ولسمشر غني تذکره کې د مور نوم لیکلو لپاره قانون کې بدلون تائيد کړ

افغان ولسمشر محمد اشرف غني په تذکره ( پېژند پاڼه) کې د ثبت احوال په قانون کې د مور نوم لیکلو اړوند تعدیل توشیح کړ. د ولسمشر ویاند صدیق صدیقي په یوه ټویټر پیغام کې ویلي، ولسمشر دغه تعدیل چې افغان کابینې له مخکې تصویب کړی، د یوه فرمان له مخې توشیح کړ.

د دغه فرمان له مخې به د افغانانو په تذکره کې د نورو شخصي مشخصاتو تر څنګ د مور نوم هم لیکل کېږي. افغان کابینې د ولسمشر غني په مشرۍ غونډه کې د روانې میاشتې په لومړیو کې په تذکره کې د مور نوم ثبتول تایید کړل.

له دې مخکې د دویم مرستیال سرور دانش په مشرۍ د قوانینو کمېټې د 'ثبت احوال نفوس ' قانون په ځینو برخو کې په تذکره کې د مور نوم ثبتولو په ګډون تعدیل تایید کړی و.

په تذکره کې د مور نوم ثبت موضوع د یو شمېر افغان مدني فعالانو او ښځو حقونو فعالانو له کلونو مبارزې وروسته د چارواکو د پام وړ وګرځېده.

په ورته مهال د افغانستان بشري حقونو کمېسیون د افغانستان جمهوري ریاست دغه اقدام ستایلی و، چې له مخې به یې د مور نوم د هویت په تذکره کې ثبتېږي. یاد کمېسیون (د ښځو حیثیت ته د درناوي په پار دا یو نیک اقدام) بللی و او له اړوند چارواکو یې د تصویب غوښتنه کوله.

د خواله رسنیو کاروونکو په پراخه کچه د دې غوښتنې تایید کاوه او هشټګ یې لاس پر لاس کېده.

ګڼو افغان سیاستوالو، لیکوالو، هنرمندانو او پېژندل شویو شخصیتونو پر خواله رسنیو د مېندو نوم لیکلو سره د دغه کمپاین ملاتړ کړی.

په افغانستان کې لومړنۍ پېژندپاڼه په کال ۱۲۹۸ لمریز کال کې پاچا امان الله خان ته ورکړل شوه.