Sin a tha manaidsear Chabar Fèidh Gharry Reid dìreach air a ràdh ri Dòmhnall MacLaomhainn. Bu chòir dha cuairt dheireannach Chupa na Camanachd a bhith air "bucket list" gach duine, tha Garry ag ràdh. Tha ceist air cuideachd mu loidhne-dìon Kings is Raibeart Mabon a dhìth. Tha e den bheachd gun tèid Calum Grannd gu full-back.

Timcheall air 20 mionaid a-nise gus an tòisich an geama mòr is Pàirc a' Bhucht a' lìonadh gu math.

Cuimhnichibh gu bheil gach buille againn chan ann a-mhàin an seo ach air BBC Radio nan Gàidheal is an ceangal aig mullach na duilleige.

'S iomadh tadhal a chuir Raghnall Ros do Cheann a' Ghiùthsaich ann an cuairtean deireannach Chupa na Camanachd thar nam bliadhnaichean - agus anns gach farpais eile! 'S e sin a dh'fhàg gun do chuir cuid anns na meadhanan far-ainm 'Ronaldo of the Glens' air.

A rèir na nochd ann an Leabhar Bliadhnail na Camanachd air ais ann am meadhan na 90an ge-tà, chan ann air na glinn idir a bha aire Raghnaill.....ach air Machair!

Tùs an deilbh, Leabhar Bliadhnail na Camanachd

Ged a tha Baile Ùr an t-Slèibh is Ceann a' Ghiùthsaich air Cupa na Camanachd a bhuannachadh 60 turasan eatorra gu seo, chan eil iad air coinneachadh sa chuairt dheireannaich cho tric sin bho 1983 nuair a chaidh cur às dhan t-seann siostam le deas is tuath an-còmhnaidh a' coinneachadh.

Chì sibh na tadhail an seo bhon turas mu dheireadh ann an 2011 nuair a bhuannaich Baile Ùr an t-Slèibh 4-3 ann an geama air leth.

Ron sin 's e an turas mu dheireadh 1997 nuair a bhuannaich Kings 12-1 (seadh, 12-1).

Cha leig sibh a leas dragh a ghabhail, a mhuinntir a' Bhaile Ùir, chan eil na tadhail sin againn.

Tha Dòmhnall a-nise a' cluinntinn bho Iain 'Corky' Borthwick aig Ceann a' Ghiùthsaich. Tha Iain ag aideachadh gur e call mòr a th' ann an Raibeart Mabon is e air a ghoirteachadh ach tha e ag ràdh gu bheil sguad mòr aca.

Tha e a' cumail a-mach gu bheil Kings a' dèiligeadh ri seo mar gheama sam bith eile. Eil sinn ga chreidsinn?

Mar a thuirt Calum Dòmhnallach an sin tha Dòmhnall MacLaomainn againn air oir na pàirce an-diugh is bidh e a' cumail fios rinn.

Bha Dòmhnall dìreach a' bruidhinn ri manaidsear a' Bhaile Ùir Peadar Ros. Thuirt esan nach robh iad math gu leòr an aghaidh Chinn a' Ghiùthsaich am-bliadhna ach gu bheil iad an seo an-diugh gus an cupa a bhuannachadh.

Cha robh Peadar 'son cus eile innse dha Dòmhnall mun sgioba ge-tà - is tha Somhairle MacDhòmhnaill ag ràdh gu bheil seo na chomharra air neart FtMG ann am Bàideanach is dragh air Peadar gum faigh an naidheachd ma sgaoil!

Calum Dòmhnallach
Ag aithris à Pàirc a' Bhucht

"Tha Dòmhnall MacLaomainn mar shealgair air a’ phàirc, a’ feuchainn ri facal fhaighinn air na manaidsearan mus tòisich an geama. Là mòr 'son an dà thaobh ach chan eil an coltas air na cluicheadairean is iad uile gam blàthachadh fhèin gu socair".

Baile Ùr an t-Slèibh:

K Ros, R Ceannadach, S Dòmhnallach, T Ros, D Sloss, D Dòmhnallach, C Ritchie, D Brennan, S Ros, M Sloss, J Coyle, I Robinson. Agus C Jones, A MacBean, C McNiven, R Irvine, E Dingwall.

Ceann a' Ghiùthsaich:

B MacGriogair, C Grannd, L Borthwick, C Bremner, Z Michie, F Rothach, T Borthwick, I Friseal, R MacAnndrais, R Young, D Borthwick, S Genini. Agus S Thain, R Borthwick, L Bain, R MacEachainn, E Baikie.

Nise - 's e an-diugh an là as motha ann an iomain nam fear ach chaidh an duais as cliùitiche ann an camanachd nam ban a thoirt seachad aig toiseach na mìos.

'S iad Bàideanach a thog Cupa Valerie Fhriseil is iad a' soirbheachadh 2-1 an aghaidh Loch Abair. Dìoghaltas a bha sin is na h-Abraich air a' chùis a dhèanamh orra an-uiridh.

Chan eil seusan nam ban seachad fhathast is play-off eadar na sgiobaidhean an ath-mhìos 'son tiotal na lìge.

Co-dhiù, tha fios againn le cinnt gum bi Cupa na Camanachd a' dol air ais a Bhàideanach mar a chaidh Cupa Valerie Fhriseil. 'S e a' cheist, càite ann am Bàideanach?

Tha an dà sgioba a-mach air a' phàirc an-dràsta ag ullachadh 'son a' gheama.

Chaidh aona chupa a thoirt seachad aig Pàirc a' Bhucht mar-thà an-diugh is Lòbhat air a' chùis a dhèanamh air an Eilean Sgitheanach gus Cupa MhicMhaighstir aig Ìre Fo 14 a bhuannachadh.

Chrìochnaich an geama 2-0 do Lòbhat is na tadhail a' tighinn bho Archie Bell is Dougal Strang.

Meal a naidheachd orra!

Tùs an deilbh, Comann na Camanachd

Cha robh BBC Naidheachdan aig a' chiad chuairt dheireannach sin ann an 1896!

Ach bha sinn beò air-loidhne aig toiseach na slighe gu Pàirc a' Bhucht am-bliadhna leis an taghadh 'son nan ìrean tràth air ais sa Ghearran, mar a bhios sinn fad an fheasgair an-diugh.

Cuimhnichibh gum bi sinn beò air BBC Radio nan Gàidheal cuideachd is am prògram sin dìreach a' tòiseachadh.

Dèan cliog air a' cheangal aig mullach na duilleige no cur air a' wireless is cha tèid sibh fada ceàrr.

"The committee of the Camanachd Association, by deciding to provide a challenge trophy, which will probably take the form of a cup, have taken a most important step, and one that contain fail to commend itself to all votaries of the popular game of shinty".

'S ann mar sin a chuir Courier Inbhir Nis fàilte air an naidheachd ann an 1895 gun robh Cupa na Camanachd gu bhith ann.

'S iad cò eile ach Ceann a' Ghiùthsaich a bhuannaich a' chiad fharpais ann an 1896 an aghaidh Comhghall Ghlaschu.

A' cluich sa gheama sin bha Jock Dallas agus 's ann airsan a tha an duine beag air mullach a' chupa stèidhichte.

Lean gu leòr ann an Ceann a' Ghiùthsaich ri cliù an sinnsear bhon uairsin.

Feasgar math is fàilte oirbh dhan là as motha den bhliadhna ann an iomain nam fear is cuairt dheireannach Chupa na Camanachd againn aig Pàirc a' Bhucht.

'S e rud sònraichte a tha sin fhèin is a' chuairt dheireannach a' tilleadh chun a' Bhucht 'son a' chiad uair bho chaidh obair-leasachaidh a dhèanamh air an àite.

Abair geama a tha romhainn cuideachd is seann nàimhdean Bhàideanach a' dol ann an ugannan a chèile às ùr - an e Baile Ùr an t-Slèibh no Ceann a' Ghiùthsaich a gheibh an làmhan air a' chupa aig deireadh an fheasgair?

Tòisichidh an geama aig 2:05f is bidh sinne còmhla ribh an seo aig BBC Naidheachdan fad an fheasgair.

Bidh sinn cuideachd beò air BBC Radio nan Gàidheal bho 1f - chì sibh an ceangal aig mullach na duilleige - leis an fhiosrachadh as ùire ron gheama is gach buille mar a thachras e.

Fan còmhla rinn - tha seo gus a bhith math!