Faahfaahinta qaabkii xulka Soomaaliya ay ugu soo gudbeen cayaaraha AFCON 2027

Soomaaliya ayaa xaqiijisay in ay kaalin ku yeelato lugta xigta ee loogu soo baxayo ka qayb galka cayaaraha qaramada Afrika CAF 2027, ka dib markii ay xulka Mauritius ku garaacday rogoorayaal 4-2 ah.

Guushan ayaa timid markii labada kooxood ay cayaartii ku dhex martay fiidnimadii Talaadada garoonka Cote d'Or National Sports Complex isla dhaafi waayeen 0-0, ayadoo ka dibna rigoorayaal lagu kala saaray.

Lugtii hore ee kulankooda ayey isku haleeleen waddanka Mosambiik, halkaasoo ay sidoo kale 0-0 isla dhaafi waayeen.

Inkastoo labada xul ay abuureen fursado muhiim ah haddana Soomaaliya iyo Mauritius midkoodna ma helin wax horumar ah oo ka badan 180 daqiiqo oo kubbadda cagta ah oo ay cayaareen ayagoo aan goolal kala dhalin.

Mauritius oo ku ciyaaraysay gurigeeda lugtii labaad, ayaa u muuqatay inay ka faa'iidaysanayso taageerada ay gudaha ka helayso, balse waxa ay ku dhibtoonayeen inay u beddelaan fursadahooda kuwo miro dhal ah, iyaga oo ku sii socday guul la'aan.

Dhanka kale Soomaaliya ayaa sii waday in ay muujiso hab-difaaceed iyo kalsooni sii kordheysa, taasoo uu kooxda ku wado macallin Yuusuf Cali Nuur, taasi oo xaqiijinaysa in ay si adag u taagnaayeen intii uu socday tartanka.

Labada kooxoodba waxay u muuqatay inay aad isaga ilaalinayeen in uu ka dhaco khalad sababi kara in ay tartanka ka haraan.

Ka dib markii gool la'aan ay ku soo dhamaatay lugtii labaad ayey labada kooxood isla aadeen rigoorayaal.

Soomaaliya waxa ay muujisay in ay aad u dhiifoon tahay inkastoo uu cadaadis haystay, iyada oo afar ka mid ah rigoorayaasha dhalisay, halka Mauritius ay iska khasaarisay fursado muhiim ah.

Kooxda martida loo ahaa ayaa qasaarisay labo rigoore, taasoo u sahashay Soomaaliya in ay fursadaheeda ka faa'iidaysato, ugu dambeyntiina ay ku badisay 4-2.

Xiddigaha Ocean Stars ayaa niyad jabiyay kooxda ka horjeeday si ay u dhamaystiraan shaqada, taas oo ka dhalisay dabaal degyo ciyaartoydooda ay ku faraxsanaayeen markii ay u soo gudbeen wareega xiga.

Natiijadu waxay muujinaysaa horumarka ay Soomaaliya dhawaan ka samaysay cayaaraha qaaradda.

Ka dib markii natiijooyin wax ku ool ah oo ay ka gaareen kulamadii dhawaa, awooddooda u adkeysiga cadaadiska waxay hoosta ka xariiqaysaa horumarkooda sii kordhaya.

Dhanka Mauritius, natiijadu waxay calaamad u tahay dhammaadka niyadjabka ah ee ololahooda, gaar ahaan ka dib markii ay marti galiyeen lugtii labaad iyagoo rajo ka qaba inay soo gudbaan.

Xulka Soomaaliya ayaa hadda u gudbaya marxaladda xigta ee dalalka soo baxay, ayadoo ku biiraysa dalalka ka qayb galaya tartanka la doonayo in loogu gudbo cayaaraha kama dambaysta ah ee AFCON 2027, kuwaasoo ay si wadajir ah u marti gelin doonaan dalalka Kenya, Uganda iyo Tanzania.