ټرمپ: که بایډن رسماً بریالی اعلان شو سپینه ماڼۍ پرېږدم

د امریکا ولسمشر ډونلډ ټرمپ ویلي، که ټاکنیز کالج د جو بایډن بریا اعلان کړي، نو دی چمتو دی چې له سپینې ماڼۍ ووځي.

د نوموړي دا څرګندونې د نومبر پر درېیمه د ولسمشرۍ ټاکنو کې د ماتې لومړنی اعتراف ګڼل کېږي.

خو د ټرمپ یوځل بیا د رایو اچولو پرمهال د "درغلیو" په اړه خپلې ادعاوې تکرار کړې دي، چې هېڅ اساس نه لري.

په پام کې ده چې ټاکنیز کالج به د ډیسمبر پر څوارلسمه په ولسمشرۍ ټاکنو کې ګټونکی اعلان کړي.

ټرمپ د شکرانې ادا کولو جوړو شویو مراسمو کې خبریالانو ته وویل، که ټاکنیز کالج د جو بایډن بریا کره کړي، نو دی به له سپینې ماڼۍ ووځي.

خو ټرمپ دا هم ویلي چې ګرانه ده په اوسني وضعیت کې د بایډن لپاره دی خپله ماتې ومني.

نوموړي دا نه دي ویلي چې ایا د بایډن د لوړې مراسمو ته به ورشي او که نه.

ټرمپ ټینګار کړی چې "دغه ټاکنې د درغلیو شاهدې وې"، خو ددې ادعا د ثبوت لپاره یې هېڅ کوم څرګند دلیل لا نه دی وړاندې کړی.

په پام کې ده چې د امریکا منتخب ولسمشر به د راتلونکې جنورۍ پر ۲۰مه لوړه وکړي.‌

څو ورځې وړاندې، ټرمپ د واک د رسمي لېږدېدو هوکړه وکړه.

په داسې حال کې چې امریکا د ژمي پر سختیو سربېره د کورونا وبا له ډېرېدونکې څپې سره مخامخېدونکې ده، منتخب ولسمشر جو بایډن په دې هېواد کې د "تیاره موسم ختمولو" غوښتنه کړې ده.

ښاغلي بایډن د شکرانې ادا کولو مناسبت خپله وینا کې ویلي، امریکا له وېروس سره په جګړه کې ده، نه له یو او بل سر په جنګ کې.