د انګور اډې لار د ګاډو لپاره پرانیستل شوه
د عکس سرچینه، .
پر ډېورنډ کرښه د انګور اډې تګ راتګ لاره د ګاډو پر مخ پرانیستل شوې ده. جنوبي وزیرستان کې ځايي چارواکو ویلي له دواړو لوریو یو شمېر ګاډي له دروازې تېر شوي دي. د تګ راتګ دغه لار د فبرورۍ پر ۱۷ نېټه د پاکستان سند ایالت په یوه زیارت کې له چاودنې وروسته چمن او تورخم سره یو ځای تړل شوې وه.
د بي بي سي خبریال عزیزالله خان وايي، څو ورځې وړاندې د دواړو هېوادونو چارواکو انګوره اډه کې غونډه کړې او د لارې پرانیستلو هوکړه یې کړې ده.
تېره ورځ لومړی د پاکستان له لوري دروازه پرانیستل شوه او له هغه وروسته افغان چارواکو هم ګاډو ته د تګ راتګ اجازه ورکړه.
تېره ورځ پاکستاني چارواکو ټانک سیمه کې هغه ګاډي څښتنانو ته وسپارل، چې انګور اډه کې نیول شوي وو. دغه ګاډي د یوې جرګې لارې څښتنانو ته سپارل شوي، چې دغه جرګه کې ځايي مخورو، سیاسي چارواکو او پوځیانو ګډون کړی و.
د انګور اډې له لارې هره ورځ له ۴۰ تر ۵۰ پورې ګاډي تګ راتګ کوي، خو د پلي مساپرو لږ شمېر له دغې لارې ځي راځي.
د کرښې دواړو لوریو ته مېشت خلک د لارې تړل کېدو له کبله معمولاً له سختو کړاوونو سره مخامخېږي. انګوره اډه او شاوخوا سیمه کې یې سلیمان خیل، وزیر، مسېد او دوتاڼي مېشت دي.
مهم خبرونه
تر ټولو ډېر لوستل شوي
منځپانګه نه شته