اوکرايين جګړه: روسيه د اړتيا وړ وسلو برابرولو کې له "ستونزو سره مخ" ده

لوېديځ چارواکي وايي، روسيه د اوکرايين په جګړه کې د اړتيا وړ وسلو او مهماتو په چمتو کولو کې له ستونزو سره مخامخ ده.

د لوېديځ يوه چارواکي ويلي، روسيه د کافي تجهيزاتو او اکمالاتو په چمتو کولو کې له "سختو ننګونو" سره لاس او ګرېوان ده.

د روسيې د وسلو او مهماتو دا مسئله داسې مهال راپورته کېږي چې اوکرايين ته د لوېديځو هېوادونو له لوري د وسلو د لېږد په اړه اندېښنې مخ په زياتېدو دي.

لکه څنګه چې د اوکرايين او روسيې چګړه درېيم کال ته ننوځي د وسلو، مهماتو او کسانو اکمالات د جګړې د پايلې په ټاکلو کې يو مهم عنصر بلل کېږي.

يوه لوېديځ چارواکي ادعا کړې چې په روسيه کې جوړې شوې وسلې اوس مهال د اوکرايين په جګړه کې د دوی د اړتیاو د پوره کولو لپاره کافي نه دي. " هغه زياته کړې چې مسکو يوازې د مهماتو او وسلو د بديلو سرچينو په موندلو سره خپل اکمالات کولی شي چې دا اوږدمهاله حل نه دی.

دغه چارواکی بنديزونه د دې کمښت يو لامل بولي.

دی وايي، "بنديزونه د روسيې پوځي صنعت ته سخت زيان رسولی چې د جدي ځنډ او لګښتونو د زياتوالي لامل شوی. "

روسيې په اوکرايين کې د جګړې په ډګر کې يو لړ پرمختګونه هم کړي چې د هغې له ډلې يو د اوډيوکا ښار نيول دي. خو چارواکي په دې اند دي چې روسيه په دې لار کې د مړو او ټپیانو درنه بيه پرې کوي.

يوه لوېديځ چارواکي ويلي، روسيه اړه ده چې د وسلو پوره کولو لپاره بهرنيو سرچينو ته مخه کړي. په دې کې د ايران ډرون او توغندي او له شمالي کوريا څخه مهمات شامل دي. داسې انګېرل کېږي چې ځينې يې د ټيټ کيفيت لرونکي دي.

دغه چارواکي زياته کړې چې روسيې د هغو تجهيزاتو د کارولو امر کړی چې بايد نورو هېوادونو ته ورکړل شي. په دې کې هند هم شامل دی چې له اوږدې مودې راهيسې د روسيې په وسلو تکيه کوي او هوايي ځواک يې يو کال وړاندې ويلي وو چې ژمنه شوې وسلې يې نه دي ترلاسه کړې.