ورځپاڼې: د امریکایانو وتل؛ شپږ میاشتو که درېیو کلونو کې؟

قطر کې د سولې د خبرو اترو د پايلو په تړاو نيويارک ټايمز په خپل يوۀ مطلب کې ليکلي چې دوو امريکايي چارواکو ورځپاڼې ته ويلي دوى له افغان خاورې ترهگريزو بريدونو ته د اجازې نه ورکولو په تړاو پر يوۀ ميکانيزم هوکړې ته ډېر نژدې شوي و او د دې ترڅنگ د امريکايي ځواکونو د وتلو د پلان پر جزيياتو هم د پام وړ پرمختگ وشو.

ورځپاڼه وايي تمه ده چې زلمى خليلزاد پرون بېرته واشنگټن ته خوځېدلى وي چې د امريکا بهرنيو چارو وزير ته په دې تړاو مالومات ورکړي.

يوۀ لوړ پوړي امريکايي چارواکي ورځپاڼې ته ويلي طالبانو له افغان خاورې د ترهگريزو بريدونو د مخنيوي په اړه په ډېرو جزيياتو يو وړانديز چمتو کړى و.

د القاعدې يادونه هم په کې شوې وه چې طالبانو لپاره د دغه چارواکي په وينا سخته موضوع وه ځکه هېڅکله يې يوه توندلارې ډله نه ده غندلې.

د ورځپاڼې په وينا، طالبانو ويلي چې دوى د مسودې د ژبې او ټکو په تړاو ډېر يو نازک حالت کې دي او هڅه کوي داسې يوۀ پوهاوي ته ورسېږي چې امريکا ته هم د مسودې ژبه د منلو وي او د دوى د وسلوالو غوسه هم ونه پاروي او په ليکو کې يې وېش رامنځ ته نه شي.

ورځپاڼه د چارواکو په وينا ليکي، امريکايان د ترهگرۍ د مخنيوي په برخه کې د طالبانو ميکانيزم نه راضي و خو په دې تړاو يې نور جزييات نه دي ورکړي.

پسرلني عملیات

ورځپاڼه وايي دواړې غاړې د امريکايي ځواکونو د مهالوېش پر سر اوږدې خبرې وکړې خو په دې برخه کې پرمختگ سوکه و او له هوکړې نه خبره لېرې پاتې شوه.

ورځپاڼه وايي طالبانو په شاوخوا شپږو مياشتو کې د امريکايي ځواکونو د وتلو خبره کوله، خو امريکايانو بيا پر درېيو کلونو ټينگار کاوۀ.

ورځپاڼه همداراز د دغو امريکايي چارواکو په وينا وايي چې طالبانو او امريکايانو افغانستان کې د تاوتريخوالي د کچې کمولو په تړاو هم پراخې خبرې شوي چې د طالبانو د پسرلنيو بريدونو د مخنيوي يوه څرگنده هڅه وه چې په تېره کې يې ډېره مرگژوبله اړولې.

د مشال خان وژنه کې د ښکېلو کسانو د خوشې کولو امر

پاکستانۍ ډان ورځپاڼه وايي پاکستان کې د ترهگرۍ ضد يوه محکمه د ولي خان پوهنتون د وژل شوي محصل مشال خان د وژنې په قضيه کې د پاتې څلورو تورنو کسانو پر وړاندې خپله پرېکړه اعلانوي . ټاکل شوې دا پرېکړه د مارچ پر شپاړسمه اعلان شي.

مشال خان ٢٠١٧ م کال کې دين ته د سپکاوي په تور د پارېدلو خلکو له لوري په پوهنتون کې دننه ووژل شو. تر اوسه محکمې ٥٧ کسانو ته سزا اورولې.

برتانوۍ انډېپنډېنټ ورځپاڼې د شمالي کوريا د رسنيو په وينا ليکلي چې د دغه هېواد په پارلماني ټاکنو کې د رايه ورکوونکو کچه ٩٩.٩٩ سلنې ته رسېده، يانې په دغه هېواد کې نژدې هره تبع به دغو ټاکنو کې برخه اخيستې.

دغو ټاکنو کې د پارلمان هرې څوکۍ لپاره يو کس نوماند و هغه هم د حکومت په اجازه. په دغو ټاکنو کې کېم جونگ اون نه و نوماند او لومړنى هېوادنى مشر دى چې د پارلمان غړيتوب به نه لري.

گارډين ورځپاڼې بيا د هغه سعودۍ الوتکې کيسه راخيستې چې د جدې له هوايي ډگره له الوتنې وروسته بېرته ځکه هوايي ډگر ته ور وگرځېده چې په الوتکه کې يوې ښځې عملې ته وويل د غېږې ماشوم يې د هوايي ډگر په انتظار ځي کې ترې هېر شوى دى.

په هوايي ډګر کې د پاتې ماشوم لپاره الوتکه بېرته ستنه شوه

ورځپاڼه وايي کله چې پيلوټ د هوايي ټرافيکو د کنټرول له کارکوونکو د بېرته ور گرځېدو اجازه غوښته نو هغوى دغې ناوياتې پېښې حيران کړي و او پر خواله رسنيو خپرې شوې يوې ويډيو کې د هغوى غږ اورېدل کېده چې له نورو سره يې سلا مشورې کولې.

خو پيلوټ بيا دوى ته تکراروي چې د يوې مېرمنې د غېږې ماشوم هوايي ډگر کې پاتې او هغه نه غواړي چې دا سفر ته دوام ورکړي. د ورځپاڼې په وينا الوتکې ته د بېرته ورگرځېدو اجازه ورکړل شوه. ورځپاڼه وايي دغه ډول يوه پېښه چې الوتکه يې بېرته ورگرځېدو ته اړه کړه ډېره ناوياته ده.