د امریکا استازو جرګې افغان ژباړنو ته د ویزې صادرولو د چټکولو طرحه تصویب کړه

د امریکا استازو جرګې (ولسي جرګې) د سې شنبې په ورځ د هغو افغانانو د کډوالۍ ویزو غوښتنلیکونو ته د چټکې رسېدنې یوه طرحه تصویب کړې چې لهامریکايي ځواکونو سره یې کار کړی دی.

د ولسي جرګې طرحه چې د سې شنبې په ورځ په ډېرو رایو تصویب شوه، هغه غوښتونکي چې د ځانګړې کډوالۍ شرایط یې پوره کړې وي، له روغتیايي معایناتو معاف یا بښي.

پخوانی نظامي او د ولسي جرګې غړی جیسون کېرو چې یو وخت یې په افغانستان کې خدمت کړی د دغې طرحې یو چمتو کوونکی دی.

د فرانس خبري اژانس د راپور له مخې، هغه د سې شنبې په ورځ وویل، دغه طرحه د ویزې هر غوښتونکي یا متقاضي د انتظار موده یوه میاشت لنډوي.

هغه په یو ټوېټ کې لیکلي: "دغه لایحه د یو شمیر کسانو ژوند ژغوري، خو زموږ کار بشپړ شوی نه دی. موږ باید دغه کار پای ته ورسوو او زموږ شریکان چې په خطر کې دي، را وباسو. "

د ولسمشر بایډن تر لاسلیک مخکې د ولسي جرګې دا طرحه باید په سنا یا مشرانو جرګه کې هم تصویب شي.

د امریکا مشرانو جرګه هم داسې طرحه اروزوي چې له مخې یې د وژل شویو افغان ژباړونکو ښځې او اولادونه له کډوالۍ ویزې برخمنېږي.

د امریکا حکومت له هغو افغانانو سره چې د ایتلافي ځواکونو سره یې کار کړی د مرستې لپاره فشار سره مخ دی او تېره اونۍ یې وویل، نیت لري زرګونه دغه کسان د سپتمبر میاشتې تر یوولسمې نیټې د خپلو ځواکونو له وتلو وړاندې له افغانستان وباسي.

د امریکا ولسمشر جوبایډن د تېرې اونۍ د پنجشنبې په ورځ په سپینه ماڼۍ کې وویل: " هغوی چې له موږ سره یې مرسته کړې، یواځې به پاتې نه شي. د بل هر هغه کس په څېر یې هرکلی کېږي چې له موږ سره د مرستې لپاره یې خپل ځان په خطر کې اچولی. "

د امریکا حکومت وايي د دغې طرحې پر بنسټ ټاکل شوې ده "شاوخوا ۵۰ زره کسان" نورو هېوادونو ته ولېږدول شي.

افغان ژباړن چې کلونه یې له امریکا سره په افغانستان کې کار کړی،وېرېږي چې د دغه هېواد د ځواکونو له وتلو وروسته به د طالبانو له غچ اخیستنې سره مخ شي.

څه موده وړاندې طالبانو د یوې اعلامیې خپرولو سره د بهرنیو ځواکونو له ژباړونکو او ځايي کارکوونکو وغوښتل چې د "پښېمانۍ په څرګندولو" سره په دغه هېواد کې پاتېدلی شي.

د افغانستان شاوخوا ۱۸ زره وګړو د امریکا متحده ایالتونو ویزو ته غوښتنلیکونه ورکړي دي، خو اوږدمهالې پروسې د هغوی د ویزو صادرول له ځنډ سره مخ کړي دي.

ټاکلې ده امریکا دغه کسان له سیپتمبر میاشتې وړاندې نورو هېوادونو ته ولېږدوي او په هغه ځای کې یې غوښتنلیکونه بشپړ شي.