ایران ګواښ کړی چې که تاوتریخوالی دوام وکړي، سیمه به د امریکا او اسرائیلو لپاره "دوزخ" وګرځي
د ایران د وسله والو ځواکونو د همغږۍ د تر ټولو لوړې عملياتي قوماندې یوه ویاند امریکا او اسرائیلو ته خبرداری ورکړی چې که تاوتریخوالی زيات شي، ټوله سيمه به د هغوی لپاره په "دوزخ بدله" شي.
ابراهيم ذوالفقاري د خاتم الانبيا مرکزي قرارګاه ویاند ويلي، "که تاوتریخوالی زيات شي، ټوله سيمه به ستاسو لپاره په دوزخ بدله شي د ایران د اسلامي جمهوريت د ماتولو سراب به داسې شي چې تاسو به په کې ډوب شي".
همدا ډول د خاتم الانبيا قرارګاه قومندان علي عبداللهي هم ګواښ کړی چې د "دوزخ دروازې" به د امریکا او اسرائیلو پر مخ پرانيستل شي.
دوی دغه څرګندونې وروسته له هغه کړې چې د امریکا ولسمشر ډونلډ ټرمپ ويلي وو ایران ۴۸ ساعته وخت لري چې یا تړون وکړي او یا د هرمز تنګی پرانيزي، "که نه دوزخ به پرې جوړ کړي."
عبداللهي د امریکا ولسمشر ډونلډ ټرمپ یو "یرغلګر او جګړه غوښتونکی" ولسمشر بللی او د هېواد پر زېربناوو د برید ګواښ يې "نامتوازن او احمقانه" ګام یاد کړی دی.
نوموړی ويلي، که امریکا د ایران پر زيربناوو برید وکړي نو تهران به د امریکا د پوځ او اسرائیلو له لوري کارېدونکې زېربناوې "له کوم محدوديت پرته" په نښه کړي.