ژوندۍ پاڼه, د سپاه پاسداران د استخباراتو مشر مجید خادمي د امریکا او اسرائيل په برید کې وژل شوی

ژوندی پوښښ

1. ۱ ساعت وړاندېوروستی, نتنیاهو: د قدس ځواک د ۸۴۰مې قطعې قوماندان مو هم وژلی دی

   د اسرائیل لومړی وزیر بنیامین نتنیاهو وايي د سپاه پاسداران د استخباراتو پر مشر مجید خادمي سربېره یې د قدس ځواک د ۸۴۰مې قطعې قوماندان 'اصغر باقري' هم وژلی دی.

   نتنیاهو پر ایکس پاڼه لیکلي، چې باقري د ایران د حکومت د جګپوړو پوځيانو له ډلې و او دا چې د اسرائیلیانو په وژلو کې یې لاس درلود.

   د اسرائيل ټایمز رسنۍ د پوځي سرچینو په حواله لیکلي چې د نوموړي اصلي نوم "یزدان میر" او په "سردار باقري" مشهور و.

   نتنیاهو ټینګار کړی چې "موږ ځواکمن او په کلک هوډ عمل کوو او هر هغه کس به تعقیب کړو چې غواړي موږ ته زیان ورسوي."

   ۲۰۲۵ کال کې اروپايي شورا د محمد انصاري په نوم کس د سپاه پاسداران د بهرنۍ څانګې یا قدس ځواک د ۸۴۰مې قطعې مشر بللی او پر هغه یې بندیزونه لګولي وو.‌

   دې شورا ویلي چې نوموړي د هغو بهر مېشتو ژورنالیستانو د ترور امر صادر کړی چې د ایران پر حکومت نیوکې کوي.

2. ۲ ساعتونه وړاندېد سپاه پاسداران د استخباراتو مشر د امریکا او اسرائيل په برید کې وژل شوی دی

   د ایران سپاه پاسداران ځواکونو تایید کړې چې د دوی د استخباراتو مشر مجید خادمي د امریکا او اسرائيل په برید کې وژل شوی دی.

   په دې تړاو خپره شوې اعلامیه کې ویل شوي چې ښاغلی خادمي نن (دوشنبه) سهار وژل شوی.

   د یادونې ده چې اسرائیل او امریکا تېره شپه او نن سهار وخته د تهران په ګډون د ایران بېلابېلو ښارونو کې درانه هوايي بریدونه کړي دي.

   مجید خادمي تېر کال د سپاه پاسداران د استخباراتي څانګې د مخکیني مشر محمد کاظمي تر وژل کېدو وروسته پر دې دنده ګومارل شوی و.

   ښاغلی کاظمي د تېر لمریز کال په غبرګولي/جوزا کې له خپلو درېیو مرستیالانو سره یو ځای د اسرائیل په برید کې وژل شوی و.

3. ۳ ساعتونه وړاندېوروستی, رویټرز: پاکستان امریکا او ایران ته د اوربند یوه طرحه وړاندیز کړې ده

   رویټرز د یوې باخبره سرچینې په حواله وايي چې د امریکا متحدو ایالتونو او ایران له جګړې د لاس اخیستلو په تړاو له پاکستانه یوه طرحه ترلاسه کړې ده.

   دې سرچینې ویلي، چې تېره شپه د دې طرحې په تړاو له تهران او واشنګټن سره نظر تبادله شوی.‌

   ویل کېږي د دې طرحې له مخې په دوو پړاو کې لومړی د سملاسي اوربند او ورپسې د یوې جامع هوکړې وړاندیز شوی دی.‌

   دې سرچینې ویلي "نن باید پر ټولو عناصور هوکړه وشي."

   ویل شوي چې په لومړي سر کې به یو هوکړه‌لیک تنظم شي، چې د پاکستان لخوا له بریښنايي لارې وروستی کېږي.‌

   دې سرچینې رویټرز ته ویلي، د پاکستان د پوځ لوی درستیز عاسم منیر "ټوله شپه" د امریکا له مرستیال ولسمشر جی‌ډي وېنس، منځني ختیځ لپاره د ټرمپ له ځانګړي استازي سټیف ویتکاف او د ایران له بهرنیو چارو وزیر عباس عراقچي سره په اړیکه کې و.

   تهران او واشنګټن لا رسمآ په دې تړاو څه نه دي ویلي.

   تېره روځ اکیسوس رسنۍ د امریکایي، اسرائيلي او سیمه‌ییزو سرچینو په حواله رپوټ ورکړی و، چې ایران، امریکا او سیمه‌ییز منځګړي د جګړې پای ته رسولو هوکړې د یوې برخې په توګه د ۴۵ ورځني اوربند په تړاو پر خبرو بوخت دي.

   اکسیوس ویلي وو چې دا هوکړه به په دوو پړاو کې پلې شي.

4. ۴ ساعتونه وړاندېوروستی, د ایران لخوا د متحدو عرب اماراتو پر فجیره د ډرون برید شوی

   په متحدو عرب اماراتو کې د فجیره بندر چارواکو د ایران د ډرون برید له کبله د 'پېښې' خبر ورکړی دی.

   چارواکو ویلي، دغه ډورن د "دو" شرکت د ودانۍ پر خوا روان و.

   په دې تړاو خپره شوې اعلامیه کې دا نه دي ویل شوي چې ایا ډرون د شرکت پر ودانۍ لګېدلی که څنګه، خو ویل شوي چې مرګژوبله نه ده اوښتې.

   'دو' په متحدو عرب اماراتو کې مخابراتي او نشراتي خدمات وړاندې کوي.

5. ۴ ساعتونه وړاندېوروستی, د تېرې شپې بریدونو کې ۶ ماشومان هم وژل شوي

   په تهران کې د بېړنیو روغتیايي مرستو ادارې اعلان کړی چې د امریکا او اسرائيل د تېرې شپې بریدونو کې شپږ ماشومان هم وژل شوي دي.

   د ایراني رسنیو په وینا په وژل شویو کې څلور کوچنۍ نجونې او دوه له لس کلونو کم عمره هلکان دی.

   مخکې ویل شوي وو چې د تېرې شپې بریدونو کې د تهران په بهارستان ولسوالۍ کې ۱۳ ملکي کسان وژل شوي دي.

6. ۴ ساعتونه وړاندېوروستی, له ایران سره د امریکا او اسرائیل د جګړې ۳۸مه ورځ؛ تهران کې سخت بریدونه شوي

   امریکا او اسرائيل نن دوشنبه له ایران سره د جګړې پر ۳۸مه ورځ د تهران بېلابېلو برخو کې سخت هوايي بریدونه کړي دي.

   په خپرو شویو تصویرونو کې ښکاري چې د تهران په لوېدیځ کې له ځینو سیمو لوګي پورته کېږي.

   په دغو بریدونو کې د شریف صنعتي پوهنتون ځینې برخې هم په نښه شوې دي.‌

7. ۵ ساعتونه وړاندېد ټرمپ له خوا ایران ته د نوي ضرب الاجل له اعلان وروسته په نړیوال بازار کې د یو بېرل خامو تېلو بیه ۱۱۰ ډالرو ته ختلې

   د تېلو بیې وروسته له هغه یو ځل بيا لوړې شوې چې د هرمز تنګي د نه پرانيستلو په صورت کې د امریکا ولسمشر ډونلډ ټرمپ د ایران د انرژۍ پر مرکزونو او پلونو د بریدونو ګواښ وکړ.

   د دوشنبې په ورځ په نړیوال بازار کې د يو بېرل خامو تېلو بیه ۱۱۰ ډالرو ته ورسېده.

   د امریکا ولسمشر ډونلډ ټرمپ تېره شپه پر ټولنیزو رسنیو یو سخت بيان خپور کړ او ګواښ یې وکړ چې که ایران د سې ‌شنبې تر ټاکلي وخت پورې د ټولو بېړيو پر مخ د هرمز تنګي پرانستلو ته غاړه کېنږدي د ایران د انرژۍ مرکزونه او پلونه به ویجاړ کړي.

   ایران د هرمز مهم تنګي له لارې عادي ترانسپورتي تګ راتګ درولی، چې له امله یې د نړۍ په کچه د تېلو بیې لوړې شوې او په ټوله نړۍ کې د لوړې کچې انفلاسیون وېره زیاته شوې ده.

   که څه هم څو ځله ځينو ایراني چارواکو ویلي چې دغه لاره بنده نه ده او یوازې د "دښمنو هېوادونو" پر مخ تړل شوې ده.

8. ۶ ساعتونه وړاندېد اسرائیلو په حیفا کې د ایران توغنديز برید له امله دوه کسان ووژل شوي

   اسرائیلي رسنیو راپور ورکړی چې د یکشنبې په ورځ د ایران د توغندیو له امله په حيفا ښار کې دوه تنه وژل شوي دي.

   د راپورونو له مخې د يوې استوګنيزې ودانۍ له کنډوالو د دوو کسانو جسدونه رايستل شوي دي.

   د جګړې له پیل راهیسې، د اسرائیلو پر بېلابېلو ښارونو د ایران د توغنديو بریدونه روان دي.

9. ۸ ساعتونه وړاندېایران کې سهار وختي د شويو بریدونو عکسونه

10. ۸ ساعتونه وړاندېد بریتانیا د دفاع وزارت وايي د شپې یې "څو ایراني بې پیلوټه الوتکې" ویشتلې دي

    د بریتانيا د دفاع وزارت په یوه خبرپاڼه کې ویلي چې د دغه هېواد شاهي هوايي ځواک د شپې لخوا "څو ایراني ډرونونه" ویشتلي دي.

    په بیان کې ویل شوي چې د بریتانیا ټایفون او اېف ۳۵ جنګي جیټ الوتکو دفاعي ماموريتونه د ختیځې مدیترانې، اردن، بحرین او متحده عربي اماراتو په اوږدو کې دوام لري. دا عملیات د شاهي هوايي ځواک وایجر ټانکر الوتکو او شاهي سمندري ځواکونو مرلین او وایلډ کیټ چورلکو په مرسته ترسره کېږي.

    د دفاع وزارت دا هم ویلي چې "په سیمه کې د ځواکونو د ساتنې تدابیر په لوړه کچه دي" او دا چې بریتانيا له خپلو "متحدینو سره نژدې کار ته دوام ورکوي."

11. ۱۶ وری ۱۴۰۵ - ۵ اپریل ۲۰۲۶ټرمپ ګواښ کړی چې که د هرمز تنګی تر سې شنبې خلاص نه شي د ایران د انرژۍ مرکزونه او پلونه به په نښه شي

    د امریکا ولسمشر ډونلډ ټرمپ پر ټولنیزو رسنیو یو سخت بيان خپور کړی او ګواښ یې کړی چې که ایران د سې ‌شنبې تر ټاکلي وخت پورې د ټولو بېړيو پر مخ د هرمز تنګي پرانستلو ته غاړه کېنږدي د ایران د انرژۍ مرکزونه او پلونه به ویجاړ کړي.

    نوموړي خپل پخوانی ګواښ چې پر ایران به "دوزخ" جوړ کړي یو ځل بیا تکرار کړی دی خو امریکاييرسنیو ته یې ويلي چې له تهران سره د یوې هوکړې د کېدو "ډېره شونتيا" شته ده.

    ټرمپ دغه تازه ګواښ وروسته له هغه کړی چې په ایران کې د پرځول شوې جنګي الوتکې د عملي دويم غړي د امریکا د پوځ له خوا له یو لړ عملياتو وروسته وژغول شو.

    ایران د هرمز مهم تنګي له لارې عادي ترانسپورتي تګ راتګ درولی، چې له امله یې د نړۍ په کچه د تېلو بیې لوړې شوې او په ټوله نړۍ کې د لوړې کچې انفلاسیون وېره زیاته شوې ده.

    د هرمز تنګي تړل کېدو ټرمپ دې ته اړ کړ چې د مارچ په میاشت کې ایران ته د دې لارې د پرانيستل کېدو لپاره ضرب الاجلونه اعلان کړي او د يکشنبې په ورځ یې پر ټروت شول یو ځل بيا دا غوښتنه د نېټې غځېدو سره په خوار سختو ټکو تکرار کړه.

    که څه هم څو ځله ځينو ایراني چارواکو ویلي چې دغه لاره بنده نه ده او یوازې د "دښمنو هېوادونو" پر مخ تړل شوې ده.

12. ۱۶ وری ۱۴۰۵ - ۵ اپریل ۲۰۲۶ایرانۍ رسنۍ وايي په تېرو ۲۴ ساعتونو کې ۱۵ بېړۍ له هرمز تنګي تېرې شوې دي

    د ایران فارس نيوز اېجنسي چې د دغه هېواد د اسلامي انقلابي ګارډ له ځواکونو سره تړاو لري ویلي، په تېرو ۲۴ ساعتونو کې ۱۵ بېړۍ د هرمز له تنګي د "ایران په اجازه" تېرې شوې دي.

    دوی وايي د جګړې له پيله مخکې پرتله د بېړیو لېږد لا هم ۹۰ سلنه کم دی.

    ځينې ايراني چارواکي چې د بهرنيو چارو وزير عباس عراقچي هم په کې شامل دی څو ځله ویلي چې دغه لاره بنده نه ده او یوازې د "دښمنو هېوادونو" پر مخ تړل شوې ده.

    د یادونې وړه ده، پرون ایراني چارواکو اعلان وکړ چې پر عراق دا محدوديتونه نه پلي کېږي.

    ایران همدا ډول پر هغو بېړيو چې له هرمز تنګي تېرېږي د محصول لګولو خبره هم کړې ده.

    تردې وړاندې د ایران د ولسمشر دفتر یوه سلاکار ويلي وو، "کله چې د محصول یوه برخه د جګړې له کبله د رامنځته شوي ټول زيان د جبران لپاره وکارول شي د هرمز تنګی به بېرته پرانيستل شي".

13. ۱۶ وری ۱۴۰۵ - ۵ اپریل ۲۰۲۶د اسرائیلو په حیفه ښار توغنديز برید کې څلور کسان ټپیان شوي دي

    د اسرائیلو د بېړنیو چوپړونو ادارې ويلي چې شمالي ښار حیفه کې د توغنديز برید له کبلهڅلور کسان ټپیان شوي دي.

    یادې ادارې ویلي، په ټپیانو کې یو ۸۲ کلن کس هم شامل دی چې د یوه درانه څيز د لګېدو له کبله سخت ټپي شوی دی. په خبرپاڼه کې ویل شوي چې دری نور کسان د توغندي د ټوټو او چاودنې له کبله لږ ټپيان شوي دي.

    د بېړنیو چوپړونو ادارې د پېښې د ځای انځورونه هم خپاره کړي دي.

14. ۱۶ وری ۱۴۰۵ - ۵ اپریل ۲۰۲۶وروستی, عمان وايي د هرمز تنګي په اړه له ایراني چارواکو سره په غوراويو غږېدلي

    عمان وايي له ایراني چارواکو سره د غونډې په ترڅ کې یې د هرمز تنګي له لارې د "لېږد ډاډمنولو" لپاره په غوراويو بحث کړی دی.

    د مسقط په وینا، د دواړو خواوو کارپوهانو په غونډه کې "څو نظرونه او وړاندیزونه" شریک کړي چې په وینا یې عمان اوس د دې وړاندیزونو بیا کتنه کوي.

    په ورته وخت کې، متحده عربي اماراتو ویلي، چمتو دی چې د هرمز تنګي کې د "امنیت ډاډمنولو" لپاره "د امریکا په مشرۍ له هر ډول هڅې" سره یوځای شي.

    د متحده عربي اماراتو د ولسمشر سلاکار انور محمد قرقاش ويلي، د جګړې پرمهال د ګاونډیو هېوادونو په نښه کېدو "یوازې په منځني ختیځ کې د امریکا او اسرائیلو دریځ او نفوذ پیاوړی کړی دی."

15. ۱۶ وری ۱۴۰۵ - ۵ اپریل ۲۰۲۶سنېټکام: د جنګي الوتکې د نسکورېدو وروسته د دوو امریکایي سرتېرو د ژغورنې عملیات بشپړ شول

    د امریکا مرکزي قوماندې (سېنټکام) تائید کړې چې په ایران کې د جنګي الوتکې له نسکورېدو وروسته د الوتکې د عملې د ژغورولو عمليات پايته رسېدلي دي.

    په بيانيه کې ويل شوي، "د اپرېل پر څلورمه امریکايي ځواکونو په بریاليتوب سره د امریکا د پوځ د دوو غړو چې د اپرېل پر دويمه د جنګي ماموريت پر مهال یې اېف ۱۵ جنګي الوتکه نسکوره شوې وه د ژغورنې عمليات بشپړ شول".

    په بيان کې راغلي چې دا دوه کسان په دوو جلا عملياتو کې له ایرانه په "خوندي ډول" ايستل شوي دي.

    د خبرپاڼې له مخې "په ایران کې د امریکا بریدونه وام لري".

16. ۱۶ وری ۱۴۰۵ - ۵ اپریل ۲۰۲۶د اسرائیلو د دفاع وزیر د ایران پر ملکي بنسټونو دنورو بریدونو ګواښ کړی

    د اسرائیلو د دفاع وزیر اسرایل کاټز د یکشنبې پر ورځ یوه بیان کې ویلي " که ایران د امریکا او اسرائیلو د بریدونو په ځواب کې پر اسرائیلو بریدونو ته دوام ورکړ دوی به د ایران مهم بنسټونه په نښه کړي." دغه اسرائیلي چارواکي د ایراني مشرانو د وژلو ګواښ هم تکرار کړی دی.

    ده وویل " تر څو چې توغندي را توغول کېږي او اسرائیل په نښه کېږي تر هغې به یې ایران لوړه بیه پرې کوي چې په نتیجه کې به یې ملي بنسټونه ویجاړ او د نظام وړتیاوې کمزوري کېږي."

    د فبرورۍ په ۲۸مه پر ایران د بریدونو له پیل راهیسې ایران کې یو شمېر سیاسي او پوځي مشران په نښه شوي چې په کې د ایران ستر مذهبي مشر ایت الله خامنه یي هم شامل دی. د دې تر څنګ اسرائیلو او امریکا ایران کې ګڼ صنعتي بنسټونه، پلونه او ولسي ځایونه هم له منځه وړي دي.

17. ۱۶ وری ۱۴۰۵ - ۵ اپریل ۲۰۲۶ټرمپ " ډېرامکان " شته چې سبا ته یو جوړجاړی وشي

    د امریکا فاکس نیوز تلویزون سره مرکې کې د امریکا ولسمشر ډونالډ ټرمپ ویلي دي " د تېلو ترلاسه کولو لپاره د هر څه الوزولو" باندې فکر کوي. خو دې سره هم مهاله دې مرکې کې ټرمپ ویلي ددي " ډېرامکان " شته چې سبا ته به یو جوړجاړی وشي.

18. ۱۶ وری ۱۴۰۵ - ۵ اپریل ۲۰۲۶ټرمپ له ښکنځلو ډک یوه پوسټ کې له ایرانه غوښتي چې د هرمز تنګی پرانېزي

    د امریکا ولسمشر ډونالډ ټرمپ پر ټروت سوشل له ښکنځلو ډک یو پوسټ کې ایران ته خبرداری ورکړی دی چې د هرمز تنګی پرانیزي.

    ډونالډ ټرمپ د ملکي تاسیساتو په نښه کولو ته اشاره کوي او ایران ته وايي" که چېرې تهران د هرمز تنګي له پرانېستلو ډډه وکړي ایران به ډېر بد حالت سره مخامخ کېږی".

    ټرمپ ایران ته دوشنبې تر ورځې د هرمز تنګي دپرانېستلو ضرب الاجل ورکړی دی. د جګړې له پیله دا تنګی عملا تر ډېره بند دی.

19. ۱۶ وری ۱۴۰۵ - ۵ اپریل ۲۰۲۶ایراني ځواکونه وايي څلور نورې امریکایۍ الوتکې یې رانسکورې کړې

    ایراني ځواکونه وايي د امریکا د اېف‌۱۵ جنګي جټ د عملې دویم غړي د ژغورنې عملیاتو لپاره ورغلې دوه بلک‌هاک چورلکې او دوه سي‌۱۳۰ ترانسپورتي الوتکې یې په اصفهان کې رانسکورې کړې دي.

    تر دې ورمخکې نیویارک ټایمز د امریکا د یوه پوځي چارواکي په حواله لیکلي و چې په دغو عملیاتو کې لسګونو الوتکو او "سلګونو ځانګړو ځواکونو" برخه اخیستې وه او له تخنیکي ستونزو سره مخ شوې دوه ترانسپورتي الوتکې یې له دې کبله پخپله الوځولې چې د ایرانیانو لاس ته ورنه شي.

    ‌د یادونې ده چې د امریکا ولسمشر ډونلډ‌ټرمپ نن اعلان وکړ چې د اېف۱۵ جټ د عملې دویم غړی هم ژغورل شوی او دا چې په دغو عملیاتو کې ان یوه امریکايي ته هم مرګژوبله نه ده اوښتې.

20. ۱۶ وری ۱۴۰۵ - ۵ اپریل ۲۰۲۶وروستی, حزب‌الله: د لبنان سواحلو ته نږدې مو د اسرائیل یوه بېړۍ په نښه کړې ده

    حزب‌الله غورځنګ وايي، د لبنان د سواحلو په ۱۱۰ کیلومترۍ کې یې د اسرائيل پر یوه جنګي بېړۍ د کروز توغندي برید کړی دی.

    دا له ایران سره د امریکا او اسرائيل د روانې جګړې له پیل راهیسې لومړی ځل دی چې حزب‌الله د داسې برید رپوټ ورکوي.

    دې لبنانۍ ډلې ویلي، چې د اسرائيل دغې بېړۍ د دوی پر خاوره برید ته چمتووالی کاوه.

    د اسرائيل پوځ تر اوسه د دغه برید په اړه څه نه دي ویلي.