ورځپاڼې: کابل کې د امریکا سفارت پرسونل نیمايي کېږي

امریکایۍ ورځپاڼې دې هیل لیکلي چې د امریکا د بهرنیو چارو وزیر مایک پمپیو غواړي په افغانستان کې د امریکا د سفارت د پرسونل کمولو پلانونه چټک کړي او د دې پلان له مخې د دغه سفارت پرسونل نیمايي ته را کم کړل شي.

ورځپاڼه لیکي د بهرنیو چارو وزیر امر کړی چې دغه کار له هغه وخت یو کال وړاندې ترسره شي چې تمه یې کېده.

په دې رپوټ کې د کانګرس د یوه چارواکي له قوله ویل شوي چې ښايي دا چاره یوه اونۍ وروسته یعنې د مې پر یو دیرشمه پيل او د روان کال د سپتمبر میاشتې تر پایه تمه ده چې بشپړ شي.

ورځپاڼه لیکي دا ګام په داسې مهال پورته کیږي چې له طالبانو سره د امریکا خبرې ټکنۍ پرمخ روانې دي.

ورځپاڼه د رویټرز خبري اژانس په حواله لیکي، په کابل کې د امریکا د سفارت د ۱۵۰۰پرسونل نیمايي کمول د هغه پلان یوه برخه ده چې ولسمشر ډونلډ ټرمپ یې د عملي کولو غوښتنه کړې او له مخې په نړۍ کې د امریکايي ډيپلوماټانو شمیر کمیږي.

په رپوټ کې پر دې هم اندیښنه ښودل شوې چې ښايي دا ګام له افغان دولت سره په اړیکو کې د بې باورۍ خطر له ځان سره ولري.

دې هیل لیکي په دې اړه یې هڅه وکړه چې د بهرنیو چارو وزارت نظر هم واخلي خو چارواکو سملاسي له څه ویلو ډډه وکړه.

د سریلانکا بریدونه ا و داعش

نیویارک ټایمز ورځپاڼه په سریلانکا کې د تېرې اونۍ د وین لړلو بریدونو په اړه یوه مطلب کې لیکي؛ دا بریدونه خبرداری ورکوي چې د دغې ډلې فعالیتونه مخ په پراخېدو دي.

دا ورځپاڼه لیکي کارپوهان په دې نظر دي چې داعش ډله توانیدلې چې له شته امکاناتو او له خپل نوم څخه چې د یوه نړیوال برانډ بڼه یې خپله کړې ګټه پورته کړې ده.

ورځپاڼه لیکي کارپوهان په دې نظر دي چې په عراق او سوریه کې د داعش مرکزیت په له منځه تللو سره دا ډله اوس د پخوا پر تله مرکزیت نه لري او د خپلو فعالیتونو لپاره تر ډېره د خپلو خواخوږو پر هڅو ولاړه ده.

د نیویارک ټایمز ورځپاڼې په دې تفصیلي مطلب کې داعش ډله له القاعده سره پرتله شوې او لیکي چې په ۲۰۰۲ کال کې په افغانستان کې د القاعده ډلې د مرکز په له منځه تللو سره د دغې ډلې فعالیتونه یمن، شمالي افریقا او عراق ته ولیږدول شول، خو داعش په څو محدودو سیمو کې منحصره نه ده او په ټوله نړۍ کې خوره ده.

د ورځپانې د دې مطلب د ادعا له مخې دغه ډله لا هم په عراق او سوریه کې زرګونه پټ جنګیالي لري.

برتانوۍ ورځپاڼې انديپنډېنټ لیکلي چې د روسیې او شمالي کوریا د ولسمشرانو لومړۍ لیدنې داسې ښکاري چې غواړي د امریکا ولسمشر ډونالډ ټرمپ ته یو پیغام واستوي.

ورځپاڼه لیکي د روسیې له ولسمشر ولادیمیر پوتین د کیم جون اونګ لیدنه داسې مهال کیږي چې د امریکا له ولسمشر سره ددغه دویمه غونډه له ناکامۍ سره مخ شوه.

په دې لیدنه کې د ورځپاڼې ددې مطلب په نظر ولادیمیر پوتین هڅه کوله وښيي چې دی یو بې تاوانه نړیوال منځګړی دی او کیم جونګ د ولادیمیر پوتین ددې بلنې په منلو سره ښايي واشنګټن ته دا اشاره وي چې ولسمشر ډونالډ ټرمپ په نړۍ کې یوازینی لوبغاړی نه دی.