ਦੱਖਣੀ ਅਫਰੀਕਾ ਤੋਂ ਮਿਲੀ ਹਾਰ ਨੇ ਕੀ ਭਾਰਤ ਲਈ ਸੈਮੀਫਾਈਨਲ ਦੀ ਰਾਹ ਮੁਸ਼ਕਲ ਕਰ ਦਿੱਤੀ ਹੈ
ਤਸਵੀਰ ਸਰੋਤ, AFP via Getty Images
- ਲੇਖਕ, ਪ੍ਰਵੀਣ
- ਰੋਲ, ਬੀਬੀਸੀ ਪੱਤਰਕਾਰ
- ਪੜ੍ਹਨ ਦਾ ਸਮਾਂ: 7 ਮਿੰਟ
10 ਨਵੰਬਰ 2022, ਇਹ ਉਹ ਤਾਰੀਖ ਸੀ ਜਦੋਂ ਐਤਵਾਰ ਤੋਂ ਪਹਿਲਾਂ ਟੀ-20 ਵਰਲਡ ਕੱਪ ਵਿੱਚ ਭਾਰਤ ਨੂੰ ਹਾਰ ਦਾ ਸਾਹਮਣਾ ਕਰਨਾ ਪਿਆ ਸੀ।
ਇਸ ਤੋਂ ਬਾਅਦ ਟੀਮ ਇੰਡੀਆ ਨੇ ਟੀ20 ਵਰਲਡ ਕੱਪ ਵਿੱਚ ਲਗਾਤਾਰ 12 ਮੈਚਾਂ 'ਚ ਜਿੱਤ ਦਰਜ ਕੀਤੀ। ਇਸ ਦੌਰਾਨ ਟੀਮ ਇੰਡੀਆ ਨੇ ਸਾਲ 2024 ਵਿੱਚ 17 ਸਾਲਾਂ ਦੇ ਲੰਮੇ ਇੰਤਜ਼ਾਰ ਤੋਂ ਬਾਅਦ ਟੀ20 ਵਰਲਡ ਕੱਪ ਦਾ ਖ਼ਿਤਾਬ ਦੁਬਾਰਾ ਜਿੱਤਿਆ ਸੀ।
ਪਰ 22 ਫ਼ਰਵਰੀ ਨੂੰ ਦੱਖਣੀ ਅਫਰੀਕਾ ਦੇ ਖ਼ਿਲਾਫ਼ ਟੀਮ ਇੰਡੀਆ ਨੇ ਇੰਨੀ ਖਰਾਬ ਖੇਡ ਦਿਖਾਈ ਕਿ ਟੀ20 ਵਰਲਡ ਕੱਪ ਦੇ ਇਤਿਹਾਸ ਵਿੱਚ ਦੌੜਾਂ ਦੇ ਹਿਸਾਬ ਨਾਲ ਉਸ ਦੇ ਹਿੱਸੇ ਸਭ ਤੋਂ ਵੱਡੀ ਹਾਰ ਆਈ।
ਅਹਿਮਦਾਬਾਦ ਦੇ ਨਰਿੰਦਰ ਮੋਦੀ ਸਟੇਡੀਅਮ ਵਿੱਚ ਸੁਪਰ-8 ਦੇ ਤੀਜੇ ਮੁਕਾਬਲੇ ਵਿੱਚ ਦੱਖਣੀ ਅਫਰੀਕਾ ਨੇ ਭਾਰਤ ਦੇ ਸਾਹਮਣੇ ਜਿੱਤ ਲਈ 20 ਓਵਰਾਂ ਵਿੱਚ 188 ਦੌੜਾਂ ਦਾ ਟੀਚਾ ਰੱਖਿਆ ਸੀ।
ਪਰ ਹੋਮ ਗਰਾਊਂਡ 'ਤੇ ਲਗਭਗ 90 ਹਜ਼ਾਰ ਦਰਸ਼ਕਾਂ ਦੇ ਸਾਹਮਣੇ ਟੀਮ ਇੰਡੀਆ 18.5 ਓਵਰਾਂ ਵਿੱਚ ਮਹਿਜ਼ 111 ਦੌੜਾਂ ਬਣਾ ਕੇ ਆਲਆਉਟ ਹੋ ਗਈ ਅਤੇ 76 ਦੌੜਾਂ ਨਾਲ ਮੈਚ ਹਾਰ ਗਈ।
ਕਪਤਾਨ ਸੂਰਿਆਕੁਮਾਰ ਯਾਦਵ ਨੇ ਮੈਚ ਤੋਂ ਬਾਅਦ ਸਵੀਕਾਰ ਕੀਤਾ ਕਿ ਉਨ੍ਹਾਂ ਦੀ ਟੀਮ ਤਾਂ ਬੱਲੇਬਾਜ਼ੀ ਕਰਦੇ ਹੋਏ ਪਾਵਰਪਲੇ ਵਿੱਚ ਹੀ ਮੁਕਾਬਲੇ ਤੋਂ ਬਾਹਰ ਹੋ ਗਈ ਸੀ।
ਤਸਵੀਰ ਸਰੋਤ, Getty Images
ਇਸ ਤੋਂ ਪਹਿਲਾਂ ਟੀ20 ਵਰਲਡ ਕੱਪ ਵਿੱਚ ਭਾਰਤੀ ਟੀਮ ਨੂੰ 50 ਦੌੜਾਂ ਤੋਂ ਵੱਧ ਦੇ ਅੰਤਰ ਨਾਲ ਕਦੇ ਹਾਰ ਦਾ ਸਾਹਮਣਾ ਨਹੀਂ ਕਰਨਾ ਪਿਆ ਸੀ।
ਭਾਰਤੀ ਟੀਮ ਨੇ ਭਾਵੇਂ ਗਰੁੱਪ ਸਟੇਜ ਦੇ ਸਾਰੇ ਚਾਰ ਮੈਚ ਜਿੱਤੇ, ਪਰ ਹੁਣ ਇਸ ਹਾਰ ਨੇ ਟੀਮ ਇੰਡੀਆ ਦੀਆਂ ਕਈ ਕਮਜ਼ੋਰੀਆਂ ਨੂੰ ਨਾ ਸਿਰਫ਼ ਉਜਾਗਰ ਕਰ ਦਿੱਤਾ ਹੈ, ਸਗੋਂ ਉਹ ਸ਼ੀਸ਼ਾ ਵੀ ਦਿਖਾਇਆ ਹੈ ਜਿਸ ਨਾਲ ਪਤਾ ਲੱਗਦਾ ਹੈ ਕਿ ਫੇਵਰਿਟ ਦੇ ਟੈਗ ਦੇ ਬਾਵਜੂਦ ਟੂਰਨਾਮੈਂਟ ਵਿੱਚ ਉਸ ਲਈ ਅੱਗੇ ਦਾ ਸਫ਼ਰ ਸੌਖਾ ਨਹੀਂ ਹੋਵੇਗਾ।
ਓਪਨਿੰਗ ਦਾ ਲਗਾਤਾਰ ਫੇਲ ਹੋਣਾ
ਤਸਵੀਰ ਸਰੋਤ, Getty Images
18, 6, 0, 0, 31, 8, 25, 1, 0 ਅਤੇ 0। ਪਿਛਲੇ 10 ਮੈਚਾਂ ਵਿੱਚ ਇਹ ਉਹ ਸਕੋਰ ਹਨ ਜਿਨ੍ਹਾਂ 'ਤੇ ਟੀਮ ਇੰਡੀਆ ਨੇ ਆਪਣਾ ਪਹਿਲਾ ਵਿਕਟ ਗੁਆਇਆ ਹੈ।
ਮਤਲਬ ਇਹ ਹੋਇਆ ਕਿ ਓਪਨਿੰਗ ਵਿੱਚ ਅਭਿਸ਼ੇਕ ਸ਼ਰਮਾ, ਈਸ਼ਾਨ ਕਿਸ਼ਨ ਅਤੇ ਸੰਜੂ ਸੈਮਸਨ ਵਰਗੇ ਆਪਸ਼ਨ ਹੋਣ ਦੇ ਬਾਵਜੂਦ ਭਾਰਤੀ ਟੀਮ ਨੂੰ ਪਿਛਲੇ 10 ਮੈਚਾਂ ਵਿੱਚ ਇੱਕ ਵੀ 50 ਦੌੜਾਂ ਦੀ ਓਪਨਿੰਗ ਸਾਂਝੇਦਾਰੀ ਨਸੀਬ ਨਹੀਂ ਹੋਈ ਹੈ।
ਇਹ ਹਾਲ ਉਸ ਸਮੇਂ ਹੈ ਜਦੋਂ ਵਰਲਡ ਕੱਪ ਤੋਂ ਪਹਿਲਾਂ ਇਸ ਗੱਲ ਦਾ ਬਹੁਤ ਹਾਈਪ ਬਣਿਆ ਹੋਇਆ ਸੀ ਕਿ ਈਸ਼ਾਨ ਕਿਸ਼ਨ ਦੀ ਵਾਪਸੀ ਤੋਂ ਬਾਅਦ ਟੀ20 ਇੰਟਰਨੈਸ਼ਨਲ ਵਿੱਚ ਤਿੰਨ ਸੈਂਕੜੇ ਲਾ ਚੁੱਕੇ ਸੰਜੂ ਸੈਮਸਨ ਨੂੰ ਪਲੇਇੰਗ 11 ਵਿੱਚ ਜਗ੍ਹਾ ਨਹੀਂ ਮਿਲ ਪਾ ਰਹੀ। ਭਾਰਤੀ ਕ੍ਰਿਕਟ ਦਾ ਭਵਿੱਖ ਮੰਨੇ ਜਾ ਰਹੇ ਸ਼ੁਭਮਨ ਗਿੱਲ ਤਾਂ ਟੀਮ ਦੇ 15 ਖਿਡਾਰੀਆਂ ਵਿੱਚ ਵੀ ਜਗ੍ਹਾ ਨਹੀਂ ਬਣਾ ਸਕੇ ਸਨ।
ਪਰ ਸੁਪਰ-8 ਤੱਕ ਪਹੁੰਚਦੇ-ਪਹੁੰਚਦੇ ਭਾਰਤੀ ਓਪਨਰਾਂ ਨੂੰ ਲੈ ਕੇ ਸਵਾਲ ਵੀ ਉੱਠਣ ਲੱਗੇ ਹਨ। ਕਿਉਂਕਿ ਦੂਜੇ ਓਪਨਰ ਅਭਿਸ਼ੇਕ ਸ਼ਰਮਾ ਤਿੰਨ ਮੈਚਾਂ ਵਿੱਚ ਜ਼ੀਰੋ-ਜ਼ੀਰੋ ਤੋਂ ਬਾਅਦ ਦੱਖਣੀ ਅਫਰੀਕਾ ਦੇ ਖ਼ਿਲਾਫ਼ ਕਿਸੇ ਤਰ੍ਹਾਂ ਖਾਤਾ ਖੋਲ੍ਹਣ ਵਿੱਚ ਕਾਮਯਾਬ ਤਾਂ ਹੋਏ ਪਰ 15 ਦੌੜਾਂ ਤੋਂ ਅੱਗੇ ਨਹੀਂ ਵਧ ਸਕੇ।
ਤਸਵੀਰ ਸਰੋਤ, Getty Images
ਓਪਨਿੰਗ ਤੋਂ ਇਲਾਵਾ ਇਸ ਵਰਲਡ ਕੱਪ ਦੌਰਾਨ ਭਾਰਤ ਦੇ ਨੰਬਰ ਤਿੰਨ ਦਾ ਹਾਲ ਵੀ ਕੁਝ ਖ਼ਾਸ ਨਹੀਂ ਹੈ। ਗਰੁੱਪ ਸਟੇਜ ਦੌਰਾਨ ਜਦੋਂ ਤਿਲਕ ਵਰਮਾ ਦੇ ਬੱਲੇ ਤੋਂ ਚਾਰ ਮੈਚਾਂ ਵਿੱਚ ਸਿਰਫ਼ 120 ਦੇ ਸਟ੍ਰਾਈਕ ਰੇਟ ਨਾਲ 106 ਦੌੜਾਂ ਹੀ ਨਿਕਲੀਆਂ ਤਾਂ ਟੀਮ ਵਿੱਚ ਉਨ੍ਹਾਂ ਦੀ ਮੌਜੂਦਗੀ 'ਤੇ ਸਵਾਲ ਉੱਠਣ ਲੱਗੇ।
ਸ਼ਨੀਵਾਰ ਨੂੰ ਮੈਚ ਤੋਂ ਇੱਕ ਦਿਨ ਪਹਿਲਾਂ ਸੂਰਿਆਕੁਮਾਰ ਯਾਦਵ ਤੋਂ ਪ੍ਰੈਸ ਕਾਨਫਰੰਸ ਦੌਰਾਨ ਤਿਲਕ ਵਰਮਾ ਦੀ ਫਾਰਮ ਬਾਰੇ ਸਵਾਲ ਵੀ ਕੀਤਾ ਗਿਆ। ਜਿਸ ਦੇ ਜਵਾਬ ਵਿੱਚ ਸੂਰਿਆਕੁਮਾਰ ਨੇ ਕਿਹਾ ਕਿ ਤਿਲਕ ਵਰਮਾ ਦੀ ਸਮਰੱਥਾ 'ਤੇ ਆਖ਼ਿਰ ਕਿਵੇਂ ਸ਼ੱਕ ਕੀਤਾ ਜਾ ਸਕਦਾ ਹੈ।
ਪਰ ਦੱਖਣੀ ਅਫਰੀਕਾ ਦੇ ਖ਼ਿਲਾਫ਼ ਤਿਲਕ ਵਰਮਾ ਦੋ ਗੇਂਦਾਂ 'ਤੇ ਇੱਕ ਦੌੜ ਬਣਾ ਕੇ ਹੀ ਪਵੇਲੀਅਨ ਪਰਤ ਗਏ ਅਤੇ ਪਾਰੀ ਦੀਆਂ ਪਹਿਲੀਆਂ ਸੱਤ ਗੇਂਦਾਂ ਵਿੱਚ ਦੋ ਵਿਕਟ ਡਿੱਗਣ ਕਰਕੇ ਟੀਮ ਇੰਡੀਆ ਨੂੰ ਵਾਪਸੀ ਦਾ ਮੌਕਾ ਹੀ ਨਹੀਂ ਮਿਲ ਸਕਿਆ।
ਉਂਝ ਤਾਂ ਟੀਮ ਇੰਡੀਆ ਦੀ ਬੱਲੇਬਾਜ਼ੀ ਦਾ ਫਲਾਪ ਸ਼ੋਅ ਟੂਰਨਾਮੈਂਟ ਵਿੱਚ ਅਮਰੀਕਾ ਦੇ ਖ਼ਿਲਾਫ਼ ਪਹਿਲੇ ਮੈਚ ਵਿੱਚ ਹੀ ਸਾਹਮਣੇ ਆ ਗਿਆ ਸੀ, ਜਦੋਂ ਭਾਰਤ ਨੇ 77 ਦੌੜਾਂ 'ਤੇ ਹੀ 6 ਵਿਕਟ ਗੁਆ ਦਿੱਤੇ ਸਨ। ਪਰ ਉਸ ਮੈਚ ਵਿੱਚ ਕਪਤਾਨ ਸੂਰਿਆਕੁਮਾਰ ਯਾਦਵ ਨੇ 49 ਗੇਂਦਾਂ 'ਤੇ 84 ਦੌੜਾਂ ਦੀ ਨਾਬਾਦ ਪਾਰੀ ਖੇਡ ਕੇ ਭਾਰਤੀ ਟੀਮ ਨੂੰ 29 ਦੌੜਾਂ ਨਾਲ ਜਿੱਤ ਦਿਵਾਈ ਸੀ।
ਪਰ ਇਸ ਪਾਰੀ ਤੋਂ ਬਾਅਦ ਕਪਤਾਨ ਸੂਰਿਆਕੁਮਾਰ ਯਾਦਵ ਵੀ ਦੌੜਾਂ ਬਣਾਉਣ ਲਈ ਸੰਘਰਸ਼ ਕਰ ਰਹੇ ਹਨ। ਇਸ ਟੂਰਨਾਮੈਂਟ ਵਿੱਚ ਉਨ੍ਹਾਂ ਨੇ ਪੰਜ ਮੈਚਾਂ ਵਿੱਚ 180 ਦੌੜਾਂ ਬਣਾਈਆਂ ਹਨ। ਪਰ ਇਸ ਦੌਰਾਨ ਉਨ੍ਹਾਂ ਦਾ ਸਟ੍ਰਾਈਕ ਰੇਟ 127 ਹੀ ਰਿਹਾ ਹੈ। ਇਹ ਟੀ20 ਇੰਟਰਨੈਸ਼ਨਲ ਵਿੱਚ ਉਨ੍ਹਾਂ ਦੇ ਕੁੱਲ 162 ਦੇ ਸਟ੍ਰਾਈਕ ਰੇਟ ਨਾਲੋਂ ਕਾਫ਼ੀ ਘੱਟ ਹੈ।
ਉਨ੍ਹਾਂ ਦਾ ਇਸ ਤਰ੍ਹਾਂ ਧੀਮੀ ਬੱਲੇਬਾਜ਼ੀ ਕਰਨਾ ਇਹ ਵੀ ਦਿਖਾਉਂਦਾ ਹੈ ਕਿ ਟਾਪ ਆਰਡਰ ਦਾ ਨਾਕਾਮ ਹੋਣਾ ਕਿਸ ਤਰ੍ਹਾਂ ਭਾਰਤੀ ਬੈਟਿੰਗ ਲਾਈਨਅਪ ਨੂੰ ਦਬਾਅ ਵਿੱਚ ਪਾ ਰਿਹਾ ਹੈ।
ਸਪਿਨ ਦੇ ਖ਼ਿਲਾਫ਼ ਲਗਾਤਾਰ ਸੰਘਰਸ਼ ਕਰਦੇ ਭਾਰਤੀ ਬੱਲੇਬਾਜ਼ਾਂ ਦੀ ਇਹ ਕਮਜ਼ੋਰੀ ਦੱਖਣੀ ਅਫਰੀਕਾ ਦੇ ਖ਼ਿਲਾਫ਼ ਹੋਰ ਵੀ ਉੱਭਰ ਕੇ ਸਾਹਮਣੇ ਆਈ, ਜਦੋਂ 15ਵੇਂ ਓਵਰ ਵਿੱਚ ਕੇਸ਼ਵ ਮਹਾਰਾਜ ਨੇ ਤਿੰਨ ਬੱਲੇਬਾਜ਼ਾਂ ਨੂੰ ਪੇਵਿਲੀਅਨ ਵਾਪਸ ਭੇਜ ਦਿੱਤਾ।
ਭਾਰਤ ਦੇ ਸਾਬਕਾ ਤੇਜ਼ ਗੇਂਦਬਾਜ਼ ਇਰਫ਼ਾਨ ਪਠਾਨ ਨੇ ਵੀ ਮੰਨਿਆ ਹੈ ਕਿ ਵਰਲਡ ਕੱਪ ਦੌਰਾਨ ਭਾਰਤੀ ਬੱਲੇਬਾਜ਼ੀ ਸੰਘਰਸ਼ ਕਰ ਰਹੀ ਹੈ।
ਉਨ੍ਹਾਂ ਨੇ ਸੋਸ਼ਲ ਮੀਡੀਆ ਪਲੇਟਫਾਰਮ ਐਕਸ 'ਤੇ ਪੋਸਟ ਕੀਤਾ, "ਭਾਰਤ ਦਾ ਪ੍ਰਦਰਸ਼ਨ ਬੇਹੱਦ ਨਿਰਾਸ਼ਾਜਨਕ ਰਿਹਾ। ਭਾਰਤੀ ਬੱਲੇਬਾਜ਼ਾਂ ਦੇ ਸੰਘਰਸ਼ ਨੂੰ ਦੱਖਣੀ ਅਫਰੀਕਾ ਦੇ ਗੇਂਦਬਾਜ਼ਾਂ ਨੇ ਐਕਸਪੋਜ਼ ਕਰ ਦਿੱਤਾ। ਭਾਰਤੀ ਬੈਟਿੰਗ ਲਾਈਨਅਪ ਵਰਲਡ ਕੱਪ ਦੌਰਾਨ ਆਪਣੀ ਲੈਅ ਨਹੀਂ ਲੱਭ ਪਾ ਰਹੀ ਹੈ।"
ਕਪਤਾਨ ਦੇ ਫੈਸਲਿਆਂ 'ਤੇ ਵੀ ਸਵਾਲ
ਤਸਵੀਰ ਸਰੋਤ, Getty Images
ਦੱਖਣੀ ਅਫਰੀਕਾ ਦੇ ਖ਼ਿਲਾਫ਼ ਇਸ ਹਾਰ ਤੋਂ ਬਾਅਦ ਕਪਤਾਨ ਸੂਰਯਾਕੁਮਾਰ ਯਾਦਵ ਦੇ ਫੈਸਲਿਆਂ 'ਤੇ ਵੀ ਸਵਾਲ ਉੱਠ ਰਹੇ ਹਨ। ਸਭ ਤੋਂ ਵੱਡਾ ਸਵਾਲ ਤਾਂ ਇਸ ਗੱਲ 'ਤੇ ਉੱਠ ਰਿਹਾ ਹੈ ਕਿ ਆਖ਼ਿਰ ਉਪਕਪਤਾਨ ਹੋਣ ਦੇ ਬਾਵਜੂਦ ਅਕਸ਼ਰ ਪਟੇਲ ਨੂੰ ਦੋ ਮੈਚਾਂ ਤੋਂ ਬਾਹਰ ਕਿਉਂ ਰੱਖਿਆ ਜਾ ਰਿਹਾ ਹੈ।
ਇਸ ਤੋਂ ਇਲਾਵਾ ਜਿਹੜੀ ਇੱਕ ਹੋਰ ਗੱਲ ਦੀ ਚਰਚਾ ਸਭ ਤੋਂ ਵੱਧ ਹੋਈ ਉਹ ਸੀ - ਭਾਰਤ ਦੇ ਟਾਪ 6 ਵਿੱਚੋਂ ਪੰਜ ਬੱਲੇਬਾਜ਼ਾਂ ਦਾ ਲੈਫਟ ਹੈਂਡਰ ਭਾਵ ਖੱਬੇ ਹੱਥ ਦਾ ਬੱਲੇਬਾਜ਼ ਹੋਣਾ। ਮੈਚ ਦੌਰਾਨ ਕਮੈਂਟਰੀ ਪੈਨਲ ਦੇ ਮੈਂਬਰਾਂ ਨੇ ਇਸ ਨੂੰ ਟੀਮ ਇੰਡੀਆ ਦੀ ਖ਼ਰਾਬ ਰਣਨੀਤੀ ਦੱਸਿਆ।
ਮਾਹਿਰਾਂ ਦਾ ਮੰਨਣਾ ਹੈ ਕਿ ਭਾਰਤੀ ਟੀਮ ਦੇ ਇਸ ਫੈਸਲੇ ਕਾਰਨ ਵਿਰੋਧੀ ਟੀਮ ਦੇ ਗੇਂਦਬਾਜ਼ਾਂ ਨੂੰ ਉਨ੍ਹਾਂ ਦੇ ਖ਼ਿਲਾਫ਼ ਰਣਨੀਤੀ ਬਣਾਉਣ ਦਾ ਬਿਹਤਰ ਵਿਕਲਪ ਮਿਲ ਗਿਆ ਅਤੇ ਉਨ੍ਹਾਂ ਨੂੰ ਆਪਣੀ ਗੇਂਦਬਾਜ਼ੀ ਵਿੱਚ ਕੋਈ ਖ਼ਾਸ ਬਦਲਾਅ ਨਹੀਂ ਕਰਨੇ ਪਏ।
ਸਵਾਲ ਇਹ ਵੀ ਹੈ ਕਿ ਜਦੋਂ ਜਸਪ੍ਰੀਤ ਬੁਮਰਾਹ ਨੇ ਆਪਣੇ ਪਹਿਲੇ ਦੋ ਓਵਰਾਂ ਵਿੱਚ ਦੋ ਵਿਕਟ ਲੈ ਕੇ ਦੱਖਣੀ ਅਫਰੀਕਾ ਨੂੰ ਬੈਕਫੁੱਟ 'ਤੇ ਧੱਕ ਦਿੱਤਾ ਸੀ ਤਾਂ ਉਨ੍ਹਾਂ ਨੂੰ ਮੁੜ ਗੇਂਦਬਾਜ਼ੀ ਲਈ ਲਿਆਉਣ ਵਾਸਤੇ 17ਵੇਂ ਓਵਰ ਤੱਕ ਦਾ ਇੰਤਜ਼ਾਰ ਕਿਉਂ ਕੀਤਾ ਗਿਆ।
ਮੈਚ ਤੋਂ ਬਾਅਦ ਕਪਤਾਨ ਸੂਰਿਆਕੁਮਾਰ ਯਾਦਵ ਨੇ ਕਿਹਾ, "ਅਸੀਂ 21 ਦੌੜਾਂ 'ਤੇ ਉਨ੍ਹਾਂ ਦੇ ਤਿੰਨ ਬੱਲੇਬਾਜ਼ਾਂ ਨੂੰ ਪੇਵਿਲੀਅਨ ਭੇਜ ਕੇ ਚੰਗੀ ਸ਼ੁਰੂਆਤ ਕੀਤੀ ਸੀ। ਪਰ 7 ਤੋਂ 15 ਓਵਰਾਂ ਦੇ ਵਿਚਕਾਰ ਉਨ੍ਹਾਂ ਨੇ ਚੰਗੀ ਬੱਲੇਬਾਜ਼ੀ ਕੀਤੀ।"
ਟੀਮ ਇੰਡੀਆ ਲਈ ਸੈਮੀਫਾਈਨਲ ਦੀ ਰਾਹ ਕਿੰਨੀ ਮੁਸ਼ਕਲ?
ਤਸਵੀਰ ਸਰੋਤ, Getty Images
ਟੀਮ ਇੰਡੀਆ 'ਤੇ ਹੁਣ ਦਬਾਅ ਹੋਵੇਗਾ ਕਿ ਉਹ ਸੁਪਰ-8 ਦੇ ਅਗਲੇ ਦੋਵੇਂ ਮੁਕਾਬਲੇ ਨਾ ਸਿਰਫ਼ ਜਿੱਤੇ, ਸਗੋਂ ਵਧੀਆ ਰਨ ਰੇਟ ਦੇ ਆਧਾਰ 'ਤੇ ਜਿੱਤੇ।
ਇੰਨਾ ਹੀ ਨਹੀਂ, ਨਵੇਂ ਸੰਭਾਵਿਤ ਸਮੀਕਰਨਾਂ ਵਿੱਚ ਭਾਰਤ ਨੂੰ ਸੈਮੀਫਾਈਨਲ ਵਿੱਚ ਪਹੁੰਚਣ ਲਈ ਹੋਰ ਟੀਮਾਂ 'ਤੇ ਵੀ ਨਿਰਭਰ ਰਹਿਣਾ ਪੈ ਸਕਦਾ ਹੈ।
ਭਾਰਤ ਨੇ ਆਪਣੇ ਅਗਲੇ ਦੋ ਮੈਚ ਵੈਸਟ ਇੰਡੀਜ਼ ਅਤੇ ਜ਼ਿੰਮਬਾਵੇ ਦੇ ਖ਼ਿਲਾਫ਼ ਖੇਡਣੇ ਹਨ। ਅਜਿਹੇ ਵਿੱਚ ਜੇ ਭਾਰਤੀ ਟੀਮ ਆਪਣੇ ਦੋਵੇਂ ਮੈਚ ਜਿੱਤ ਲੈਂਦੀ ਹੈ ਅਤੇ ਦੱਖਣੀ ਅਫਰੀਕਾ ਵੀ ਆਪਣੇ ਦੋਵੇਂ ਮੈਚ ਜਿੱਤ ਲੈਂਦੀ ਹੈ, ਤਾਂ ਟੀਮ ਇੰਡੀਆ ਦੇ 4 ਅੰਕ ਹੋਣਗੇ ਅਤੇ ਦੱਖਣੀ ਅਫਰੀਕਾ ਦੇ 6 ਅੰਕ, ਜਿਸ ਨਾਲ ਟੀਮ ਇੰਡੀਆ ਆਸਾਨੀ ਨਾਲ ਸੈਮੀਫਾਈਨਲ ਲਈ ਕੁਆਲੀਫਾਈ ਕਰ ਲਵੇਗੀ।
ਜੇ ਭਾਰਤ ਨੂੰ ਇੱਕ ਹੋਰ ਹਾਰ ਮਿਲੀ, ਤਾਂ ਉਸ 'ਤੇ ਵਰਲਡ ਕੱਪ ਤੋਂ ਪੂਰੀ ਤਰ੍ਹਾਂ ਬਾਹਰ ਹੋਣ ਦਾ ਖ਼ਤਰਾ ਹੈ। ਜੇ ਟੀਮ ਆਪਣੇ ਦੋਵੇਂ ਮੈਚ ਜਿੱਤਦੀ ਹੈ ਅਤੇ ਦੱਖਣੀ ਅਫਰੀਕਾ ਨੂੰ ਇੱਕ ਮੈਚ ਵਿੱਚ ਹਾਰ ਮਿਲਦੀ ਹੈ, ਤਾਂ ਅਜਿਹੀ ਸਥਿਤੀ ਵਿੱਚ ਦੋਵੇਂ ਟੀਮਾਂ ਦੇ 4-4 ਅੰਕ ਹੋਣਗੇ।
ਇਸ ਤੋਂ ਇਲਾਵਾ ਦੱਖਣੀ ਅਫਰੀਕਾ ਜਿਸ ਟੀਮ ਤੋਂ ਹਾਰੇਗੀ, ਭਾਰਤ ਦੀਆਂ ਸੰਭਾਵਨਾਵਾਂ ਬਣੀਆਂ ਰਹਿਣ ਲਈ ਜ਼ਰੂਰੀ ਹੋਵੇਗਾ ਕਿ ਉਹ ਟੀਮ ਆਪਣਾ ਅਗਲਾ ਮੁਕਾਬਲਾ ਹਾਰ ਜਾਵੇ। ਮਿਸਾਲ ਵਜੋਂ ਜੇ ਵੈਸਟ ਇੰਡੀਜ਼ ਦੱਖਣੀ ਅਫਰੀਕਾ ਨੂੰ ਹਰਾ ਦੇਵੇ ਤਾਂ ਅਜਿਹੀ ਸਥਿਤੀ ਵਿੱਚ ਜ਼ਿੰਮਬਾਵੇ ਅਤੇ ਵੈਸਟ ਇੰਡੀਜ਼ ਦਾ ਮੁਕਾਬਲਾ ਬਹੁਤ ਮਹੱਤਵਪੂਰਨ ਹੋ ਜਾਵੇਗਾ।
ਫਿਰ ਭਾਰਤ ਨੂੰ ਇਹ ਉਮੀਦ ਕਰਨੀ ਪਵੇਗੀ ਕਿ ਜ਼ਿੰਮਬਾਵੇ ਵੈਸਟ ਇੰਡੀਜ਼ ਨੂੰ ਮਾਤ ਦੇ ਦੇਵੇ। ਅਜਿਹੇ ਵਿੱਚ ਵੈਸਟ ਇੰਡੀਜ਼ ਅਤੇ ਜ਼ਿੰਮਬਾਵੇ ਕੋਲ ਦੋ-ਦੋ ਅੰਕ ਰਹਿ ਜਾਣਗੇ, ਇਸ ਸਥਿਤੀ ਵਿੱਚ ਭਾਰਤ ਅਤੇ ਦੱਖਣੀ ਅਫਰੀਕਾ 4-4 ਅੰਕਾਂ ਨਾਲ ਕੁਆਲੀਫਾਈ ਕਰ ਲੈਣਗੇ।
ਬੀਬੀਸੀ ਲਈ ਕਲੈਕਟਿਵ ਨਿਊਜ਼ਰੂਮ ਵੱਲੋਂ ਪ੍ਰਕਾਸ਼ਿਤ
ਤਾਜ਼ਾ ਘਟਨਾਕ੍ਰਮ
ਦ੍ਰਿਸ਼ਟੀਕੋਣ
ਪਾਠਕਾਂ ਦੀ ਪਸੰਦ
ਸਮੱਗਰੀ ਉਪਲਬਧ ਨਹੀਂ ਹੈ