هغه پېغلې چې ناروغي هم ورته پېغور ده

د پاکستان سند ایالت لاړکانه ښار ګوټي یوازینۍ پېژندګلوي دا ده چې د ښار څنګ ته د پاکستان پخوانۍ لومړۍ وزیرې بینظیر بوټو او د هغې د پلار ذوالفقار علي بوټو مقبره ده.

داسې حال کې چې د ښار لارې کوڅې له کثافاتو ډکې دي، د بوټو کورنۍ د مقبرې سپین ګونبدونه په تیاره کې هم له ورایه ځلېږي.

د بي بي سي اردو په 'شي ' نومې خپرونه کې د دغه ښار یو شمېر اوسېدونکې نجونې له خبریالې شمایله جعفري سره د خپلو مسایلو په تړاو غږېدلې دي.

دغه نجونې وايي، ځینې ځايي ښځې ټول عمر د میاشتني عادت له ستونزو ځورېږي، خو د شرم په نامه اجازه نه ورکول کېږي، چې خپله ستونزه له چا سره شریکه کړي.

کوټه: پېغله پر خپلې مور د تېزابو برید په تور نیول شوې

هند: هغه سړی په اعدام محکوم شوی چې پر پېغلې یې تیزاب شیندلي وو

دوی وايي ان د تیو سرطان په اړه خبرې کول په کور کلي کې شرم بلل کېږي او که پېغله نجلۍ نسايي ولادې ډاکټر ته لاړه شي، د دې او کورنۍ ژوند یې د پېغورونو له کبله سخت شي.

یوې محصلې وویل، که پر دې مسایلو خبرې کوي، ورته ویل کېږي، چې د ښځو په روغتیا پسې بلا پسې، خو ته بې شرمه یې ځکه دا خبرې زموږ د مذهب او ارزښتونو خلاف دي.

دغه نجونې وايي د نارینه و چلند او روغتیايي مسایلو د سیمې ښځې پر ذهني ناروغیو اخته کړې دي او هلته چې د بدني ناروغیو درملنه مهمه نه بلل کېږي، د رواني ناروغیو پر لور د هیچا پام نه اوړي.

د کندکوټ سیمې یوې محصلې د بي بي سي خبریالې ته وویل، د دوی په سیمه کې د کم عمرۍ ودونه عام دي او که یې لور په نس وي نو میندوارې ښځې له مناسبو خوړو هم بې برخې کېږي.

سندۍ محصلینې وايي، د سیمې نارینه له کوره بهر د ستړیو ستونزو او ناکامیو سزا خپلو ښځو ته ورکوي او ډېرې ښځې د نارینه و لخوا وهل ټکول کېږي او ټول عمر ذهني او بدني ځور او کړاونه ګالي.

د سیمې یوې هندو محصلې وویل، د واده لپاره د ځایي هندوانو پېغلو په زوره مسلمانولو رپوټونو له خپرېدو وروسته دوی ته کورنۍ اجازه نه ورکوي، چې لوړې زده کړې وکړي.

دغو نجونو د خلکو له لوري پر ښځو د 'ښې ' او 'بدې ' ښځې ټاپې لګولو او دغه راز په لارو کوڅو او بازارونو کې په همدې نومونو د ښځو پر یادونه هم خبرې وکړې.

د نجونو په وینا د کورنیو فشار، 'خلک به څه وايي '، منطق او د مور پلار له لوري نجونو ته د نظر څرګندولو فرصت نه ورکولو له کبله ټولنه کې د ښځو پر ضد فکر له منځه نه شي تلای.

د بي بي سي خبریاله وايي، دغه بحث مې په ذهن کې د سند نجونو په اړه تصور تیت کړ، خو یو فکر څرګند شو او هغه دا چې نجونې بې ډاره خبرې کوي، ښايي غوسه انسان زړور کوي.