افغانستان ته سوله لومړیتوب لري او که ټاکنې؟

د امریکا او طالبانو له اوو پړاویزه خبرو وروسته افغان حکومت هیله من دی چې تر دوو میاشتو له وسلوالو طالبانو سره د سولې لومړنی تړون وشي.

د افغان ولسمشر ویاند وایي، د دې تړون له مخې به د حکومت او طالبانو ترمنځ مخامخ خبرې پیل شي.

ارګ په ورته مهال زیاتوي چې سوله او ټاکنې د حکومت یو شان لومړیتوبونه دي او ټاکنې به هم په خپل وخت کېږي.

طالبان بیا بیا له افغان حکومت سره له مخامخ خبرو ډډه کوي، خو حکومت وايي، د سولې خبرو کې پرمختګ شوی او هیله لري چې تر سپټمبر پورې دې برخه کې لومړنی تړون وشي.

د ولسمشر ویاند صدیق صدیقي وايي، دې لومړني تړون سره به دا بهیر بل پړاو ته ننوځي چې له مخې به یې د حکومت او طالبانو ترمنځ مخامخ خبرې پیل شي.

څه موده وړاندې د امریکا د بهرنیو چارو وزیر مایک پاپمیو هم کابل ته د خپل سفر پر مهال ویلي و چې تر سپتمبر میاشت پورې به له طالبانو سره هوکړې ته ورسیږي، که څه هم تېره اونۍ د افغان سولې لپاره د امریکا ځانګړي استازي زلمي خلیلزاد وویل، چې تر ټاکنو سوله لومړیتوب لري او که سوله ونه شي بیا ممکن ټاکنې وشي.

خو صدیق صدیقي وایي، سوله او ټاکنې د حکومت دوه داسې لومړیتوبونه دي چې تر بل هرڅه لومړیتوب ور کوي. نوموړي دا هم وايي، چې یوه پروسه د بلې پروسې خنډ نه کېږي.

ښاغلی صدیقي وايي، چې ټاکنې د حکومت رواتوب تضمینوي او ولسمشرۍ ټاکنې به د مهالوېش له مخې کېږي. د هغه دا خبرې په داسې مهال دي چې د ټاکنو خپلواک کمېسون د ولسمشرۍ ۱۸ نوماندانو ته باور لیکونه ور کړل.

د افغانستان د ټاکنو خپلواک کمېسیون د مهالوېش له مخې دا انتخابات د روان لمریز کال د تلې پر شپږمه یا د سپټمبر پر ۲۸ کېږي.

له بلې خوا خوست کې د دوشنبې په ورځ شاوخوا ۵۰۰ میرمنو په یوه غونډه کې له افغان دولت او د ټاکنو له خپلواک کمیسیون د ولسمشرۍ را روانو ټاکنو لپاره د تقویتي نوم لیکنې تړل شوې پروسې بیا پیلیدل غوښتل.

دا میرمنې په دې ولایت کې د تذکرو د سټیکر کولو شل ورځنۍ پروسه کمه موده بولي او له مسولانو یې د بیا پیلیدا غوښتنه کوي. دغه میرمنې د خوست جرګو تالار کې راټولې شوې. دوی وايي، له راټولیدنې یې بله موخه په را روانو ولسمشریزو ټاکنو کې د پراخې ونډې اخیستلو لپآره د میرمنوهڅول هم دي.

د خوست د ټاکنو خپلواک کمیسیون وایي، دا ستونزه یې د ټاکنو مرکزي کمیسیون سره شریکه کړې، خو تراوسه یې کوم مثبت ځواب نه دی ترلاسه کړی. د ولسمشریزو را روانو ټاکنو لپاره د تقویتي نوم لیکنې پروسه د جوزا میاشتې له ۱۸ پیل شوې وه، چې د سرطان تر ۸ اتمې به دوام وکړي.

د خلکو په خبره پدې برخه کې کم عامه پوهاوی، په ځينو سیمو کې نا امني او د یادې پروسې لپاره د کم وخت ټاکل هغه لاملونه وو،چې د تقویتي نوم لیکنې پروسه یې کمرنګه کړې او ډیری افغانان چې زیاته برخه ېې میرمنې دي له دې پروسې بې برخې شوې دي.