ገዝኡ ካብ ዝተፈጸመ መጥቃዕቲ ድሒኑ ነይሩ።

ኣብ እዋን ኲናት ኢራንን ዒራቕን፡ ኣብ 1980ታት፡ ሻምካኒ ሓደ ካብቶም ኣገደስቲ ኣዘዝቲ ሓለዋ ሰውራ እዩ ነይሩ።

ኣብ ዝሓለፉ 40 ዓመታት፡ ሓያሎ ወሰንቲ ጽፍሕታት ዝሓዘ - ሚኒስተር ኮር ሓለዋ እስላማዊ ሰውራ (IRGC)፡ ሚኒስተር ምክልኻል፡ ኣዛዚ ሓይሊ ባሕሪ፡ ከምኡ'ውን ጸሓፊ ላዕለዋይ ቤት ምኽሪ ሃገራዊ ድሕነት - ኣብ ዝሓለፈ ዓመታት ድማ፡ ኣብ ምዕፋን ህዝባዊ ተቓውሞታት ልዑል ተራ ተጻዊቱ።

ሜጀር ጀነራል መሓመድ ፓክፑር – ዋና ኣዛዚ ሓለዋ ሰውራ (ሞይቱ)

ሜጀር ጀነራል መሓመድ ፓክፑር እውን ኣብቲ ብ28 ለካቲት ኣብ ልዕሊ ቴህራን ዝተፈጸመ መጥቃዕቲ ከም ዝተቐትለ መንግስታዊ ማዕከናት ዜና ኢራን ሓቢረን።

ን16 ዓመታት ኣዛዚ ሓይሊ መሬት - ሓለዋ ሰውራ ኢራን ኮይኑ ዝሰርሐ ዀይኑ፡ ቅድሚኡ ዝነበረ ሑሴን ሰላሚ ኣብ ኲናት 12 መዓልታት ድሕሪ ምቕታሉ እዩ፡ ዋና ኣዛዚ ዀይኑ ነይሩ።

ማሱድ ፔዘሽክያን - ፕረዚደንት (ብህይወት ኣሎ)

ማሱድ ፔዘሽክያን ብ6 ሓምለ 2024 ፕረዚደንት ኢራን ኰይኑ ተመሪጹ፡።

12 ኣባላት ዝሓቘፈ ካውንስል መራሕቲ ሃይማኖትን ዳያኑን፡ ዘካይዱዎ መስርሕ ምጽራይ ድሕሪ ምሕላፉ እዩ ፕረዚደንት ኰይኑ።

እቲ ወዲ 71 ዓመት ሓኪም መጥባሕቲ ልቢ ነበርን ኣባል ባይቶ ኢራንን፡ ንፖሊስ ሞራል ኢራን ዝነቅፍ ኰይኑ፡ "ሓድነትን ምትእስሳርን" ኢራን ከጠናኽርን ኢራን ካብ ዓለም ዘጋጠማ "ተነጽሎ" ከብቅዕን ቃል ድሕሪ ምእታዉ ዕግርግር ተፈጢሩ ነይሩ።

ፔዘሽክያን ብ11 መጋቢት 2026 ኣብ ኤክስ ኣብ ዝዘረግሖ ጽሑፍ፡ ኢራን "ኣብቲ ዞባ ንሰላም ዘለዋ ተወፋይነት" ደጊሙ ኣረጋጊጹ።

ድሕሪ ሓሙሽተ መዓልታት ድማ፡ "ማሕበረሰብ ዓለም ነዚ ወራር ክኹንን ወረርቲ ዓለማዊ ሕግታት ከኽብሩ ከእምን ንጽበ" ብምባል፡ ኣንጻር ኣመሪካን እስራኤልን ዓለማዊ ደገፍ ክግበር ጸዊዑ።

መሓመድ ባገር ጋሊባፍ - ኣፈ ጉባኤ ባይቶ ኢራን (ብህይወት ኣሎ)

ኣፈ ጉባኤ ባይቶ ኢራን መሓመድ ባገር ጋሊባፍ ዩኒፎርም ሓለዋ ሰውራ ገዲፉ፡ ሲቪላዊ ክዳን'ኳ እንተተኸደነ፡ ንስርዓት ኢራን ዘለዎ ደገፍ ግን ብግልጺ ኣስሚዑ እዩ።

ብቑዕ ፓይለት ኮይኑ፡ ኣብ ፖለቲካዊ ስልጣን ዓብዪ ጥሙሕ ዘለዎ ምዃኑ ይፍለጥ፤ ኣርባዕተ ግዜ ንፕረዚደንትነት ኢራን ተወዳዲሩ እዩ። እዚ ወዲ 64 ዓመት ሰብኣይ፡ ሕጂ ነቲ ኲናት ኣብ ምምራሕ ቁልፊ ተራ ዝጻወት ዘሎ ይመስል።

ኣብ ልዕሊ ትሕተ ቅርጺ ጸዓት ኢራን ዝተፈጸመ መጥቃዕቲ ስዒቡ፡ ኣብ ኤክስ "ዓይኒኻ ንዘጥፍኣካ ዓይኑ ከተጥፍኦ ምኽኣል ኣብ ግብሪ ኣሎ፤ ሓድሽ ደረጃ ረጽሚ ድማ ተጀሚሩ፡" ክብል ጽሒፉ።

ጋሊባፍ ብሰሉስ 24 መጋቢት 2026 ምስ ኣመሪካ ዝርርብ ከም ዝተገብረ ዝንገር ጸብጻባት እውን መልሲ ሂቡሉ'ዩ፤ "ምስ ኣመሪካ ዝኾነ ድርድር ኣይተኻየደን፡ እዚ ናይ ሓሶት ዜና ድማ ንዕዳጋታት ፋይናንስን ነዳድን ንምትላልን ካብቲ ኣመሪካን እስራኤልን ኣትየንኦ ዘለዋ ረግረግ ንምህዳምን ይጥቀሙሉ ኣለው፡" ክብል ኣብ ኤክስ ጽሒፉ።

"ህዝቢ ኢራን ነቶም ወረርቲ ምሉእን ዘጣዕስን መቕጻዕቲ ክበጽሖም ይጠልብ። ኩሎም ሰበስልጣን ኢራን እዚ ዕላማ ክሳብ ዝዕወት ብድሕሪ ላዕለዋይ መራሒኦምን ህዝቦምን ብጽኑዕ ደው ይብሉ፡" ክብል ጽሒፉ።

ብርጋዴር ጀነራል ጎላምረዛ ሶሌማኒ - ኣዛዚ ባሲጅ (ሞይቱ)

ኣዛዚ ባሲጅ ብሪጅ ጀነራል ጎላምረዛ ሶሌማኒ ብ17 መጋቢት 2026 ኣብ መጥቃዕቲ ኣመሪካን እስራኤልን ከም ዝተቐትለ መንግስታዊ ማዕከናት ዜና ኢራን ሓቢረን።

በርገዴር ጀነራል ኣሕመድ-ረዛ ራዳን - ሓላፊ ፖሊስ (ብህይወት ኣሎ)

ሓላፊ ፖሊስ ብርጋዴር ጀነራል ኣሕመድ ረዛ ራዳን፡ ጽኑዕ ማሕበራዊ ሕግታት ናይ ምትግባርን ተቓውሞታት ናይ ምዕፋንን ሓላፍነት ኣለዎ።

ኣብ 2023፡ ንመካይን ምምንዛዕን ንግዳዊ ትካላት ምዕጻውን ሓዊሱ ሕጊ ሒጃብ ዝጥሕሳ ደቀንስትዮ ንምልላይን ንምቕጻዕን ዝሕግዝ 'ውጥን ኑር' ኣተኣታትዩ።

ኣብዚ ቀረባ እዋን፡ ራዳን ኣንጻር ጸረ ተቓውሞታት ተሪር መርገጺ ብምሓዝ፡ ኣብ ምጅማር እቲ ኲናት፡ ሓይልታቱ ዝኾነ ናብ ጎደናታት ዝወጽአ ሰብ፡ ከም "ጸላኢ" ክወስዱዎ ምዃኖም ኣጠንቂቑ።

ጎላምሆሴን ሞህሰኒ ኤጀይ - ላዕለዋይ ዳኛ ኢራን (ብህይወት ኣሎ)

ኣብ ወርሒ ጥሪ፡ ተሪር መርገጺ ዘለዎ ላዕለዋይ ዳኛ ኢራን ጎላምሆሴን ሞህሰኒ ኤጀይ፡ ኣብቲ ናብቲ ኲናት ዝመርሕ ተቓውሞታት ብዓመጽ ተግባራት ዝተፈርዱ ሰባት "ዝኾነ ምሕረት" ከም ዘይህሉ ኣጠንቂቑ ነይሩ።

ብርጋዴር ጀነራል እስካንዳር ሞመኒ - ሚኒስተር ውሽጣዊ ጉዳያት (ብህይወት ኣሎ)

ካብ ነሓሰ 2024 ጀሚሩ ሚኒስተር ውሽጣዊ ጉዳያት ዝዀነ ብርጋዴር ጀነራል እስካንዳር ሞመኒ፡ ኣብ ሓለዋ ሰውራ ኢራንን ትእዛዝ ፖሊስን እስላማዊት ሪፓብሊክ ኢራን ዓሚቝ ሱር ኣለዎ።

ብርጋዴር ጀነራል እስማዒል ቃኒ - ኣዛዚ ሓይሊ ቁድስ ሓለዋ ሰውራ (ብህይወት ኣሎ)

ብማዕከናት ዜና ኢራን "ጀነራል ሌቫንት" ተባሂሉ ዝፍለጥ ብርጋዴር ጀነራል እስማዒል ቃኒ፡ ኣብ 2020 ኣዛዚ ሓይሊ ቁድስ ሓለዋ ሰውራ ኢራን ኮይኑ።

ኣብ 2012 ክፍሊ ትረዠሪ ኣመሪካ ኣብ ማእከላይ ምብራቕን ኣፍሪቃን ብፍላይ ድማ ናብ ጋምብያ ንዝርከቡ ሓይሊ ቁድስ ንዝግበር ፋይናንሳዊ ሓገዝን ኣጽዋርን ብምክትታል እገዳ ኣንቢሩሉ ነይሩ።

እስማዒል ካቲብ - ሚኒስተር ስለያ (ሞይቱ)

እስማዒል ካቲብ ኣብ 2021 ብፕረዚደንት ኢራን ነበር ኢብራሂም ራይሲ ሚኒስተር ምክልኻል ኢራን ኮይኑ ተመዚዙ።

ዓሊ ካመኒ ሓዊሱ፡ ኣብ ትሕቲ ሓያሎ ላዕለዎት ሃይማኖታዊ መራሕቲ ዝተማህረ ኮይኑ፡ ኣብ ሚኒስትሪ ስለያን ቤት ጽሕፈት ላዕለዋይ መራሒ ኢራንን ዝተፈላለየ ላዕለዎት ጽፍሕታት ሒዙ ነይሩ።

ብመጥቃዕቲ ኣየር እስራኤል ዝተፈጸመ "ቅትለት ካቲብ" ንኢራን "ኣብ ዓሚቕ ሓዘን" ገዲፍዋ ከም ዝነበረ ፔዘሽክያን ብ18 መጋቢት 2026 ገሊጹ።

ሜጀር ጀነራል ዓብዶልራሂም ሙሳቪ - ሓላፊ ጠቕላላ ስታፍ ዕጡቕ ሓይሊ ኢራን (ሞይቱ)

ብተወሳኺ ኣብቲ ብ28 ለካቲት ኣብ ልዕሊ ቴህራን ዝተፈጸመ መጥቃዕቲ ዝተቐትለ ሓላፊ ጠቕላላ ስታፍ ዕጡቕ ሓይሊ ኢራን ሜጀር ጀነራል ዓብዶልራሂም ሙሳቪ ነቲ ኣብ ኲናት 12 መዓልታት ዝተቐትለ ሜጀር ጀነራል መሓመድ ባገሪ ብ12 ሰነ ተኪኡዎ ነይሩ።

ሳደግ ላሪጃኒ - ኣቦ መንበር ቤት ምኽሪ ኣስተብህሎ (ብህይወት ኣሎ)

ሓው ዓሊ ሳድግ ላሪጃኒ ኣቦ መንበር ቤት ምኽሪ ኣስተብህሎ ኮይኑ፡ ኣብ መንጎ ባይቶን ሕገ መንግስታዊ ተቖጻጻሪ ቤት ምኽሪ ሓለዋን ናይ መወዳእታ ዳኛ እዩ።

ዓባስ ኣራግቺ - ሚኒስተር ጉዳያት ወጻኢ (ብህይወት ኣሎ)

ኣብ መንጎ ሚኒስተር ጉዳያት ወጻኢ ዓባስ ኣራግቺን ፍሉይ ልኡኽ ሕቡራት መንግስታት ኣመሪካ ኣብ ማእከላይ ምብራቕ ስቲቭ ዊትኮፍን ናይ ቴሌፎን ዝርርብ ከም ዝተኻየደ ዝገልጽ ጸብጻባት ኣሎ - እዚ ግን ኣዝዩ መባእታዊ ምዃኑ ይግለጽ።

ብ15 መጋቢት 2026 ሚኒስተር ጉዳያት ወጻኢ ዓባስ ኣራግቺ ንሲቢኤስ ኒውስ ኣብ ዝሃቦ ሓበሬታ፡ ኢራን ምስ እስራኤልን ኣመሪካን ኣብ ዝገበረቶ ኲናት "ተኹሲ ደው ምባል ሓቲታ ኣይትፈልጥን" ኢሉ።

"እዚ ብፕረዚደንት ትራምፕን [ኣመሪካን] ዝተገብረ ምርጫ ኲናት'ዩ፡ ነብሰ ምክልኻልና ድማ ክንቅጽል ኢና፡" ክብል ወሲኹ ገሊጹ።

ብረጋዴር ጀገነራል ዓዚዝ ናስርዛደ - ሚኒስተር ምክልኻል (ሞይቱ)

ሚኒስተር ምክልኻል ብርጋዴር ጀነራል ዓዚዝ ናስርዛደ እውን ኣብቲ ብ28 ለካቲት ኣብ ልዕሊ ቴህራን ዝተፈጸመ መጥቃዕቲ ተቐቲሉ።

ንመራሕቲ ኢራን ዒላማ ምግባር እንታይ ኣሳኺዑ?

ውጥን ኣመሪካን እስራኤልን፡ ንስርዓት ኢራን "ንምዕንዛዝን ንምድንጋርን" ከም ዝነበረ፡ ኣቦ መንበር ሓባራዊ ሓለፍቲ ስታፍ ኣመሪካ ዝኾነ ጀነራል ዳን ኬይን፡ እቲ ኲናት ሒደት መዓልታት ምስ ተረፎ ገሊጹ።

ኣብ መጀመርታ እቲ ኲናት፡ መራሕቲ ኣመሪካን እስራኤልን ዝደልዩዎ ዕላማ፡ ስርዓታዊ ለውጢ ምግባር፡ ከም ዝኾነ ይግለጽ ነይሩ።

ዶናልድ ትራምፕ ኣብ ትሩዝ ሶሻል ኣብ ዝጠቅዖ ቪድዮ፡ ኢራናውያን "መንግስትኹም ተቘጻጸሩ" ከብል ጸዊዑ፤ እዚ ስምዒት እዚ ቀዳማይ ሚኒስተር እስራኤል ቤንጃሚን ናታንያሁ ኣብ ቀረባ እዋን ብ19 መጋቢት ዘቃልሖ ኮይኑ፡ ህዝቢ ኢራን "ንክለዓል" ጸዊዑ።

ሰማእትነት ዓቢ ሃይማኖታዊ - ፖለቲካውን - ትርጉም ኣብ ዘለዎ ባህሊ ግን፡ ሞት ናይዞም ላዕለዎት መራሕቲ፡ ኣብ ክንዲ ውድቀት መጠናኸሪ ቀጻልነት እቲ ስርዓትን ሃገርን እዩ ኮይኑ።

ንኣብነት፡ ሞት ዓሊ ኻሜኒ ንህዝቢ ዘርድአ ጋዜጠኛ ኣብ ቴሌቭዥን ይነብዕ እዩ ነይሩ። ሞት እዞም መራሕቲ ሰማእት ዝኾና ነብሲ ናብ ዝያዳ ቅዱስ ቦታ እግዝኣበሄር ከይደን ብዝብል እዩ ተነጊሩ።