شپږو میاشتو کې درې نیم زره ایرانۍ نجونې له کور تښتېدلې

د ایران یو چارواکي وايي، د روان کال لومړیو شپږو میاشتو کې درې زره ایرانۍ نجونې له خپلو کورونو تښتېدلې دي.

د ټولنیزو چارو یو چارواکی حسین اسد بېګی زیاتوي چې د ۱۳۹۵ کال پرتله سږ کال لومړیو شپږو میاشتو کې د ایرانیو پېغلو تېښته ډېره شوې ده.

هغه تسنیم خبري اژانس ته ویلي، چې د ۱۳۹۵ کال کې دوی ته د پنځه زره نجونو د تېتښې خبر رسېدلی دی.

دا د هغو نجونو شمېر ده چی له کور تر تېښتې وروسته یې د ایران د ټولنیزو چارو مرکزونو ته تللې دي، یا رپوټ شوې دي او ښايي ریښتونی شمېر تر دې هم ډېر دی.

چارواکي وايي، سپکاوی، رټل او کورنی تاوتریخوالی د نجونو د تېتښې اصلي لامل دی.

دوی وايي، په تهران کې د نجونو لپاره څلور امن خونې شته، خو دوی یواځې تر دریو اونیو په دې مرکزونو کې پاتېدلی شي.

ایران کې امن خونې د اړمنو او ملاتړ غوښتونکو نجونو لپاره جوړې شوې، خو کمې اسانتیاوې لري.

د دغه هېواد په ایلام ولایت کې د ښځو د ځان سوځونې پېښې خورا ډېرې دي، خو امنخونه یې روان کال کې جوړه شوه، مګر څو میاشتې وروسته پرچاو شوه.