برتانیا کې د پورن فلمونو ویبپاڼې محدودېږي

د برتانیا دولت ویلي، د راتلونکي کال له پیله، هغه کسان چې غواړي پر انټرنیټ د پورن (لوڅ) فلمونو وګوري، باید ثابته کړي چې عمرونه یې له ۱۸ کلونو لوړ دي.

د نوې پرېکړې له مخې، پورن پاڼې باید د ۲۰۱۸ کال له اپرېله د لیدونکو د عمرونو معلومولو سیستم فعال کړي.

دا ګام په مجازي نړۍ کې د ماشومانو د لا خوندي ساتنې په موخه اخیستل شوی.

د پوهانو په خبره، پر زلمکیانو د انټرنټي محدودیتونو لګول مرسته کوي چې هغوی د ټولنیزو رسنیو له ضررونو په امان وي.

په ۲۰۱۸ کال کې به ټول هغه کسان چې غواړي د لوڅو فلمونو پاڼو ته ننوځي، باید خپل ټول معلومات وړاندې کړي.

هغه پورن پاڼې چې له نوي قانونه سرغړونه وکړي، د انټرنټي خدمتونو د وړاندې کوونکو ادارو له خوا به یې پاڼې وتړل شي.

په برتانیا کې د پورن پاڼو د چاڼ مسله په ۲۰۱۶ کې راپورته شوه چې اوس به یې د دغه هېواد د ډیجیټلي چارو وزارت مسوده ولسي جرګې ته وړاندې کړي.

له ماشومانو د ملاتړ بنسټ د ۲۰۱۶ کال په راپور کې کښلي "د زلمکیانو له خوا د پورن (لوڅو) فلمونو ليدل، شونې ده د هغوی پر روزنه او شخصیت ناوړه اغېز وکړي ".

د دغه بنسټ د راپور له مخې، هغه ځوانان چې عمرونه یې ۱۵ - ۱۶ دي، ۶۵ سلنو او هغه ځوانان چې عمرونه یې له ۱۱ تر ۱۶ کلونو دي، ۴۸ سلنو یې لوڅ فیلمونه لیدلي دي.

د تر سره شوې څېړنې له مخې، ۲۸ سلنه ځوانان اصلن د نور څه په پلټلو بوخت دي، چې پر پورن پاڼو ور پېښ شوي، خو ۱۹ سلنه نور بیا په لوی لاس پورن پاڼو ته ننوتلي دي.