کېري: د مېشت ځایونو له کبله د اسرائیلو راتلونکی له خطر سره مخامخ دی

د امریکا د بهرنیو چارو وزیر جان کېري د اسرائیلي مېشت ځایونو جوړولو غندلو په تړاو د امنیت شورا پرېکړه ستایلې او خبرداری یې ورکړی چې د یهودي دولت په توګه د اسرائیلو راتلونکی خطرناک او د دواړو دولتونو د منحل کېدو لامل کېدای شي.

جان کېري د خپل هېواد د هغې پرېکړې دفاع کړې، چې د اسراییلو خلاف د ملګرو ملتونو پرېکړه لیک د تصویب پر مهال یې رایې کاروونه کې برخه وا نه خیسته. نوموړی وايي دغه پرېکړه د امریکا له ارزښتونو سره سمه وه.

ښاغلي کېري د چهارشنبې پر ورځ سپینه ماڼۍ کې د ملګرو ملتونو پرېکړه لیک له تصویب وروسته د اسراییلو تورونو ته ځواب وایه. د اسراییلو او فلسطین تر منځ د سولې خبرو په اړه ښاغلي کېري وویل، چې دا وروستیو کلونو کې د امریکا له ټولو هڅو سره هم د دوو دولتونو حل اوس له سخت خطر سره مخامخ دی.

د نوموړي په خبره د اسراییلو اوسنۍ پالیسي له کبله د راتلونکي سولې هوکړه له خطره سره مخامخ ده او په خبره یې دغه چاره نه د اسراییلو، نه هم د فلسطین او نه د امریکا په ګټه ده.

ښاغلي کېري وویل که زموږ د سترګو پر وړاندې د دوو دولتونو د عمل وړ حل ته زیان رسېږي، موږ نه شو کولای په سمه توګه د اسراییلو دفاع وکړو.

د ملګرو ملتونو د پرېکړه لیک په اړه د خبرو پر مهال ښاغلي کېري وویل، پرېکړه لیک کې لیکل شوي، چې د مېنو ودانول هېڅ قانوني جواز نه لري، له نړیوال قانونه سرغړاوی دی او د دوو دولتونو د حل پر وړاندې خنډ دی.

کېري وویل، که ټول لوري وغواړي اوس هم پرمختګ کېدای شي. د هغه په وینا د اسراییلو او فلسطین تر منځ تل پاتې سوله د دوو دولتونو په حل پورې غوټه ده.

د جان کېري په وینا هغومره هلې ځلې، چې د اوباما حکومت د اسراییلو د خوندیتوب لپاره وکړې، په تېر کې هېڅ بل حکومت نه دي کړې. د کېري په وینا:

د اسراییلو لومړي وزیر خپله زموږ پر فوق العاده پوځي او استخباراتي مرستو اعتراف کړی.

زموږ پوځي تمرینات د پخوا پرتله لوړې کچې ته رسېدلي دي. په ایرن ډوم نومي دفاعي نظام کې زموږ د مرستې له کبله د بې شمېره اسراییلیانو ځانونه ژغورل شوي دي.

موږ پرلپسې له ځانه د اسراییلو د دفاع حق ملاتړ کړی، چې په کې د غزې فعالیتونو ملاتړ هم شامل دی، چې له کبله یې ډېرې ناندرۍ هم راپورته شوې.

اوباما حکومت تېره اونۍ ملګرو ملتونو کې د اسراییلو خلاف وړاندې شوی پرېکړه لیک نه یوازې دا چې ویټو نه کړ، بلکې رایې کاروونې کې یې هم برخه وا نه خیسته.

د امریکا له دغه اقدامه وروسته اسراییلو پرې سختې نیوکې وکړې او تور یې پورې کړ، چې ګواکې د پردې تر شا امریکا د دغه پرېکړه لیک په تصویب کې رول درلود.

په لومړي سر کې مصر غوښتل هغه پرېکړه لیک وړاندې کړي، خو د امریکا د نوي ټاکل شوي ولسمشر ډونالډ ټرمپ له مداخلې وروسته مصر له دغه کاره پر شا شو او وروسته نیوزلانډ، سینیګال، وینزویلا او مالیزیا دغه پرېکړه لیک وړاندې کړ، چې د رایو په اکثریت ومنل شو.

اسراییلو داسې اشارې څرګندې کړې، چې ګواکې له هغو هېوادونو سره، چې پرېکړه لیک ته یې د تایید رایې ورکړې، خپل اړیکي ساړه کړي.

د ملګرو ملتونو امنیت شورا د اسراییلي مېشت ځایونو خلاف پرېکړه لیک تصویب کړ

ډونالډ ټرمپ اسراییلو ته ویلي، چې 'غښتلي پاتې شي'

ټرمپ: د فلسطین او اسراییل تر منځ سوله به ستره لاسته راوړنه وي

په تېر کې د امریکا متحدو ایالتونو د اسراییلو خلاف ملګرو ملتونو کې وړاندې شوي پرېکړه لیکونه ویټو کړي دي، خو دا ځل د اوباما حکومت د پخوا برعکس دغه پرېکړه لیک ویټو نه کړ.

د امنیت شورا ۱۵ غړو نه ۱۴ د تایید لپاره رایې ورکړه او امریکا په رایې کاروونه کې برخه نه درلوده او دغه پرېکړه لیک یې ویټو نه کړ.