"له لسو ورځو راهیسې د کندهار او هلمند برېښنا پرې شوې"

د هلمند په کجکي ولسوالۍ کې د وسله والو طالبانو او حکومت ترمنځ د لارې پر سر د رامنځته شویو ستونزو له کبله نن لسمه ورځ ده چې پر کندهار او هلمند برېښنا پرې شوې ده.

په سویل کې د برېښنا چارواکي وایي، هڅه کوي ستونزه د ځايي مشرانو او سپین ږیرو په منځکړیتوب هواره کړي.

په کندهار کې د برېښنا شرکت د چارواکو په وینا اوس په ۴۸ ساعتونو کې یوازې دوه ساعت ډیزلي برېښنا د کندهار ښارونو ته ورکوي.

یو شمېر هلمندیان د اعتراض په توګه سره راټول شوي وو او د جګړې له دواړو غاړو یې وغوښتل چې برېښنا دې د سیاسي وسیلې په توګه نه کاروي.

په هلمند کې د کجکي برېښنا فابریکه شاوخوا لس ورځې وړاندې هغه مهال په ټپه ودرول شوه چې د برېښنا د شرکت د ځايي چارواکو په وینا "وسله والو طالبانو په لوی لاس په سنګین ولسوالۍ کې د برېښنا مزي پرې کړل او د برېښنا کارکوونکو ته یې د بیا رغولو اجازه نه ورکوي."

د کجکې د برېښنا فابریکه د کندهار او هلمند د برېښنا د چمتو کولو اصلي سرچینه بلل کیږي. خو یوې سرچینې بي بي سي ته وویل، ستونزه هغه مهال رامنځته شوه چې وسله والو طالبانو د کجکې برېښنا فابریکې ته تللې لاره د فابریکې د کارکونکو پر مخ وتړله او پر یوې بله لاره یې د تګ راتګ غوښتنه ترې وکړه.

د برېښنا نشتوالي د هلمند مرکز لښکرګاه او کندهار ښار کې د عامو خلکو ژوند او کاروبار سخت زیانمن کړی دی.

د هلمند د لښکرګاه کې یو شمېر مدني فعالانو او ځایي خلکو په یوه اعتراضي غونډه کې د رامنځته شوې ستونزې د ژر هواري غوښتنه وکړه.

په سویل کې د برېښنا شرکت چارواکي مني چې ستونزه په کجکي ولسوالۍ کې د وسلوالو طالبانو او ځايي چارواکو تر منځ د لارې پر سر رامنځته شوې ده.

ددغې ادارې د چارواکو په خبره، وسله والو طالبانو له دوی غوښتي چې د برېښنا کارکونکي باید پر هغه لار تګ راتګ وکړي چې د دوی تر ولکې لاندي سیمو ته غزېدلې ده.

په سویل کې د برېښنا شرکت مشر امان الله فاروقي تمه ښيي چې دغه ستونزه به د ځايي مشرانو په منځکړیتوب هواره کړي.

په دې اړه طالبانو څه نه دي ویلي.

د کجکي برېښنا فابریکه اوسمهال د اوبو د کموالي له کبله ۳۱ مېګاواټه برېښنا تولیدوي، چي ۲۰ میګاوټه یې په خپل هلمند او پاتې ۱۱ میګاواټه یې په کندهار ښار کې مصرفیږي.