"برتانیا د افغان هوایي ځواک د وړتیا زیاتولو ژمنه وکړه"

د افغانستان د ملي امنیت شورا دفتر وايي، برتانیا د افغان ځواکونو په تېره هوايي پوځ د وړتیا لوړولو هڅه کوي.

د ملي امنیت شورا له دفتر خپره شوې خبرپاڼه کې راغلي، د برتانیا دفاع وزیر د پنجشنبې( د اګسټ پر ۳۰) په ورځ ناوخته کابل کې د ملي امنیت شورا سلاکار حمدالله محب سره ولیدل.

د دې شورا ویاند قادر شاه بي بي سي ته وویل، چې د برتانیا دفاع وزیر ژمنه وکړه چې د افغان پوځ په تېره د هوايي ځواکونو په وړتیا لوړولو کې به خپلو مرستو ته دوام ور کوي.

د قادر شاه په خبره، د ترهګرۍ ضد جګړه کې برتانیا د افغانستان یو ستراتیژيک ملګری دی، ځکه دواړو لورو په دې برخه کې د مبارزې لپاره د افغان ځواکونو پر پیاوړتیا زیاتولو خبرې وکړې.

* پر افغان هوايي ځواک د امریکا پانګونه

* "د افغان هوايي ځواک په پښو درېدلو ته اوږده لار په مخ کې ده"

په اعلامیه کې هم د ویلیامسن له خولې ویل شوي: بریتانیا هڅه کوي، چې د افغان ځواکونو په ځانګړي توګه د افغان هوايي ځواک مهارتونه او وړتیاوې پورته کړي.

د ویلیامسن په خبره، د برتانیا په کوڅو او سړکونو کې هغه مهال د کامل امن احساس کیدلی شي، چې د افغانستان کوڅې او سړکونه امن شي.

د برتانيا دفاع وزير ګوېن ویلیامسن تېرمه مۍ میاشت کې د دغه هېواد له لومړۍ وزيرې ټريزامې وغوښتل چې افغانستان ته د څلور سوه نورو سرتېرو لېږل ور سره ومني.

د نوموړي په خبره، د دغو سرتېرو دنده به بيا هم د افغان ځواکونو روزنه وي او په جګړې کې به برخه نه اخلي.

۶۰۰ برتانوي سرتېري وارله مخه کابل کې مېشت دي چې د افغان ځواکونو روزنې سره مرسته کوي.

افغان هوايي ځواک ډېرول او پیاوړی کول

له وسلوالو سره د مبارزې لپاره د افغان پوځ په تېره هوايي ځواکونو پیاوړي کول ډېر مهم بلل کېږي.

د دې ځواکونو تجهیزول د ولسمشر غني په مشرۍ د افغان حکومت د څلور کلن امنیتي پلان برخه ده.

همدا وجه ده چې له تېرو دوو کلونو راهیسې امریکا هم د افغان هوايي ځواکونو د پیاوړتیا او سمبالولو هڅې کوي.

* امریکا د افغان هوايي او ځانګړو ځواکونو شمېر ډېروي

* ولسمشر غني له افغان هوايي ځواک سره د امریکا مرستې غوښتنه کړې

د امریکا د مرکزي قومندانۍ مشر جوزف ووټل تېره مۍ میاشت کې وویل، چې پر طالبانو د پوځي فشار زیاتولو لپاره به امریکا د افغان هوايي او ځانګړو ځواکونو شمېر زیاتوي.

"د پوځي فشار د برخې په توګه، موږ د افغان ځانګړو ځواکونو شمېر دوه او د افغان هوايي ځواکونو شمېر درې برابره کوو".

بلک هاک الوتکې

افغان پوځ د ۲۰۱۷ کال په سپټمبر کې د امریکا بلک هاک چورلکې ترلاسه کړې او د روان کال په مۍ میاشت کې یې د دې چورلکو کارول پیل کړل.

ناټو وايي دا ډول چورلکې د افغان هوایي ځواکونو پراختیا، ټیکاو او و ړتیا زیاتوي.

بهرني ځواکونه وايي، د دې الوتکو لپاره یې تر ۳۰ ډېر پیلوټان روزلي او تر یوه بل کال پورې به دا شمېر دوه برابره شي.

د افغانستان هوايي ځواکونو پخوا د روسیې جوړ الوتکې او چورلکې کارولې، خو پر مسکو د واشنګټن د بندیزونو له امله کابل له روسیې الوتکې نشي پېرلی.

د امریکا بلک هاک چورلکې د افغان ځواکونو د روسیې جوړ اېم، ای ۱۷ چورلکو ځای نیسي.

ټاکلې ده تر راتلونکو څو کلونو پورې امریکا تر ۱۶۰ بلک هاک چورلکې افغان پوځ ته ور کړي.